An Ministry of Justice (Ministry) kan Russia nagsumitir nin petisyon sa Korte Suprema tanganing “ideklarar na extremist an relihiyosong organisasyon, an Administrative Center of Jehovah’s Witnesses, asin ipagbawal an mga gibuhon kaiyan, dangan ipasara iyan.” Kan Marso 15, 2017, ipinaisi kan Korte Suprema paagi sa opisyal nindang website na naresibi ninda an petisyon hali sa Ministry. Dai man nahaloy, nakaresibi nin notisya an Administrative Center na nagsasabing pag-aadalan kan Korte Suprema an isinumitir na petisyon na ini kan Ministry asin nag-iskedyul nin pagbista sa Abril 5, 2017 sa oras na alas-10 nin aga.

Kun madesisyon an Korte Suprema apabor sa petisyon kan Ministry, grabe an magigin epekto kaiyan sa mga Saksi ni Jehova sa Russia. Puwedeng mawara sa mga Saksi an mga pagsadiring ginagamit ninda sa saindang pagsamba asin mapapundo an pagpunsiyonar kan haros 400 na legal na korporasyon. An kada saro man sa labing 170,000 na mga Saksi puwedeng sangatan nin kasong kriminal huli sana sa saindang pagtiripon para sa pagsamba, iribang pagbasa nin Bibliya, o pakikipag-ulay sa iba manungod sa saindang pagtubod.

Si Vasiliy Kalin, sarong representante kan Administrative Center sa Russia, nagsabi: “An gusto lang talaga kan lambang Saksi ni Jehova sa Russia iyo na masamba ninda an saindang Diyos sa matuninong na paagi. Sa laog nin labing 100 na taon, binaliwala kan mga awtoridad sa Russia an itinataong garantiya kan mismong mga ley ninda, na nagtatao sa sato kan deretsong iyan. Akion pa ako kan puwersahan na ipadara sa Siberia an sakuyang pamilya huli sana sa pagigin ming mga Saksi ni Jehova. Nakakamundo na an sakong mga aki saka mga makuapo mapaatubang man sa arog kaiyan na sitwasyon; bako nanggad tama iyan. Dai ko na lamang linalauman na mapapaatubang giraray kami sa huma nin pagpersegir sa relihiyon sa modernong Russia.”