Bilang sarong hoben na lalaki sa South Korea, aram ni Dong-hyuk Shin na maabot an aldaw na ipapaapod siya tanganing magsuldados. Kan ipaapod siya, nagreport siya asin tinapos an saiyang serbisyo militar kan 2005. Pagkatapos kaiyan, awtomatiko siyang napabilang sa military reserve force, kun sain regular ining ipapaapod para sa pagsasanay sa militar sa masunod na walong taon.

Dai nahaloy pagkatapos kan saiyang serbisyo, nakipag-adal sa Bibliya si Mr. Shin. Napahirong marhay an konsiyensiya niya kan manudan niya an mensahe kaini manungod sa katuninungan kaya nagsayuma na siyang magsuldados. Kan ipaapod siya kan Marso 2006 para sa pagsasanay sa mga kabilang sa military reserve force, * ipinaisi niya sa mga opisyal kan militar na dai niya maaako an pagsasanay huling dai iyan itinutugot kan saiyang konsiyensiya.

Dai minimidbid kan South Korea an deretso kan saro na magsayumang magsuldados huli sa saiyang konsiyensiya. Sa ngunyan, padagos kaiyan na ipinapaapod para sa pagsasanay sa military reserve force an labing 40 miyembro kan Mga Saksi ni Jehova dawa nagsayuma na an mga ini huli kan saindang konsiyensiya.

Binaliwala kan mga opisyal nin militar an pagsayuma ni Mr. Shin na magsanay sa military reserve force asin ipinaapod siya nin 30 beses kan 2006. Padagos na ipinaapod si Mr. Shin sa suminunod na pito pang taon. Sa kabilugan, puon Marso 2006 sagkod Disyembre 2013, ipinaapod siya nin 118 beses para magsanay. Huli sa dai pagreport ni Mr. Shin sa kada pagpaapod sa saiya, kinasuhan siya asin napreso nin 49 beses, nag-atender asin nag-apelar sa korte nin 69 beses, asin nakaresibi sa kabilugan nin 35 desisyon nin korte.

Dai kinuwestiyon kan mga korte an paninindugan ni Mr. Shin na dai magsuldados huli kan saiyang konsiyensiya. Sa sarong desisyon na ginibo kan Oktubre 7, 2014, an Ulsan District Court nagsabi: “Malinaw na [si Dong-hyuk Shin], kan magin sarong Saksi ni Jehova, mayo nang ibang mapagpipilian kundi makomiter an pagkakasala na dinadangog ngunyan sa korte, huling imposible na niyang mapakarhay an isyu sa saiyang serbisyo militar asin sa saiyang konsiyensiya asin relihiyosong paniniwala.”

Dawa ngani naiintindihan kan district court an kamugtakan ni Mr. Shin, mayong magigibo an mga korte sa South Korea kundi ipautob an mga kahagadan kan ley sa pagserbisyo sa militar. Pinamulta si Mr. Shin kan mga korte nin labing 16 milyon na won ($13,322 U.S.) asin anom na beses na sinentensiyahan na mapreso nin dai mababa sa anom na bulan, na naribayan nin mga conditional sentence. Sa sarong kaso, ipinagbuot kan korte na magsagibo siya nin 200 na oras na serbisyo sa komunidad.

Sinabi ni Mr. Shin: “Napurisaw saka nahadit akong marhay. Garo baga mayo nang katapusan an pagsakit na ini. Huling pabalik-balik ako sa korte, pati pamilya ko nasakitan naman. Sa hiling ko, parehong sakit an inagihan mi kan sakuyang ina sa siyam na taon na idto, asin naapektaran man an saiyang salud huli sa pagparahadit. Namumundo akong marhay pag nahihiling ko kun gurano siya napupurisaw huli sa mga nangyayari sako. Nagtios man ako sa pinansiyal. Huli sa pauruutrong pagpaapod asin pagdangog sa korte saka pagkapreso, pirmi akong absent sa trabaho para maatenderan iyan, kaya pitong beses kong kinaipuhan magribay nin trabaho.”

Inapelar ni Mr. Shin sa mga korte sa South Korea an gabos na desisyon laban sa saiya, pero mayong nangyari—apat na beses na ibinasura kan Korte Suprema an saiyang mga apelasyon. Huling mayong makuang legal na tabang sa laog kan South Korea, nagsangat nin reklamo si Mr. Shin sa UN Human Rights Committee (Committee) kan Hunyo 2016. Sinabi niya sa saiyang petisyon na huli sa pauruutrong pagpaapod sa saiya, pagdemanda, asin pagsentensiya, binalga kan South Korea an obligasyon kaining sunudon an International Covenant on Civil and Political Rights. An reklamo nakapokus sa tulong isyu:

• An pauruutrong pagpaapod na ini sa mga nagsayumang magsuldados huli sa konsiyensiya asin an pauruutrong pagpadusa sa sainda malinaw na minimidbid sa internasyonal na ley na sarong pagbalga sa deretso nin patas na pagbista.

• An dakul na beses na pagpaapod para sa pagsasanay sa militar asin an sunod-sunod na pagdemanda nagpapatunay sa kagustuhan kan mga opisyal kan Estado na ipirit an pagserbisyo sa militar. An daing pundong pagdemanda ki Mr. Shin nakaapektar na marhay sa buhay niya; sarong mapanghamak na padusa an pagmenos saka an ibilang na krimen an pagsunod niya sa saiyang konsiyensiya na kauyon kan saiyang relihiyon.

• Huling an pagsayuma ni Mr. Shin na magsuldados nakabasar sa saiyang relihiyosong mga paniniwala, irineklamo niya na binalga an saiyang deretso sa katalingkasan sa relihiyon asin konsiyensiya.

Naglalaom si Mr. Shin na magigin pabor sa saiya an resulta kan isinangat niyang reklamo huling pauruutrong nagdesisyon an Committee na dapat igalang kan South Korea an deretso kan saro na magsayumang magsuldados huli sa konsiyensiya kaini. * Naglalaom siyang magkakaigwa nin desisyon na matao nin espesyal na atensiyon sa mga arog niya na kabilang sa military reserve force. Sinabi ni Mr. Shin: “Dai ko pinagbabasulan an ginibo kong paninindugan sa sakong mga relihiyosong prinsipyo asin konsiyensiya, pero kinokondenar ko an bakong makatanusan na pagtratar sa sako. Naglalaom ako na mimidbidon kan gobyerno nin South Korea an deretso nin saro na magsayuma sa sarong serbisyo para sa nasyon kun iyan dai itinutugot kan saiyang konsiyensiya.” Arog man kaiyan an sabuot kan mga Saksi ni Jehova sa South Korea asin sa bilog na kinaban.