Kan Hunyo 28, 2018, sa inot na pagkakataon sa kasaysayan kan South Korea, idineklarar kan Konstitusyonal na Korte na bako suno sa konstitusyon an sarong seksiyon kan Military Service Act (MSA) kan Korea, huling dai iyan nagtatao nin alternatibong serbisyo para sa mga habong magsuldados huli sa konsiyensiya. An mahalagang marhay na desisyon na iyan an mabaliktad sa 65 taon nang palisiya nin pagbilanggo sa mga habong magsuldados huli sa konsiyensiya base sa MSA.

Puon 1953, labing 19,300 na sa mga tugang niyato an nasentensiyahan nin suma total labing 36,700 na taon sa bilangguan. Pinagin posible kan desisyon kan Konstitusyonal na Korte na maiaplikar na ngunyan kan Korte Suprema kan Korea an desisyon na ini sa espesipikong mga kaso na kalabot an mga habong magsuldados huli sa konsiyensiya. Dugang pa, obligado ngunyan an mga lehislador sa Korea na magpaluwas nin alternatibong serbisyo para sa mga habong magsuldados huli sa konsiyensiya nin dai malampas sa petsang Disyembre 31, 2019.

Gabos kita nakikiugma sa satong mga tugang sa Korea huling naestablisar na an pundasyon na matapos sa dakul na taon nang inhustisya.—Talinhaga 15:30.