Kan Huwebes, Agosto 30, 2018, an gabos na huwes kan Korte Suprema kan South Korea nagsagibo nin bukas sa publikong pagdangog sa kaso kan tulong Saksi ni Jehova na nagsasayumang magserbisyo sa militar huli sa saindang konsiyensiya. Nagin mainit an bukas sa publikong debate mapadapit sa haloy na kasaysayan nin pagpreso sa mga nagsasayumang magserbisyo, mala ta inabot nin apat na oras su pagkuwestiyon kan 13 gabos na huwes sa mga abogado kan mga Saksi asin sa iba pa mapadapit sa isyu. Halawig na pinag-ulayan kan mga huwes an makasaysayan na desisyon kan Konstitusyonal na Korte na ilinuwas kan Hunyo 28, 2018, na nagbubuot sa lehislatura kan Korea na mag-implementar nin alternatibong serbisyo para sa mga nagsasayumang magsuldados huli sa konsiyensiya imbes na ipreso an mga ini bilang kriminal. Hinagad kan mga abogado na ideklarar kan Korte na daing sala an tulong tugang niyato. Magseserbi iyan na makusog na basehan na magtataong linaw kun ano an dapat na magin desisyon kan mas hababang mga korte sa labing 900 na kaagid na kasong nakabinbin pa. Nasa Korte Suprema na ngunyan kun nuarin asin kun paano ninda dedesisyunan an tulong kasong iyan na pig-urulayan ninda durante kan pagbista.

May lubos na pagtitiwala, kami kaiba kan labing 100 na maimbod na tugang niyatong nakapreso pa, padagos na maghahalat sa Diyos kan satong kaligtasan.—Miqueas 7:7.