Kan Setyembre 7, 2022, ilinuwas kan United Nations Human Rights Committee (CCPR) an sarong mahalagang desisyon may koneksiyon sa bakong marahay na pagtrato kan Tajikistan sa mga Saksi ni Jehova. Kan Hulyo 7, 2022, nagdesisyon an CCPR apabor sa Mga Saksi ni Jehova mapadapit sa kaso ni Adyrkhayev v. Tajikistan. An kasong ini manungod sa pagsayuma kan Tajikistan na legal na midbidon an Mga Saksi ni Jehova asin sa ginibo kaining pagbabawal sa saindang mga aktibidad.

Labing 50 taon nang isinasagibo kan mga Saksi ni Jehova an saindang pagsamba sa Tajikistan. An Religious Association of Jehovah’s Witnesses (RAJW) legal na nairehistro kan 1994. Pero, kan Oktubre 11, 2007, kinanselar kan Ministry of Culture an rehistro kan Mga Saksi ni Jehova asin ipinagbawal an saindang pagsamba. Ipinaluwas kan gobyerno na ekstremista an paghuhulit kan mga Saksi ni Jehova, an pagsayuma nindang magsuldados dahil sa saindang pagtubod, asin an paniniwala ninda na sinda an tunay na relihiyon. Pauruutrong pinurbaran na irehistro giraray an RAJW, pero sa kada pagpurbar ninda dai iyan inaaprubaran.

Sa dai pa sana nahahaloy na desisyon kan CCPR, sinabi ninda na ilegal an pagbabawal kan Tajikistan sa Mga Saksi ni Jehova. Sinambit ninda na bakong balido an “gabos na itinaong rason” kan Tajikistan para ipangatanusan an pagbabawal ninda sa RAJW asin pagsayuma nindang irehistro giraray iyan.

Sinambit man kan CCPR na an pagsayuma kan gobyerno kan Tajikistan na irehistro giraray an RAJW nagresulta nin “mga pag-aresto, pagdetenir, pag-usisa, paghalughog sa mga harong, pambubugbog, pagkumpiskar nin relihiyosong mga babasahon, pati man pagdeportar sa [saro sa] mga Saksi ni Jehova.” Dahil sa maraot na mga pagtratong ini, nagdesisyon an CCPR na nabalga an deretso kan mga Saksi ni Jehova sigun sa United Nations International Covenant on Civil and Political Rights.

Ipinagbuot kan CCPR sa Tajikistan na konsideraron giraray an pagparehistro kan Mga Saksi ni Jehova asin magbayad nin danyos sa mga nabalga an deretso. Sinabihan man an gobyerno kan Tajikistan na “obligasyon ninda na gibuhon an gabos na kinakaipuhan na lakdang tanganing malikayan na mautro giraray an kaparehong mga pagbalga.”

An desisyon kan CCPR puwedeng magkaigwa nin epekto sa kaso ni Brother Shamil Khakimov, 71 anyos, na napreso puon pa kan Pebrero 2019 huli sa saiyang matuninong na pagsagibo kan saiyang pagsamba. An legal na basehan sana kan mga awtoridad sa Tajikistan sa pag-arestar asin pagpreso saiya iyo an ipinautob na pagbabawal sa Mga Saksi ni Jehova.

Linalauman na an desisyon na ginibo kan CCPR maresulta sa pagkaigwa nin katalingkasan sa pagsamba kan mga Saksi ni Jehova sa Tajikistan. Ipinapamibi ta na lugod na bendisyunan ni Jehova an padagos na paghihinguwang ‘idepensa an maugmang bareta’ asin “makua an legal na deretso para ihulit iyan.”—Filipos 1:7.