BANGKOK—Ginagamit kan mga opisyal kan gobyerno sa Thailand an mga literatura na ipinupublikar kan Mga Saksi ni Jehova bilang kabtang kan saindang inisyatiba sa bilog na nasyon na matukduan an mga opisyal kan gobyerno manungod sa mga temang arog kan marahay na pagpadakula sa mga aki, pag-ebitar sa mga kadahasan sa pamilya, asin pagpauswag kan mental saka pisikal na salud. Sa bulan na ini, tulong taon nang ginagamit kan mga opisyal sa Thailand an mga publikasyon kan mga Saksi para makatabang na masolusyunan an mga problema kan sosyedad.

An inisyatibang ini nin pagtutukdo sa bilog na nasyon kan gobyerno nin Thailand isinasagibo sa labing 8,700 na pangrehiyon na Community Learning Centers sa nasyon. Dugang pa, nag-establisar an gobyerno nin 11 Community Development Learning Centers (CDLC) na nakapokus sa pagsasanay sa mga lider kan komunidad. Si Chaiwat Saengsri, nasa tahaw kan ritrato sa itaas, an direktor kan CDLC sa probinsiya nin Nakhon Nayok na nasa norteng-sirangan kan Bangkok. Nagsabi siya: “Hanga ako sa mga Saksi ta malinaw talaga kun ano an katuyuhan kan saindang mga ginigibo. Iyan iyo na tanganing tabangan an mga komunidad asin an mga tawo na mas mamidbid an Kaglalang. Pareho an katuyuhan mi na matabangan an samong komunidad na magkaigwa nin halangkaw na mga pamantayan para magkaigwa sinda nin matuninong saka mas marahay na buhay.” Sabi pa niya: “Halimbawa, an artikulo sa magasin na Awake! na ‘How to Avoid Hurtful Speech’ igwa nin tema na hinihinguwang itukdo kan Ministry of Social Development and Human Security sa mga lider kan komunidad. Nagin dakulang tabang nanggad sa samo an artikulong ini sa pagsasanay sa sainda.” Pagkatapos, sinabi ni Mr. Chaiwat sa mga Saksi na magdara nin mga publikasyon sa panahon kan SMART Leader seminar, na diyan nagtiripon an 100 na lider nin komunidad saka 20 instruktor hali sa 28 probinsiya para magsanay na mapauswag an saindang panginginot saka an komunidad. Kataid ni Mr. Chaiwat sa ritrato an mga Saksi.

An tagapagtaram kan Mga Saksi ni Jehova sa Thailand na si Anthony Petratyotin, nagsabi: “Nauugma kaming maaraman na ginagamit sa marahay na paagi kan mga lider nin komunidad an basado sa Bibliyang mga suhestiyon na mababasa sa samong mga publikasyon. Padagos ming tatawan nin literatura an mga opisyal, kasabay kan panginot ming paagi nin pagdistribwir sa samong mga literatura—an samong pampublikong paghuhulit.”

Media Contacts:

International: David A. Semonian, Office of Public Information, +1-845-524-3000

Thailand: Anthony Petratyotin, +66-2-375-2200