Minilyon sa mga Kristiyano an nagsayumang magkapot nin armas huli sa saindang konsiyensiya—asin iginagalang iyan kan dakul na nasyon. An UN Human Rights Committee nagdesisyon na tawan man nin siring na libertad an mga taga Turkey.

Sa desisyon na ginibo kan Komite kan Marso 29, 2012, nagdesisyon ini pabor sa duwang taga Turkey na si Cenk Atasoy saka Arda Sarkut. Sinda mga Saksi ni Jehova na nagsayumang magsuldados huli kan saindang relihiyosong mga paniniwala.

Pirang beses na nagpadara nin petisyon si Mr. Atasoy asin Mr. Sarkut sa mga ahensiya kan gobyerno tanganing ipaliwanag an saindang desisyon, asin ipaabot na andam sindang gumibo nin ibang serbisyo para sa gobyerno, bako lang an ano man na serbisyo may koneksiyon sa militar. Minsan siring, padagos pa man giraray sindang ginigipit. Pagkatapos na takuton kan militar na kakasuhan an unibersidad na pinagtatrabahuhan ni Mr. Sarkut bilang assistant lecturer, natanggal siya sa trabaho.

Sigun sa desisyon kan Komite, sinabi ninda na an deretso na sayumahan an paglaog sa serbisyo militar “kaiba sa deretso nin libertad sa pag-isip, pagpili sigun sa konsiyensiya asin sa relihiyon” na yaon sa Artikulo 18 kan International Covenant on Civil and Political Rights. Saro pa, sinabi kan Komite na “may deretso an siisay man na matawan nin eksemsiyon sa obligadong pagserbisyo militar kun an indibidwal magsayuma huli sa saiyang relihiyon o mga paniniwala.”

An desisyon na ini nangyari pagkatapos tulos kan duwang magkakonektar na desisyon na ginibo kan European Court of Human Rights. Sa saro sa mga desisyon na iyan, sinambit kan Korte na “an kawaran nin alternatibong serbisyo bilang karibay sa pagserbisyo militar sa Turkey sarong pagbalga sa deretso nin saro na magsayuma huli sa konsiyensiya,” na ginagarantiyahan kan European Convention on Human Rights.

An pagsayuma na magsuldados ginigibo na kaidto pang panahon kan magpuon an Kristiyanismo. Sa libro ni E. W. Barnes na The Rise of Christianity, sinabi niya: “Kun maingat na sisiyasaton an gabos na makukuang impormasyon, masasabing puon pa kan panahon ni Marcus Aurelius [Romanong emperador puon 601 sagkod 180 C.E.], mayong Kristiyano an nagin suldados; asin mayong suldados na nagdanay sa serbisyo militar pagkatapos na magin Kristiyano.”