Kan Pebrero 24, 2022, pinunan na sakupon kan Russia an Ukraine. May labing 129,000 na Saksi ni Jehova an nakaistar sa Ukraine, kaiba na an mga aki ninda. Nag-organisar an sangang opisina duman nin 27 Disaster Relief Committee (DRC) para makapagtao nin tabang sa mga tugang niyato. Apuwera kaiyan, bilang pagpahiling nin Kristiyanong pagkamuot, ginibo kan mga tugang an gabos na magigibo ninda para makatao nin praktikal asin emosyonal na tabang sa kada saro asin sa saindang kapwa sa panahon na ini nin krisis.

Kadaklan sa mga tugang nagdanay sa Ukraine, pero may mga nagdesisyon na maghali sa nasyon. An mga nagharali naipit sa halabang pila na uminabot nin mga 30 kilometros, asin naghalat sinda nin sagkod sa tulo o apat na aldaw bago nakaabot sa customs. May mga tugang na hinanap sinda sa pila para tawan sinda nin kakanon, inumon, saka praktikal na tabang. Kan makabalyo na sinda sa mga border asin nakalaog na sa pagtaraid na mga nasyon, sinabat sinda kan iba pang mga Saksi na may darang mga karatula na jw.org. Andam an mga tugang na rangahon asin tabangan sinda.

• Nakakamundo, kan Marso 1, 2022, sarong bungog na brother na taga Kharkiv an nagadan asin an saiyang agom seryosong nalugadan huli sa mga pagbomba

• 3 pang sister an nalugadan

• Labing 5,000 na tugang an naghali sa saindang mga harong

• 2 harong an nagaba

• 3 harong an naraot nin grabe

• 35 harong an dai gayong naraot

• 2 Kingdom Hall an naraot

• Dakul na tugang an nawaran nin kuryente, heater, serbisyo sa telepono, asin tubig

• 27 DRC an inorganisar sa Ukraine

• 867 tugang an tinabangan kan DRC na makahanap nin dadagusan sa mas ligtas na mga lugar

• Hinihinguwa kan DRC na maitao an kinakaipuhan na mga suplay, arog kan kakanon saka tubig

An mga numero sa itaas inisyal na report pa sana.

Ipinapamibi ta na lugod an satong mga tugang padagos na magkaigwa nin kadunungan asin pakasabot para makayanan an masakit na mga kamugtakan na ini mantang ipinapahiling ninda an pagkamuot na sa-magturugang.—Talinhaga 9:10; 1 Tesalonica 4:9.