Sa tabang ni Jehova, natatagalan ni Sister Liudmyla Mozul asin Kateryna Rozdorska an kulog saka kamunduan na resulta kan giyera. An mga agom ninda, na si Petro Mozul asin Dmytro Rozdorskyi, an kabilang sa inot na mga Saksi ni Jehova na nagadan dahil sa giyera sa Ukraine. Makamumundo, sagkod ngunyan, 34 tugang niyato an nagkagaradan huli sa giyera.

Nabawtismuhan si Petro asin si Liudmyla kan 1994. An mag-agom 43 na taon nang kasal.

“Aroaldaw nagpapaabot nin nakakarangang mga tataramon an mga tugang,” an sabi ni Liudmyla. “Sige sindang apod. Napahibi man ako kan surat nin pakikidumamay na hali sa sangang opisina sa Ukraine.”

Nagpuon an giyera kan Pebrero 24, 2022. Naglilingkod si Petro bilang ministeryal na lingkod sa sarong sign-language congregation. Nagadan siya kan nagdudulag sinda kan saiyang pamilya sa Kharkiv dahil sa matinding mga pambobomba kan Marso 1, 2022.

Kan aldaw na idto, pakalihis nin pirang aldaw na pambobomba, may nagralayog na mga fighter jet na nagpuon na mag-atake sa siyudad. Dinara kan pamilya an nagkapirang kaipuhan ninda saka naghali pakalihis nin 30 minutos. Nakasakay sa sarong awto si Petro saka si Liudmyla. An aki ninda, si Oleksii, saka an agom niya, si Maryna, yaon man sa saro pang awto. “Nagbibiyahe kami sa tinampo na harani sa sarong residential area kan maghulog an mga fighter jet nin mga bomba sa palibot mi,” an sabi ni Liudmyla. “Talagang nagyugo-yugo su awto dahil sa mga pagsabog.”

Biglang kinabig ni Petro, na 67 anyos, an manibela para dai mabangga an awto ni Oleksii, pero nairido siya nin grabe. Dinara siya saka si Liudmyla sa ospital kun sain paghaloy-haloy nagadan si Petro. Nalugadan an tabay saka an tulak ni Liudmyla kan mga nagtaralsik na metal hali sa pagsabog. Dai man naano si Oleksii asin si Maryna. Naaraman lang ni Liudmyla na nagadan si Petro tulong aldaw pakaluwas niya sa ospital.

Si Liudmyla nagsabi: “Pag mas iniisip ko an kabuutan ni Jehova saka an magayunon na katuyuhan niya, mas nakakamati ako nin panglaog na katuninungan. Sigurado ako na mahihiling ko giraray an agom ko sa bagong kinaban, asin gustuhon ko nang umabot an maugmahon na panahon na iyan.”

Walong taon nang kasal si Dmytro asin si Kateryna. Kan kaulay siya kaini hali sa pigtatrabahuhan kaini, an huring sinabi kaini sa saiya iyo na, “Papuli na ako.”

Pakalihis nin pirang oras, kan Marso 8, 2022, sarong katrabaho kaini an nag-apod ki Kateryna tapos nagsabi na nakatungtong nin bomba si Dmytro asin dinara ini sa ospital. Nagadan siya limang oras pagkatapos kan pag-operar sa saiya.

Kan maaraman ni Kateryna na gadan na si Dmytro, sinabi niya: “Kan bangging idto, bako lang basta kinaputan ni Jehova an kamot ko, kinarga niya ako kan saiyang mga takyag. Namatian ko na haranihon sa sako si Jehova.”

Si Dmytro, na 28 anyos, nabawtismuhan kan 2006 asin naglilingkod bilang elder sa Donetsk Region kan Ukraine.

Dai nahaloy pagkalubong ki Dmytro, nagbiyahe si Kateryna nin 12 oras pasiring sa mas ligtas na lugar sa Ukraine. “Nakaresibi ako nin mga pampakusog hali sa mga tugang sa gabos na lugar sa Ukraine asin sa iba pang nasyon. Grabeng pagkamuot an ipinamati ninda sa sako, na nakabawas sa kulog na namamatian ko.”

Sinabi pa niya: “Nararanga man ako pag naghuhulit. . . . Pag magabaton na an pagmati ko, nagsasambit ako nin mga teksto sa Bibliya arog kan Filipos 4:6, 7.”

Nagtitiwala kita na si Jehova padagos na magigin gikanan nin kusog asin pagranga para sa satong namumutan na mga tugang na nagadanan nin mahal sa buhay dahil sa giyera sa Ukraine.—Salmo 61:1-3.