Rinibong Saksi ni Jehova an yaon pa man giraray sa mga lugar sa Ukraine na igwa nin giyera na nagpuon kan Pebrero 24, 2022. Huli sa tunay na pagkamuot na sa-magturugang, sarong grupo na kompuwesto nin 21 brother hali sa mga siyudad nin Kremenchuk asin Poltava sa Ukraine an andam na magpasiring sa mga lugar nin giyera para iligtas an saindang mga kapagtubod asin magdara nin mga ayuda.

Nagbiyahe an mga brother na ini nin 80 beses sa laog nin anom na semana, na minaabot nin mga 50,000 kilometros sa mga lugar na grabe an ralaban arog kan Kharkiv, asin nailigtas ninda an haros 400 na tugang.

Sagkod sa ngunyan, nakahatod na sinda nin 23 na toneladang kakanon, saka nin mga bulong, gasolina, asin iba pang mga suplay. Bago ninda punan an kada pagbiyahe, maingat na pinaplano kan mga brother na ini an saindang ruta, asin pighihinguwa nindang likayan an mga lugar na igwa nin nangyayaring mga ralaban. An sarong biyahe puwedeng abuton nin haros 19 oras dahil kaipuhan nindang magpundo sa mga checkpoint kun sain pig-iinspeksiyon an laog kan mga awto ninda.

Mantang nagbibiyahe sinda, igwa man nin mga eroplanong panggiyera na nagraralayog sa mga lugar na pig-aagihan ninda. Nahihiling kan mga brother an mga edipisyo na pigbomba saka an warasak na mga tangke saka mga awto. Kun minsan, namamatian ninda an pagkunog-kunog kan daga pag may mga bombang nagsabog harani sainda.

Kan Abril 2, 2022, pighahanda ni Roman an mga suplay na ihahatod sa mga tugang sa Kharkiv kan magpuon na mag-uran nin mga missile sa mga tinampo. Nagpaili siya sa sarong edipisyo na harani sa saiya. Pakalihis nin 30 minutos, nahiling niyang binomba su tinampo na aagihan niya kutana.

Ini an sinabi ni Volodymyr, na saro sa mga nagboluntaryo na magmaneho, manungod sa pagigin peligroso kan sitwasyon: “Parati kaming namimibi ki Jehova para sa kadunungan tanganing makagibo kami nin madunong na mga desisyon.”

Si Oleksandr saka an saiyang agom, na si Valentyna, nakaistar sa Kharkiv kaiba an saindang may edad nang mga magurang. Kan naggagrabe na an giyera, nakakahiling sinda sa bintana nin mga pagsabog na mga 100 metros sana an rayo sa harong ninda. Dahil mayo sindang awto, dai makadulag an pamilya ninda.

Dangan nag-arabot an mga brother para iligtas sinda. “Namibi kami ki Jehova, asin nagpasalamat saiya ta may mga tugang na nagtabang samo,” an sabi ni Oleksandr.

Si Vasyl saka an agom niya, na si Natalia, pati an tulo nindang aki nagtago nin pirang aldaw sa basement kan saindang harong. Kan Pebrero 28, 2022, sarong bomba an suminabog harani sa harong ninda kun sain sinda nagtatarago. Naraot kan pagsabog na iyan an harong ninda. Nagigirumduman ni Vasyl an nakakabungog na pagsabog asin nahiling niya na nagkaparalsok an gabos na ilaw sa basement.

Kan medyo napurupundo an ralaban, nagbalyo an pamilya ninda sa saro pang basement sa kataid na edipisyo. Kan Marso 3, 2022, nahanap kan mga brother an pamilyang ini asin pig-ebakwar sa mas ligtas na lugar sa nasyon.

Ilinadawan ni Vasyl an namatian niya kan mailigtas an pamilya ninda asin makaabot sinda sa mas ligtas na lugar: “Nagpapasalamat kaming marhay ki Jehova. Sa kainot-inuting pagkakataon, pakalihis nin garo baga dakul na semana, nakapamanggi kami nin tuninong asin dai naghahadit sa kaligtasan kan mga aki mi.”

Sinabi kan saro sa mga drayber na si Oleksandr na ipinapahiling kan ginibong mga pagliligtas an pagkasararo kan banwaan ni Jehova. “Nakatabang ini sako na marealisar kun gurano nagmamakulog si Jehova sa saiyang mga lingkod,” an sabi niya. “Ugmahon akong marhay pag nahihiling ko sa lalawgon kan mga tugang na talagang nagpapasalamat sinda.”

Nagpapasalamat kita sa satong mga brother na ini na makusog an buot, asin ipinapamibi niyato na lugod bendisyunan ni Jehova an saindang mga pagsasakripisyo.—Roma 12:10.