Haros 47,000 na mga Saksi ni Jehova an napiritan na maghali sa saindang harong dahil sa nagpapadagos na giyera sa Ukraine. Dakul an nagdulag pasiring sa mas ligtas na lugar sa nasyon, kun sain sinda tinatawan kan saindang mga kapagtubod nin mga bado, kakanon, madadagusan, asin iba pang mga pangangaipo. Dawa ngani an mapag-istimar na mga tugang na ini nasasakitan man sa pagbuhay, gikan sa buot nindang tinatabangan an saindang mga tugang na nangangaipo.

Si Olha sa Uman, Ukraine, saka an saiyang bakong Saksing agom nagpadagos nin mga tugang sa saindang harong. Uminabot nin 300 na parahayag an pinadagos ninda sa inot na duwang bulan kan magpuon an giyera. Dakul sa mga tugang na ini an nakidagos sa sainda nin sarong banggi sana bago magpadagos sa saindang pagbiyahe. Sa parati, sa kamatangaan nin banggi naipapaaram ki Olha na may maarabot na mga tugang. Sarong beses, 22 na tugang an pinadagos ni Olha. Nakatao man nin oportunidad an pangyayaring ini sa 18 anyos na aki ni Olha na si Stanislav na magin bukas-palad. Sa parati, sa salog siya nagtuturog tanganing makaturog an mga tugang sa saiyang kuwarto.

“Nauugma akong marhay ta dawa sa masakiton na panahon na ini, nagigibo kong tabangan an mga lingkod ni Jehova,” an sabi ni Olha. “Nagtatao iyan sako nin dakulang kaugmahan.”

Uminabot nin 200 na Saksi an pinadagos ni Andriy asin kan agom niyang si Liudmyla sa laog nin limang semana. Sarong beses, nagpadagos sinda nin 18 katawo sa sarong banggi sana. “Arog kan instruksiyon samo kan sangang opisina, igwa kaming suplay nin mga kakanon. Ginamit mi iyan para pakakanon an mga tugang nin saro may kabangang semana,” an sabi ni Andriy. “Nagwawalat an mga tugang nin mga kard na may kaibang kuwarta, asin ginagamit mi iyan para magbakal nin ano man na kakanon na mababakal mi para sa sunod na mga makikidagos. Nagtao man an Disaster Relief Committee nin kakanon, kaya dai kami nagkulang nin ano man.”

Kan Marso, si Vita na taga Ivano-Frankivsk naghali sa saiyang apartment asin nakiistar sa saiyang tugang tangani na magamit kan mga Saksi na naghali sa saindang harong an saiyang apartment. “Dai ko iyan iniisip na sakripisyo kundi kapahayagan nin pagkamuot,” an sabi ni Vita. “Nagtatao sako nin kaugmahan an ginigibo ko para sa mga tugang. Saro kitang pamilya gabos.”

Nakaistar si Natalia sa Ternopil kaiba kan saiyang agom asin kan aki nindang babayi na si Habriela. Gabos sinda nawaran nin trabaho kan magpuon an giyera asin kinaipuhan nindang gastuson an kuwarta na tipon ninda para magbakal kan saindang mga pangangaipo. Sa ibong kaiyan, andam pa man giraray nindang padaguson an sarong sister saka an disabled kaining aking babayi.

“Nagirumduman ko an eksperyensiya kan sarong sister sa Africa na kapos sa materyal pero nagpadagos pa man giraray nin 14 tugang para sa kumbensiyon, asin mayo nin siisay man na nagkulang nin ano man,” an sabi ni Natalia. Ipinaliwanag niya na nakatabang saiya an eksperyensiyang ini na inuton an kapakanan kan iba.

Dawa nasa masakit na kamugtakan, an mga tugang niyato sa Ukraine may kadunungan na nagtitiwala ki Jehova mantang ipinapahiling ninda an “pagigin mapag-istimar.”—Roma 12:13.