Kan maggrabe an ralaban sa Donetsk Region sa Ukraine, pirang beses na nagbiyahe si Brother Mykola Bozhedomov pasiring sa Kramatorsk para tabangan an pinakadakul na mapupuwede na makahali sa mga lugar na grabe an ralaban.

Pero, kan Abril 8, 2022, nagadan si Mykola kan bombahon an istasyon nin tren sa Kramatorsk, Donetsk Region.

Apuwera sa 58 anyos na si Mykola, saro pang sister an kaiba sa labing 50 nagadan. Saro man na brother an kaiba sa labing 100 na nairido. Sinabi kan mga tugang na nakaligtas sa pag-atake na nakadangog sinda nin duwang makusugon na pagsabog na sinundan nin pagtaralsik nin mga pidaso nin metal.

Si Nina, na agom ni Mykola sa laog nin 32 na taon, nagsabi: “Pirming iniinot ni agom an kapakanan kan iba. Gustong-gusto niyang tumabang lalong-lalo na sa mga may edad na saka may hilang na mga tugang. Pero sa kada pagbalik niya sa Kramatorsk, mas nagigin delikado an sitwasyon. Huring pagduman niya na kuta idto.”

Sabay na nabawtismuhan an duwa kan 1997. Maimbod na naglingkod si Mykola bilang elder sa laog nin dakul na taon. Daing pundo an mga tugang sa pagpahiling nin pagkamuot saka pag-alalay ki Nina. Sinabi niya, “Nakakatabang sako an mga pagranga ninda na makayanan an masakiton na panahon na ini.”

Sinabi man ni Nina na naranga siya kan Kasuratan, partikular na an Isaias 40:28-31. “Tinatabangan ako ni Jehova na magkaigwa nin panibagong kusog,” an sabi ni Nina. “Namamatian ko na talagang namumutan akong marhay ni Jehova. Dati nababasa ko lang sa mga publikasyon ta an arog kaiyan na pagkamuot, pero ngunyan namamatian ko na mismo iyan.”

Ipinapamibi niyato si Nina asin an gabos na nagadanan nin mga mahal sa buhay dahil sa giyera. Aram ta na padagos sindang aalalayan ni Jehova.—Salmo 20:2.