Dai nabawasan an kaigutan kan mga tugang sa Ukraine sa pagsuporta ninda sa saindang mga kapagtubod. Padagos sindang nagpapahiling nin bakong makasadiring pagkamuot sa lambang saro.

Si Sister Olena 81 anyos na. Kan Hunyo 6, may missile na tuminama mga pirang metro sana an rayo sa saiyang harong. Nagaba kan missile an harong kan kataid niya, asin nakagibo iyan nin kalot sa daga na pitong metro an rarom. Makusugon su pagsabog kaya nadestrosong marhay an harong ni Sister Olena.

Sinabi niya: “Nagtuturog ako, tapos may buminagsak na lanob harani sa may payo ko. Napano an duros nin maitom saka mahibog na alpog. Nakawararak an pasang mga salming saka an mga ladrilyo. Nagpasalamat ako ki Jehova na buhay ako.” An mga tugang na harani duman nagpasiring ki Sister Olena mga pirang minuto pagkatapos kan pagsabog, kaiba an sarong brother na nadestroso man na marhay an harong. Sinabi pa ni Sister Olena: “Kan mag-abot an mga tugang, mayo sindang masabi. Napakusog ako kan presensiya ninda. Marahayon nanggad na yaon sinda.”

Si Serhii, sarong elder na regular na nagbibisita ki Sister Olena kaiba an mga hoben sa kongregasyon ninda, nagsabi: “Kan naaraman ko na may pagsabog harani sa harong ni Sister Olena, takuton ako saka haditon. Kan mahiling ko na dai man siya gayong nagrabe kundi nagkaigwa sana siya nin dikit na mga bakros, saka sana nabawasan su paghadit ko. Makangangalas ta an inot na pighahanap ni Sister Olena pagkatapos na madestroso an saiyang harong iyo an mga literatura sa Bibliya na naresibi niya mga pirang aldaw pa sana an nakaagi.”

Nakakaugma, nahanapan siya nin bagong harong kan mga kapamilya niya. Padagos na nagtatao an kongregasyon nin praktikal na mga tabang, asin aroaldaw na kinokontak kan mga elder si Sister Olena. Tinawan siya kan mga tugang nin hearing aid para makinabang siya sa mga pagtiripon kan kongregasyon. Sinabi niya: “Kun minsan pagmati ko dai akong maginibo, pero an mga pagtiripon nagtatao sako nin kusog. Parati akong inaapudan kan mga kapagtubod ko, asin nagpapasalamat akong marhay diyan.”

Inistorya kan sarong mag-agom an eksperyensiya ninda kan nagtatago sinda sa basement nin Kingdom Hall kaiba an 200 na iba pang parahayag. An agom na babayi nagsurat: “Napahanga ako lalo na sa pag-asikaso kan mga mamumuton na elder. Nagirumduman ko sa sainda si David, na isinapeligro an buhay tanganing labanan an sarong leon saka uso para iligtas an mga karnero. An mga elder duman sa basement kinaipuhan man na isapeligro an saindang buhay tanganing makakua nin kakanon saka tubig, pati nin gasolina para igwa kami nin ilaw. Huli kaiyan, nakapagsagibo kami nin mga pagtiripon kan kongregasyon asin mga pagtiripon bago magluwas sa langtad. Dawa grabe an mga pagbomba, regular na binibisita kan mga elder an mga tugang na dai naghali sa saindang harong. Dinadarahan ninda sinda nin kakanon saka tubig asin rinaranga sinda. Mas nagrarom an paggalang ko sa mga elder na idto. Bago an mga pangyayaring ini, aram ko na mga paratukdo sinda saka parahulit, pero ngunyan minamansay ko sinda bilang masasarigan na mga pastor. Nagpapasalamat akong marhay sa saindang halimbawa nin kusog nin buot, pagmalasakit, asin pagkamasasarigan!”

An mga parahayag sa sarong kongregasyon sa Ukraine nagsurat sa sangang opisina sa Ukraine manungod sa mga nanginginot sa gibuhon na pag-ayuda: “Nagpapasalamat kaming marhay. Napahanga kami kun paano kami inaasikaso ni Jehova paagi sa satong mga kapagtubod. Talagang naeksperyensiyahan mi an mga sinabi ni Jesus: ‘Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.’”—Juan 13:35.

Sagkod kan Hunyo 21, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 42 na tugang an nagadan

• 83 na tugang an nalugadan

• 31,185 tugang an napiritan na maghali sa saindang harong

• 495 harong an nagkagaraba

• 557 harong an nadestroso nin grabe

• 1,429 harong an nadestroso nin dikit

• 5 Kingdom Hall an nagkagaraba

• 8 Kingdom Hall an nadestroso nin grabe

• 34 Kingdom Hall an nadestroso nin dikit

• 27 Disaster Relief Committee (DRC) an nagtatabang sa Ukraine

• 52,348 indibidwal an tinabangan mismo kan mga DRC na makahanap nin mas ligtas na dadagusan

• 23,433 na tugang an nagdurulag pasiring sa ibang mga nasyon asin tinatabangan kan mga kapagtubod niyato