Sa bilog na Ukraine, an pagbalik sa pampublikong ministeryo nagdara nin kaugmahan asin positibong mga resulta. Irineport kan mga paraataman nin sirkito saka kan mga elder na dakul na tawo an naugma na mahiling giraray an satong mga literature cart asin may mga nagsabi pa ngani na pighanap-hanap ninda an mga Saksi ni Jehova.

Si Tatiana na taga Serhiivka Congregation sa Odesa Region nagdesisyon na bisitahon an mga nakaulay niya bago an pandemya. Sinabi niya, “Sa puon pa lang, nahiling ko na an pagbendisyon ni Jehova sa satong paghihinguwa na magbalik sa ministeryo.” Sarong beses, binisita niya an sarong babayi na nagsayuma dati na mag-adal nin Bibliya bago an pandemya. Sa ngunyan, gustong-gusto na kan babayi na pag-ulayan an mga tema sa Bibliya asin tulos-tulos siyang nag-ako nin pag-adal sa Bibliya. Nagsabi si Tatiana, “Kaipuhan kong bisitahon an gabos kong dating dinadalaw liwat tapos alukan nin pag-adal sa Bibliya an kada saro sa sainda!”

Si Yevheniy asin Lilia dating mga taga Mariupol. Kinaipuhan nindang maghali sa saindang harong, asin nakaistar na sinda ngunyan sa mas ligtas na lugar sa Ukraine. Pareho sindang regular na nakikikabtang sa paghuhulit. Ipinaliwanag ninda na nakatabang sainda an paghuhulit na dai gayong pagparaisipon an mga problema. Sinabi ninda: “Aram mi na dai na makakabalik su dati ming buhay kaidto. Dipisilon na magpuon nin bagong buhay, pero aram mi na bakong halipot an kamot ni Jehova. Yaon sa sato an saiyang espiritu, asin handa an mga tugang na tabangan kami na magpuon nin bagong buhay sa sarong bagong lugar.”

Sa ibang parte kan nasyon, nagpapatotoo man an satong mga tugang paagi sa saindang marahay na mga gibo. Halimbawa, sarong grupo nin mga brother sa siyudad nin Mykolaiv an nagtabang sa sarong international humanitarian relief organization na hirahayon saka pakarhayon an sarong bodega na ginagamit sa pagtabang sa mga sibilyan. Hinirahay kan mga brother an water system, pig-ayos an mga estante, saka pigpakarhay an tonetoneladang mga gamit. Kan hilingon kan sarong representante kan humanitarian organization an mga ginibo ninda, napahibi siya. Sinabi niya, “Dai ko inaasahan na magigin arog kaiyan karahay an resulta.”

Dawa ngani nasa masakit na sitwasyon an satong mga kapagtubod sa Ukraine, namamatian ninda an kaugmahan na resulta kan pagdanay na aktibo sa ministeryo asin kan “paggibo nin marahay.”—Galacia 6:9.

Sagkod kan Hulyo 13, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 42 na tugang an nagadan

• 97 tugang an nalugadan

• 28,683 na tugang an napiritan na maghali sa saindang harong

• 524 harong an nagkagaraba

• 588 harong an nadestroso nin grabe

• 1,554 harong an nadestroso nin dikit

• 5 Kingdom Hall an nagkagaraba

• 10 Kingdom Hall an nadestroso nin grabe

• 36 na Kingdom Hall an nadestroso nin dikit

• 27 Disaster Relief Committee (DRC) an nagtatabang sa Ukraine

• 52,947 indibidwal an tinabangan mismo kan mga DRC na makahanap nin mas ligtas na dadagusan

• 23,863 na tugang an nagdurulag pasiring sa ibang mga nasyon asin tinatabangan kan mga kapagtubod niyato