Puon kan Hulyo 23 sagkod 31, may mga parahayag sa Ukraine saka sa iba pang mga nasyon kun sain sinda nagdurulag an nabawtismuhan sa 2022 na Pagmaigutan na Magkaigwa nin Katuninungan! na Kumbensiyon. Sagkod kan Agosto 2, may total na 1,113 taga Ukraine an nabawtismuhan. Sarong brother sa Ukraine an nagsabi: “Dawa an giyera dai kayang papunduhon an paggibo nin disipulo, arog kan ipinanuga ni Jesus: ‘Kaibanan nindo ako sa gabos na aldaw.’”—Mateo 28:20.

Nauugma kaming ireport an minasunod na mga eksperyensiya.

Si Natalia na taga Kreminna, Luhansk Region, 63 anyos na. Siya saka an duwa niyang aking babayi nagpuon na makipag-adal sa mga Saksi ni Jehova kan mga 1990. Nag-uswag sa espirituwal an duwa niyang aki asin nabawtismuhan, pero siya dai. Kan magpuon an giyera, iiniba si Natalia kan sarong pamilyang Saksi ni Jehova para magdulag pasiring sa mas ligtas na lugar. Pinaistar siya sa sarong Kingdom Hall sa Ivano-Frankivsk.

Sinabi ni Natalia: “Pagkatapos kan makatatakot na mga pambobomba, garo baga nalingawan ko nang magngirit. Pinahilingan ako nin tunay na pagkamuot kan mga tugang. Dai ko inaasahan an arog kaidtong pag-asikaso sa sako. Kan panahon na idto, napukaw an pagkamuot ko ki Jehova. Nagparabasa ako nin Bibliya, asin may sarong sister na nag-alok sako nin pag-adal sa Bibliya sa librong Mabuhay nin Maugma Sagkod Pa Man! Regalo siya ni Jehova sa sako.” Sinabi pa ni Natalia: “Maugmahon ako ngunyan ta bawtisado na ako bilang saro sa mga Saksi ni Jehova. Gusto kong mamuhay kauyon kan pinakanangungurog na pagbuot: an kamutan si Jehova na sakuyang Diyos nin ‘bilog kong puso asin bilog kong kalag saka bilog kong isip.’”—Mateo 22:37.

Si Olia na taga Cherkasy sarong dai pa bawtisadong parahayag kan magpuon an giyera. Kan Marso 6, nagdulag siya pasiring sa Poland kaiba an saiyang aking babayi saka makuapong babayi. Sinabi niya: “Mga go bag mi lang an dara mi pag-abot mi duman, pero inasikaso kaming tulo kan mga tugang. Nakakumbinsir sa sako an gabos na ini na nagkakasararo an organisasyon ni Jehova asin ginigiyahan kan saiyang espiritu. Pagkatapos na maeksperyensiyahan an gabos na iyan, nagin mas determinado ako na idusay an buhay ko ki Jehova. Tinabangan niya ako sa pinakamasakit na panahon kan sakong buhay, asin ngunyan gusto kong maglingkod sa saiya asin ipahiling sa saiya an sakong pasasalamat.”

Disiotso anyos si Yulia na taga Donetsk Region. Nagdakula siya sa sarong pamilyang Saksi pero dai pa siya nagdedesisyon na magpabawtismo. Inistorya niya an eksperyensiya niya na nangyari dai nahaloy pagkapuon kan giyera. Sabi niya: “Nakahigda ako kaidto sa salog, asin napag-isip-isip ko na ano man na oras puwede akong magadan. Nawasak an bilog na lugar na pig-iistaran kan pamilya mi, pero nakaligtas kami. Pagkatapos na maeksperyensiyahan ini asin mamibi saka maghurop-hurop kan mga kuwalidad ni Jehova, mas naparani ako sa saiya asin nawara an pagduwa-duwa ko sa kun baga dapat kong idusay an buhay ko ki Jehova. Paagi sa pagsimbag sa sakong mga pamibi, ipinahiling ni Jehova kun gurano siya kaharani sa sako. Dati may aram lang ako manungod sa Diyos, pero ngunyan namumutan ko na siya.” Nabawtismuhan si Yulia kan Hulyo 23.

Kan magpuon an giyera, an 11 anyos na si David nagdulag kaiba kan saiyang pamilya pasiring sa Germany. Nagin dai pa bawtisadong parahayag siya puon kan magnuwebe anyos siya. Ngunyan gustuhon niya nang maabot an mga pasuhan niya sa espirituwal. Sinabi niya: “Nagdesisyon ako na magpabawtismo dahil namumutan ko si Jehova asin gusto kong magin amigo niya. Kan bawtismuhan ako, napahibi ako sa kaugmahan dahil parte na ako kan magayunon na pamilya ni Jehova. Gustuhon ko na sabihon sa mga tawo an manungod ki Jehova asin an katuyuhan niya para sa katawuhan, kaya an sunod kong pasuhan iyo na magin payunir. Gusto ko man na paglingkudan an mga tugang sa kongregasyon mi asin naglalaom ako na sarong aldaw magigin ministeryal na lingkod ako. An pinakapasuhan ko iyo na makapaglingkod sa Bethel. Iyan an pangarap ko puon kan makabisita ako sa sangang opisina sa Lviv kan 2018.”

Si Olena na taga Kyiv nagin sarong dai pa bawtisadong parahayag kan 2011. Nagin inaktibo siya sa laog nin sampulong taon. Kan 2020, pigkontak siya kan mga elder sa kongregasyon asin tinawan kan brosyur na Bumalik Ka ki Jehova. Sinabi niya: “Ipinagpadagos ko an pag-adal sa Bibliya asin nagpuon giraray na mag-atender sa mga pagtiripon. Pero, paghaloy-haloy, nagpundo giraray ako. Mantang may giyera, sinimbag ni Jehova an mga pamibi ko, asin napag-isip-isip ko na iningatan ako ni Jehova, ipinahiling niya an pagkamuot niya sa sako, asin tinawan ako nin panglaog na katuninungan. Nagdulag ako pasiring sa Romania asin nakanumpong duman nin mga Saksi. An pagkamuot saka pag-asikaso na ipinahiling sako kan mga tugang garo maimbong na tamong na itinamong sa sako ni Jehova.” Nabawtismuhan si Olena kan Hulyo 24. Nasabi niya: “Nagpapasalamat ako ki Jehova sa pagigin mapasensiya niya sa sako. Ngunyan aram ko na na ‘igwa akong kusog na atubangon an gabos na bagay paagi sa saiya na nagtatao sa sako nin puwersa.’”—Filipos 4:13.

Sagkod kan Agosto 2, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 43 na tugang an nagadan

• 97 tugang an nalugadan

• 22,568 tugang an napiritan na maghali sa saindang harong

• 586 na harong an nagkagaraba

• 613 harong an nadestroso nin grabe

• 1,632 na harong an nadestroso nin dikit

• 5 Kingdom Hall an nagkagaraba

• 10 Kingdom Hall an nadestroso nin grabe

• 37 Kingdom Hall an nadestroso nin dikit

• 27 Disaster Relief Committee (DRC) an nagtatabang sa Ukraine

• 53,836 na indibidwal an tinabangan mismo kan mga DRC na makahanap nin mas ligtas na dadagusan

• 24,867 tugang an nagdurulag pasiring sa ibang mga nasyon asin tinatabangan kan mga kapagtubod niyato