Kan Agosto 2022, ipinaisi na ibabalik na an pagharong-harong sa mga lugar sa Ukraine na ligtas nang magsagibo kaiyan. Gustong-gusto kan mga tugang na makikabtang diyan. Narisa ninda na dakul na tawo an gustong magdangog kan mensahe kan Bibliya. Saro sa mga nag-ako nin pag-adal sa Bibliya an nagsabi: “Pagkatapos kong mahiling an makatatakot na mga bagay saka an pagsakit sa nangyayaring giyera, malinaw na an Diyos sana an makakaresolber sa mga problema kan katawuhan.” An minasunod mga eksperyensiya sa ministeryo.

Si Ruslan, na nakaasosyar sa Lanivtsi Congregation, medyo nahadit na magbalik sa pagharong-harong. Siya saka an agom niya namibi ki Jehova na tawan sinda nin kusog nin buot asin na tabangan sindang makahanap nin mga tawong interesado sa paglaom na magkakaigwa nin mas marahay na puturo. Nagngalas an mag-agom dahil sa inot na duwang oras na paghuhulit ninda, nakakaulay sinda nin walong tawo, asin gabos ’yan nagpa-Bible study.

Mantang nakikikabtang sa ministeryo si Olha, na nakaasosyar sa Kremenets Congregation, may sarong lalaki na dali-daling nagdulok sa sainda kan kapartner niya tapos hinapot sinda kun ipinapakipag-ulay ninda sa mga tawo an manungod sa Tataramon nin Diyos. Dangan sinabi kan lalaki: “Parasigarilyo ako saka parainom. Nasasabutan ko na sa dai na mahahaloy kakaipuhanon kong umatubang sa Diyos para husgaran. Pag-abot kan panahon na ’yan, habo kong umatubang na arog pa ako kaini.” Naggibo nin mga areglo tanganing ma-Bible study siya nin mga brother na taga duman.

Kan si Vasyl, na nakaasosyar sa Lviv-Riasne-Skhidnyi Congregation, naghuhulit kaiba kan mga kagrupo niya, nahiling niya an harong kan sarong babayi na nakaulay niya mga taon na an nakaagi. Nagirumduman niya na anggot kaidtong nagsayuma an babayi na makipag-ulay sa mga Saksi ni Jehova. Pero nagtuktok pa man giraray siya sa pinto kan harong asin nag-alok nin pag-adal sa Bibliya. Nabigla siya ta an nagbukas iyo man sana idtong babayi tapos nagsabi na gusto kaining masabutan an Banal na Kasuratan. Inako kan babayi an pag-adal sa Bibliya, asin naggibo nin mga areglo para ma-Bible study siya.

Si Serhii, na nakaasosyar sa Illintsi Congregation, nabawtismuhan kan 2021 kaya dai pa lamang siya nakaiba sa pagharong-harong. Pignerbiyos siya, kaya nagparaandam siya. Sinabi ni Serhii: “Pigparahiling ko su mga video para sa sampol na pakikipag-ulay. Kaya pagkatapos kaiyan, an kaipuhan ko na lang kusog nin buot.” Nakakaugma ta sinabi niya na su nerbiyos niya nasalidahan nin grabeng kaugmahan dahil nagkaoportunidad siyang sabihon sa iba an maugmang bareta.

Kaagid kaiyan, si Nikol na nakaasosyar sa Rozdil Congregation, nagin dai pa bawtisadong parahayag kan Agosto 2022. Nag-istorya siya: “Haditon ako saka natakot pa nganing maghulit nin in person. Pero pagkatapos maghulit, naeksperyensiyahan ko kun gurano karahay sa pagmati na ipakipag-ulay nin in person an manungod ki Jehova!”

Sagkod kan Nobyembre 11, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 46 na tugang an nagadan

• 97 tugang an nalugadan

• 12,569 tugang an napiritan na maghali sa saindang harong

• 590 harong an nagkagaraba

• 645 harong an nadestroso nin grabe

• 1,722 na harong an nadestroso nin dikit

• 6 na Kingdom Hall an nagkagaraba

• 19 Kingdom Hall an nadestroso nin grabe

• 63 na Kingdom Hall an nadestroso nin dikit

• 27 Disaster Relief Committee (DRC) an nagtatabang sa Ukraine

• 53,948 indibidwal an tinabangan mismo kan mga DRC na makahanap nin mas ligtas na dadagusan

• 25,983 na tugang an nagdurulag pasiring sa ibang mga nasyon asin tinatabangan kan mga kapagtubod niyato