Dakul sa mga imprastraktura sa nagkapirang parte kan Ukraine an nagkararaot o biyong nagkaderestroso huli sa parating pambobomba. Sa ibong kaiyan, dai nagpundo an mga tugang sa pag-atender sa mga pagtiripon kan kongregasyon asin sa pagpartisipar sa iba pang teokratikong mga aktibidad maski parating mayong kuryente.

Si Anastasia saka Debora, na mga payunir sa Kyiv, nagsabi na mayo sindang kuryente kisiyera 12 oras kada aldaw. Pag posible, pigtsa-charge ninda an saindang mga gadyet asin naggagamit nin cellular data para makaatender sa mga pagtiripon. Sa parati, nawawara an koneksiyon nin Internet pag tapos na an pagtiripon.

Saro pang problemang dara kan pagwara-wara kan kuryente iyo an kawaran nin heating. May mga tugang na naggagamit nin outdoor generator tanganing magkakuryente asin sa siring makapaimbong sinda. An iba nakikiistar sa mga kaparyente na may heating an harong. Pero may mga tugang man na pigtitios na lang an lipot. Maray na sana ta dakul sa mga tugang an may harong o apartment na may heating na naggagamit nin petroleum gas, kaya maski mayong kuryente may heating an mga harong na iyan.

Si Iryna, na sarong payunir sa Ivano-Frankivsk, pinagdadanay na positibo an sabuot. “Nagdesisyon ako na dai magpokus sa mga bagay na dai ko man kontrolado,” an sabi niya. “Kaya, an piggigibo ko sana su makakaya ko. Iniisip ko kun ano an puwede kong gibuhon pag mayong kuryente asin sinisigurado kong na-download ko an kinakaipuhan na mga publikasyon.”

Dawa ngani napapaatubang sa dakul na kadipisilan, an satong mga tugang sa Ukraine dakul an ginigibo sa paglilingkod ki Jehova. Tiwala kita na padagos niyang bebendisyunan an saindang mga paghihinguwa na ‘gumibo nin marahay.’—Galacia 6:9.

Sagkod kan Disyembre 6, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 47 tugang an nagadan

• 97 tugang an nalugadan

• 11,537 tugang an napiritan na maghali sa saindang harong

• 590 harong an nagkagaraba

• 645 harong an nadestroso nin grabe

• 1,722 na harong an nadestroso nin dikit

• 7 Kingdom Hall an nagkagaraba

• 19 Kingdom Hall an nadestroso nin grabe

• 68 Kingdom Hall an nadestroso nin dikit

• 27 Disaster Relief Committee (DRC) an nagtatabang sa Ukraine

• 54,212 indibidwal an tinabangan mismo kan mga DRC na makahanap nin mas ligtas na dadagusan

• 26,811 tugang an nagdurulag pasiring sa ibang mga nasyon asin tinatabangan kan mga kapagtubod niyato