Mga 3,000 na harong nin mga Saksi ni Jehova an naraot o nadestroso puon kan magkaigwa nin giyera sa Ukraine kan Pebrero 2022. Kan Agosto, sa panginginot kan Disaster Relief Department (DRD) asin kan Local Design/Construction Department, pinunan kan mga tugang sa Ukraine na hirahayon an mga naraot na harong sa mga lugar na ligtas iyan na gibuhon. Kaiba sa trabaho an pagsalida kan naraot na mga atop saka mga bintana asin iba pang saradit na hirahayon. May mga kaso na pag nadestroso an sarong harong, an garahe o bodega (shed) ginigibong simpleng dagusan. Sa ngunyan, 37 proyekto sa pagtugdok an tapos na, asin may 48 pang proyekto an nagpapadagos.

Dipisil magsagibo nin mga pagtugdok sa maribok na mga panahon na iyan. Pero dai nagduwa-duwa an mga tugang sa pagtabang sa pagtao nin ayuda. An sister na si Svitlana, na 70 anyos na asin taga Velyka Dymerka, Kyiv Region, nagsabi: “Mayo akong kuwarta para hirahayon an atop saka an prontera kan harong ko. Sinurpresa talaga ako ni Jehova. Nagdirigdi an mga tugang asin tinapos iyan sa laog sana nin tulong aldaw.”

Si Sister Nadiia na taga Horenka, Kyiv Region, nag-istorya na an gibuhon na pag-ayuda nakatabang sa ministeryo. Sinabi niya: “Nagtao nin dakulang patotoo sa gabos an gibuhon na paghirahay. Pig-iistorya dawa kan mga tawong dai ko kabisto an manungod sa tunay na pagkamuot kan mga Saksi ni Jehova sa lambang saro. Dai sinda makatubod na nagdigdi an mga kapagtubod ko para tabangan ako.”

Nagtatabang dawa idtong mga nawaran nin harong, arog ni Yevhen asin Tetiana. Nadestroso an harong kan mag-agom kan matamaan iyan nin missile. Imbes na magpokus sa nawara sa sainda, maigot sindang nagtatrabaho para tabangan an saindang mga kapwa parasamba. “Pirming an panginot na motibo mi iyo na matabangan an iba,” an sabi ni Yevhen. “An paglilingkod sa iba nakakatabang samo na makayanan an mga problema mi.”

Kaagid kaiyan, pagkatapos na hirahayon kan mga tugang an harong kan sister na si Lidiia na taga Hostomel, Kyiv Region, napahiro man siyang magboluntaryo na tumabang sa gibuhon na pag-ayuda. “Sa laog nin duwang semana, sagkod sa 16 na tugang an nagtrabaho para hirahayon an harong ko,” an sabi niya. “Namati ko na garo yaon na ako sa bagong kinaban. Ngunyan gusto ko na man na magtabang sa iba.”

Dai pa sana nahahaloy, nagbisita an sarong miyembro kan Komite kan Sangay sa Ukraine sa mga lugar na diyan ginigibo an mga pag-ayuda asin pinakusog an mga nawaran nin harong. Sinabi niya: “Kaidto pa, nagpapahiling na nin pambihirang pagkamuot sa lambang saro an mga tugang sa Ukraine. Pero, urog pang mas nakapadayupot sa sato an giyerang ini. Nakakaugma nanggad na mahiling na an tabang na itinatao sa satong namumutan na mga tugang nagigin dahilan na magin urog pa ngani sindang maigot sa ministeryo asin ‘magin abunda sa mga kapahayagan nin pasasalamat sa Diyos,’ arog kan sinasabi sa 2 Corinto 9:12.”

Sagkod kan Disyembre 20, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 47 tugang an nagadan

• 97 tugang an nalugadan

• 11,477 tugang an nagharali sa saindang harong asin nagpasiring sa mas ligtas na mga lugar sa nasyon

• 590 harong an nagaba

• 645 harong an naraot nin grabe

• 1,722 na harong an naraot nin dikit

• 7 Kingdom Hall an naraot

• 19 Kingdom Hall an naraot nin grabe

• 68 Kingdom Hall an naraot nin dikit

• 26 na Disaster Relief Committee (DRC) an aktibong nagtatabang sa Ukraine

• 54,212 tugang an tinabangan mismo kan mga DRC na makahanap nin mas ligtas na dadagusan

• 26,892 na tugang an nagdurulag pasiring sa ibang mga nasyon asin tinatabangan kan mga kapagtubod niyato