Sa mga lugar na apektado kan grabeng ralaban, arog kan Mariupol, mayo na nin kuryente o heating, asin pawara-wara an koneksiyon kan linya nin telepono saka Internet. Nagkaparasa an mga bintana sa dakul na harong. Paubos na an suplay nin kakanon saka tubig. Labing 2,500 na tugang an dai makahali sa Mariupol. Sa nagkapirang siyudad arog kan Bucha, Chernihiv, Hostomel, Irpin, Kyiv, asin Sumy, nagbukas nin mga “corridor” kaya nagin posible na makaebakwar an iba. Nakatabang ini sa dakul na tugang na makadulag pasiring sa mas ligtas na mga lugar.

Sarong 36 anyos na elder asin payunir, na nakaistar sa Hostomel, an nagdulag kaiba an saiyang agom saka mga magurang. Inistorya niya an naeksperyensiyahan niya kan makaabot na an giyera sa saindang siyudad:

“May mga helikopter na nagraralayog. Dawa sain na tinampo igwa nin mga awto kan mga militar. May mga suldados na nagralaog sa harong mi mantang yaon kami sa basement. Pinaputukan nin pirang beses kan saro sa sainda an basement. Tinamaan nin bala an go bag ni Mama pero dai man kami naano. Mga tulo o apat na oras kaming dai naghiro o nagribok mantang nagboborombahan saka nagbabaradilan sa may itaas mi. . . . Kan sunod na aldaw, mantang nagdudulag kami sakay nin awto, may nangyaring ralaban harani samo. Igwa nin mga tangke sa mga tinampo . . . Delikadong marhay, pero mas delikado kun dai kami mahali duman.

“Nabagong marhay kan gabos na pangyayaring ini an samong buhay. Nanudan ming iaplikar an dakul na prinsipyo sa Bibliya. Halimbawa, kun paano dai maghadit sa mga mangyayari sa aga, magin kontento sa panginot na mga pangangaipo, asin magtiwala ki Jehova sa pinakakritikal na mga sitwasyon.”

Sigurado kita na aram na marhay kan satong Diyos, si Jehova, an gabos na grabeng kadipisilan na inaagihan kan mga tugang niyato sa Ukraine. Talagang tatabangan niya sinda.—2 Pedro 2:9.

Sagkod kan Marso 10, 2022, naresibi hali sa Ukraine an minasunod na report:

• 2 tugang an nagadan

• 8 tugang an nalugadan

• 25,407 tugang an nagharali sa saindang mga harong asin nagpasiring sa mas ligtas na mga lugar sa nasyon

• 25 harong an nagaba

• 59 harong an naraot nin grabe

• 222 na harong an naraot nin dikit

• 7 Kingdom Hall an naraot

• 27 Disaster Relief Committee (DRC) an aktibo na nagtatabang sa Ukraine

• 10,566 na tugang an tinabangan mismo kan mga DRC na makahanap nin mas ligtas na dadagusan

• 9,635 tugang an nagdurulag pasiring sa ibang mga nasyon asin tinatabangan kan mga kapagtubod niyato