Makamumundo, sagkod kan Marso 29, 2022, pito pa sa satong mga tugang sa siyudad nin Mariupol an nagadan. Gabos-gabos, 17 tugang na an nagadan sa Ukraine.

An mga Disaster Relief Committee (DRCs) sa Ukraine daing pundo sa pagtao nin ayuda, dawa ngani mameligro pa an saindang buhay sa paghanap sa mga kapagtubod ninda sa mga lugar na apektadong marhay kan giyera.

Halimbawa, nagibo kan mga tugang sa mga DRC na makahatod nin mga kakanon, bulong, asin iba pang mga pangangaipo sa mga siyudad na apektadong marhay kan giyera, arog kan Kharkiv, Kramatorsk, asin Mariupol. Sarong miyembro kan DRC an nagbibiyahe aroaldaw nin labing 500 kilometros, na inaagihan an dakul na checkpoint nin militar, para maihatod an mga kakanon saka bulong sa mga 2,700 na parahayag.

Nag-areglo man an mga DRC nin transportasyon para mailigtas an mga tugang sa mga lugar na grabe an ralaban. Sarong brother na miyembro kan DRC sa Chernihiv an nag-istorya: “Kan punan kan mga suldados na bombahon an mga istaran, nagin malinaw sa samo na delikado nang marhay na magdanay sa siyudad. Dahil mayo na nin kuryente asin Internet kan nagpuon na an pambobomba, naghidali an mga elder na magpasiring sa siyudad para sabihan an mga tugang na nagpapaili sa mga basement na igwa nin masasakayan para makahali sinda sa siyudad.”

An kagsadiri kan sarong negosyo nin transportasyon nagtugot na gamiton an saiyang mga van saka bus, asin nagbiyahe siya nin 9 na biyahe para iligtas an 254 tugang niyato hali sa Chernihiv. Sa sarong pangyayari, naggamit pa ngani siya nin heavy equipment para hirahayon an tinampo tanganing makaagi an saiyang bus. Nagpapasalamat na marhay an mga tugang niyato sa arog kaiyan na tabang.

Nakikimundo kita sa mga nagadanan nin mahal sa buhay sa panahon na ini na igwa nin giyera. Hinahalat-halat ta na gabos an kautuban kan paglaom na mababasa sa Tataramon nin Diyos, an Bibliya, kun nuarin an kagadanan saka an pagmundo mawawara na.—Kapahayagan 21:3, 4.

Sagkod kan Marso 29, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 17 tugang an nagadan

• 35 tugang an nalugadan

• 36,313 tugang an nagharali sa saindang harong asin nagpasiring sa mas ligtas na mga lugar sa nasyon

• 114 harong an nagaba

• 144 harong an naraot nin grabe

• 612 harong an naraot nin dikit

• 1 Kingdom Hall an naraot

• 7 Kingdom Hall an naraot nin grabe

• 23 na Kingdom Hall an naraot nin dikit

• 27 Disaster Relief Committee (DRC) an aktibong nagtatabang sa Ukraine

• 34,739 tugang an tinabangan mismo kan mga DRC na makahanap nin mas ligtas na dadagusan

• 16,175 tugang an nagdurulag pasiring sa ibang mga nasyon asin tinatabangan kan mga kapagtubod niyato