Nakakamundo, dakul pang namumutan niyatong mga tugang an nagadan dahil sa nangyayaring giyera sa Ukraine. May total na 28 Saksi ni Jehova an nagkagaradan.

Base sa mga report kan international news, grabe an nangyayaring ralabanan sa mga banwaan na harani sa Kyiv pirang semana puon kan magkagiyera. Sa haros 4,900 na parahayag na nakaistar sa mga lugar na iyan, labing 3,500 sa sainda an nagharali na pasiring sa mas ligtas na mga lugar.

Ipinapahiling kan minasunod na mga eksperyensiya kun paano napapagdanay kan mga tugang niyato duman an saindang marigon na pagtubod sa ibong nin dipisil na mga pagbalo.

Si Oleksandr, na sarong elder sa banwaan nin Makariv, an nagdulag pasiring sa mas ligtas na lugar sa central Ukraine. Pero, dahil nahahadit siya sa apat na parahayag na kaibanan niya sa field service group ta dai niya makontak sinda, nagdesisyon siyang magbalik sa lugar nin ralaban para hanapon sinda. Inistorya niya: “Aram ko na pinakamahalaga para ki Jehova an saiyang mga parasamba. . . . Kan nasa natad na ako kan harong nin sarong tugang, nahiling ko na nagkararaot iyan dahil tinamaan iyan nin mga bomba. Sarado an pinto kan basement kan harong, nag-aapod ako pero mayo nin nagsisimbag. Kaya natakot ako.” Pigpuwersang bukasan ni Oleksandr an pinto kan basement tapos nahiling niya an sarong grupo nin mga tawo na nakahiriling sa saiya. Nahanap niya an mga parahayag, kaibanan kan mga ini an mga pagtaraid na bakong mga Saksi na nagtatarago.

An saro sa mga parahayag na nagtago sa basement, si Yaroslav, nagsabi na walong aldaw na sindang nagtatago sa basement. Inistorya niya: “Igwa sana kami nin dikit na biskuwit saka tigsararo sana kaming baso nin tubig kada aldaw. Pero nagbabasa kami nin Bibliya saka kan satong mga publikasyon, namimibi, tapos pinapakusog mi an lambang saro. Kan madangog kong inaapod ni Oleksandr an pangaran ko, naisip ko su mga suldados na an nag-abot para dakupon ako. Paghuna ko magagadan na ako. . . . [Idto palan,] nag-abot siya para iligtas kami gabos. Nagpapasalamat talaga kami ki Jehova dahil igwa kami nin mamumuton na pamilya sa espirituwal, mga tugang na namimibi para sa samo saka handang isakripisyo an buhay ninda para iligtas kami.”

Si Pylyp saka an saro pang brother nagdesisyon na hatudan nin mga pagkakan an mga parahayag na yaon sa banwaan nin Borodianka. Kan Marso 17, mantang nagbibiyahe sinda pasiring sa banwaan, kinua kan mga suldados an awto ni Pylyp saka an mga pagkakan. Dangan inarestar an duwang brother kan mga suldados, pigposasan sinda asin tinahuban an mga mata ninda, tapos dinara sinda sa sarong sadit na kuwarto sa basement kaiba an pito pang lalaki. Pakalihis nin duwang aldaw, ibinalyo sinda sa sarong selda tapos binubugbog sinda kan mga guwardiya pag banggi. Sabi ni Pylyp: “Dai ako sigurado kun mabubuhay pa ako. Namibi ako na magdanay na maimbod.”

Sarong beses kan binubugbog si Pylyp, namibi siya nin makusog para sa may edad nang mga sister na wara nin makakakan, para sa kaligtasan kan saiyang pamilya, saka nagpasalamat siya ki Jehova sa maugmang mga taon na naglingkod siya sa Saiya. Ibinalik siya kan guwardiya sa saiyang selda, tapos ipinadagos niya an pagpamibi niya na lugod maaraman kan mga suldados na bako man peligroso an mga tugang. Nagpuon na magpatotoo an duwang brother sa mga guwardiya. Sa laog nin duwang aldaw, nahulitan ninda an mga guwardiya na nagrerelyebo sa pagbantay. An saro sa kaibanan nindang preso nagpahiling man nin interes sa mensahe kan Bibliya. Nagpasalamat ini sa duwang brother. Kan Marso 27, pinaluwas sa presuhan an duwang brother saka an lalaking nagpahiling nin interes.

Si Svitlana, na sarong daing agom na sister na taga Bucha, duwang semana nang dai pa makahali sa lugar na igwa nin ralaban. Inistorya niya: “Ngunyan ko sana nasabutan an halaga kan katuninungan na itinatao ni Jehova. Dai buot sabihon na pag igwa kita kan katuninungan nin Diyos aram ta na pirmi kun ano an gigibuhon. Pero pag dai ta aram an solusyon sa mga problema, diyan kita dapat lubos na magtiwala ki Jehova.”

Mantang nagbibiyahe pasiring sa mas ligtas na lugar sa Ukraine, nakapagpatotoo si Svitlana sa sarong babayi saka sa pamangkin kaini. Nakaabot sinda gabos sa sarong mas ligtas na lugar na diyan sinabat sinda kan sarong pamilyang Saksi. Pinadagos sa harong kan pamilyang ini si Svitlana pati na an babayi saka an pamangkin kaini kan bangging idto. Kan suminunod na aldaw, nag-atender sa pagtiripon sa kongregasyon an babayi saka naghagad nin Bibliya asin mga literatura. Padagos na pigpapatotoohan ni Svitlana an babayi.

Sagkod kan Abril 12, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 28 tugang an nagadan

• 48 tugang an nalugadan

• 40,778 tugang an nagharali sa saindang harong asin nagpasiring sa mas ligtas na mga lugar sa nasyon

• 278 harong an nagaba

• 268 harong an naraot nin grabe

• 746 na harong an naraot nin dikit

• 1 Kingdom Hall an naraot

• 9 na Kingdom Hall an naraot nin grabe

• 26 na Kingdom Hall an naraot nin dikit

• 27 Disaster Relief Committee (DRC) an aktibong nagtatabang sa Ukraine

• 41,974 tugang an tinabangan mismo kan mga DRC na makahanap nin mas ligtas na dadagusan

• 18,097 tugang an nagdurulag pasiring sa ibang mga nasyon asin tinatabangan kan mga kapagtubod niyato