Nauugma kaming ibareta na binendisyunan ni Jehova an saiyang mga lingkod sa Ukraine tanganing makapagselebrar an satong mga tugang sa bilog na nasyon kan Memoryal kan kagadanan ni Cristo. Nagkapirang Kingdom Hall sa sulnupan na parte kan Ukraine an ginamit na lugar kan Memoryal para sa mga tugang niyato na nagdurulag asin nagdadagos duman. An kadaklan sa mga tugang nagtiripon sa saradit na grupo para isagibo an Memoryal, asin nagkonektar paagi sa videoconference an mga dai makahali sa saindang harong.

Sa kadaklan na parte kan nasyon, maghapon na madadangog an tanog kan mga sirena sa aldaw kan Memoryal. Pero kan pabanggi na, nagpundo an tanog kan mga sirena. “Namimibi kami na lugod dai mapundo an Memoryal dahil sa mga pambobomba,” an sabi ni Sherhiy na taga Druzhkivka, Donetsk Region. “Kan madali nang magpuon an Memoryal, nagpundo an mga pambobomba saka an tanog kan mga sirena.”

Sarong grupo nin may edad asin may kamatian na mga parahayag sa Nemishaeve, harani sa Kyiv, an labing sarong bulan nang dai nakakaatender nin mga pagtiripon. Ipinapamibi ninda na makaatender sinda sa Memoryal. Tinabangan kan elder na si Vitaliy na makaatender sa Memoryal an grupong iyan. “Mayo nin kuryente,” an sabi niya, “kaya naggamit kami nin flashlight sa Memoryal. Mayo nin heater. Mayo man nin musika, kaya nagtugtog an aki ko nin biyolin para makakanta kami.”

Si Oleksandr, sarong elder na nakaistar sa lugar na igwa nin ralaban, nagsabi: “Kan panahon kan kampanya sa pag-imbitar para sa Memoryal, dai kami makapadara nin mga surat sa mga tawo sa teritoryo mi ta binomba an mga harong ninda saka mayo na iyan nin mga tawo. Kaya, inimbitaran mi na sana an mga kabisto mi, mga nakakaibanan sa basement, saka an mga nakakaibanan ming pig-ebakwar man. An dakul sa mga nakaulay mi dai pa lamang nagdangog sa mga Saksi kaidto. Dakul sa sainda an nag-atender kaiba mi sa Memoryal.”

Dawa ngani dai pa makua an kumpletong report kan gabos na kongregasyon sa Ukraine, aram na ngunyan na labing 210,000 an nag-atender sa Memoryal.

Saro sa mga tugang niyato sa Ukraine an nagpahayag kan saiyang namamatian manungod sa Memoryal. Siya nagsabi: “Arog nin sarong parola na nagtatao nin asigurasyon sa mga paralayag na harani na sinda sa baybayon, nagtatao man sako nin asigurasyon an Memoryal na an aldaw ni Jehova madali nang mag-abot. Mas nagin marigon pa an sakong kumbiksiyon dahil sa Memoryal ngunyan na taon.”

Sagkod kan Abril 21, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 35 tugang an nagadan

• 60 tugang an nalugadan

• 43,792 na tugang an nagharali sa saindang harong asin nagpasiring sa mas ligtas na mga lugar sa nasyon

• 374 harong an nagaba

• 347 harong an naraot nin grabe

• 874 harong an naraot nin dikit

• 1 Kingdom Hall an naraot

• 10 Kingdom Hall an naraot nin grabe

• 27 Kingdom Hall an naraot nin dikit

• 27 Disaster Relief Committee (DRC) an aktibong nagtatabang sa Ukraine

• 44,971 indibidwal an tinabangan mismo kan mga DRC na makahanap nin mas ligtas na dadagusan

• 19,961 tugang an nagdurulag pasiring sa ibang mga nasyon asin tinatabangan kan mga kapagtubod niyato