An sangang opisina sa Ukraine, sa tabang kan 27 Disaster Relief Committee (DRC), padagos na inaasikaso an mga tugang niyato sa Ukraine na napiritan na maghali sa saindang mga harong. Puon sa pagpuon kan giyera, labing 250 toneladang ayuda an ipinadara haling Poland, na may mga kakanon, mga bado, asin mga produkto na para sa personal na kalinigan. Apuwera kaiyan, labing 80 toneladang suplay nin kakanon an itinao kan mga tugang na nakaistar sa mas ligtas na mga lugar sa Ukraine.

May koneksiyon sa itinabang saiya kan mga tugang na naglilingkod sa DRC, an sister na si Valentyna na taga Kyiv nagsurat: “Kan magpuon an ralaban, nagin delikadong marhay na magdanay sa siyudad. Kaya, nag-ebakwar ako sa sarong sadit na banwaan sa Cherkasy region. Labing duwang bulan na ako digdi. Grabe an ipinahiling na pagmalasakit sako kan mga tugang sa kongregasyon digdi. Pirang kahon nin kakanon saka suplay na para sa kalinigan an ipinadara ninda sako. Kan mahiling ko an gabos na tabang na ini, dai ko napugulan an emosyon ko. Sa saro sa mga kahon, igwa man nin sarong drowing na gibo nin kuwatro anyos na aki na an pangaran Blanca saka nin watercolor postcard . . . Sasarayon ko an mga drowing bilang remembrance. Dai ko mapugulan na ipahayag an udok sa puso kong pasasalamat sa gabos kong tugang asin lalong-lalo na ki Jehova.”

Sarong 83 anyos na disabled na sister, na Valentyna man an pangaran, na taga Sieverodonetsk an nagsurat: “Kan magpuon an giyera, solo-solo ako sa harong. An kasaro-sarui kong aking lalaki nagadan bago pa an giyera. Nakakatakot na marhay kan pigpaparabomba na an siyudad nin bilog na aldaw. Mayong tubig, kuryente, gas, saka maluya an Internet. Nagpapasalamat akong marhay sa mga tugang na nagsapeligro kan buhay ninda para tabangan ako.”

Sinabi pa niya: “Pagkatapos, dinara ako sa Dnipro kan mga tugang kaiba an duwa pang disabled na sister ta mas ligtas duman. Sa Dnipro, tinabangan ako kan mga tugang na makahanap nin madadagusan. Nag-iistar ako ngunyan sa sarong pamilya na mga kapagtubod na iyong nag-aasikaso sako. Garo kami sarong pamilya. Tinabangan pa ngani ninda ako na magkaigwa nin cellphone para makaatender ako saka makapagpartisipar sa mga pagtiripon. Dai ko lamang malilingawan an kabuutan na ipinahiling sako kan mga tugang.”

Maugmahon nanggad kita asin nagpapasalamat sa satong mamumuton na Ama, si Jehova, na padagos na inaataman an satong namumutan na mga tugang sa Ukraine tanganing ‘dai sinda magkulang nin ano man na bagay na marahay.’—Salmo 34:10.

Sagkod kan Hunyo 7, 2022, naresibi hali sa Ukraine an minasunod na report. An mga bilang na ini nakabasar sa kumpirmadong mga report kan mga tugang niyato duman. Alagad, an aktuwal na bilang posibleng mas halangkaw pa, huling dipisil na mapagdanay an komunikasyon sa gabos na lugar sa Ukraine.

• 42 na tugang an nagadan

• 82 na tugang an nalugadan

• 46,145 tugang an napiritan na maghali sa saindang harong

• 469 harong an nagkagaraba

• 540 harong an nadestroso nin grabe

• 1,405 harong an nadestroso nin dikit

• 5 Kingdom Hall an nagkagaraba

• 8 Kingdom Hall an nadestroso nin grabe

• 33 na Kingdom Hall an nadestroso nin dikit

• 27 DRC an nagtatabang sa Ukraine

• 50,663 na indibidwal an tinabangan mismo kan mga DRC na makahanap nin mas ligtas na dadagusan

• 22,995 tugang an nagdurulag pasiring sa ibang mga nasyon asin tinatabangan kan mga kapagtubod niyato