Kan Hunyo 2013, huli sa grabeng pag-uran nagbaha an mga salog sa Central Europe. Sa Hungary, uminabot sa pinakahalangkaw na lebel an tubig kan haros enterong Salog nin Danube—an pinakahalangkaw sa kasaysayan kaiyan.

Huli sa emerhensiya, nakiulay an Hungarian Ministry of Human Resources sa sangang opisina kan Mga Saksi ni Jehova sa Hungary kun puwedeng makipagtabangan an mga Saksi para sa aktibidad na gigibuhon ninda kontra baha. Bilang simbag, inimbitaran kan sangang opisina an mga kongregasyon na harani sa Salog nin Danube na magpartisipar sa aktibidad na ini na inorganisar kan lokal na gobyerno.

Pambihirang marhay an pagresponde kan mga kongregasyon. Sa suminunod na mga aldaw, labing 900 na Saksi hali sa 72 na kongregasyon an nagtabang sa pagpasarig sa mga pampang nin salog. Sinabihan sinda na maglaag nin badge card na may nakasurat na “Mga Saksi ni Jehova,” saka pangaran asin siyudad ninda.

Sa sarong siyudad, sarong representante kan Red Cross diyan an nagpadara kan mensaheng ini sa sarong kongregasyon: “Ipinapaabot mi an samong pasasalamat asin dakulang paggalang sa saindo, huling bibihira na kaming makahiling kan arog kaiyan na pagkasararo asin pagigin andam na tumabang—dai pa diyan kaiba su rayo kan pigbiyahe nindo! Maugma kong iinistorya sa siyudad mi an saindong magayunon na halimbawa!”

An tsirman kan organisasyon sa pag-ayuda pag may kalamidad, na miyembro man kan Parliyamento kan Hungary, nagpadara nin surat nin pasasalamat sa sangang opisina huli sa marahayon na pagsuportar kan mga Saksi.