Sa laog nin labing sanggatos na taon, an mga Saksi ni Jehova nagdidisenyo asin nagtutugdok nin sadiri nindang mga lugar nin pagsamba, na inaapod na Kingdom Hall. May itinutugdok daw na Kingdom Hall sa lugar nindo? Ano an pakinabang kan sarong Kingdom Hall sa komunidad nindo?

An mga Kingdom Hall dinisenyo sa paagi na makakadagdag nin gayon sa komunidad. Si Jason, na nagtatabang sa pag-organisar sa pagtugdok nin mga Kingdom Hall sa Estados Unidos, nagsabi: “Katuyuhan mi na an kada Kingdom Hall na itutugdok mi magin saro sa pinakamagayon saka pinakakagalang-galang na edipisyo sa sarong lugar.” Sinabi pa kan sarong Saksing arkitekto asin kabali sa team na nagdidisenyo, “Gusto mi na pagkatapos kan pagtugdok, maserbi iyan na sarong marahayon na regalo sa komunidad asin na magkaigwa iyan nin positibong epekto sa mga pagtaraid.”

Mga boluntaryong Saksi ni Jehova an mga nagtatrabaho sa pagtugdok nin Kingdom Hall, na handang gamiton an saindang panahon asin abilidad saka interesadong marhay na makagibo nin de-kalidad na mga edipisyo. Parating naririsa kan iba an kalidad kan saindang trabaho. Halimbawa, sa sarong dai pa sana nahahaloy na proyekto sa Richmond, Texas, U.S.A, sinabi kan lokal na inspektor na an atop kan Kingdom Hall an pinakamagayon na atop na nahiling niya. Sa Jamaica, iiniba nin sarong inspektor an sarong grupo nin mga baguhan na inspektor sa sarong itinutugdok na Kingdom Hall asin sabi kaini: “Dai nindo kaipuhan na mahadit sa mga tawong ini. Sinusunod na marhay kan mga Saksi ni Jehova an plano, asin labi pa ngani an nagigibo ninda kisa kan nasa regulasyon sa pagtugdok.” Saro pang inspektor sa sarong siyudad sa Florida, U.S.A an nagsabi, “Nag-inspeksiyon ako nin mga ospital asin darakulang proyekto kan gobyerno, pero mayo pa akong nahiling na arog kaini kaorganisado. Mahusay an ginigibo nindo.”

An mga pagtiripon sa Kingdom Hall igwa nin marahayon na epekto sa buhay kan mga nag-aatender diyan. Dakul sa sainda an nagin mas marahay na mga ama, mga ina, asin mga aki. Si Rod, na kaiba sa sarong team nin mga nagdidisenyo nin Kingdom Hall nagsabi: “An lambang Kingdom Hall sarong marahayon na lugar, na diyan itinutukdo an manungod sa pagkakaigwa nin halangkaw na mga pamantayan sa moral, na nakakatabang sa komunidad.” Sinabi pa niya: “Makakakua ka digdi nin tabang pag napapaatubang sa mga kasakitan. Mabubuot saka mainamigo an mga tawo digdi asin talagang makikinabang an gabos ta mapapakusog ka digdi saka matatabangan ka sa espirituwal.”

An mga nagtitiripon sa Kingdom Hall igwa nin malasakit sa saindang pagtaraid, asin nagtatabang tulos pag may kalamidad. Halimbawa kan 2016, kan magtama an Bagyong Matthew sa Bahamas, 254 mga harong an hinirahay kan mga Saksi ni Jehova. Sa sarong pagtaraid, huling inabot kan baha an harong kan 80 anyos na si Violet, dinulok niya an nag-aayudang mga Saksi. Sinabihan niya sinda na handa siyang magbayad para sa tabang na magigibo ninda. Hinirahay ninda an atop kan harong ni Violet, pero dai sinda nagpabayad. Dangan kinabitan ninda nin bagong lanob an sala niya. Kan matapos na iyan, kinugos ni Violet an gabos na naghirahay kan harong niya, asin grabe an pasasalamat niya. Sinabi niya: “Talagang mga lingkod kamo nin Diyos!”

Tanganing mapagdanay na nasa marahay na kondisyon an mga Kingdom Hall, may itinataong pagsasanay an mga Saksi ni Jehova sa mga miyembro kan kongregasyon tanganing mentenaron an saindang mga Kingdom Hall. Nagkaigwa ini nin marahay na mga resulta. Halimbawa, sa sarong sadit na komunidad sa Arizona, sarong babayi an naimbitaran sa sarong pagtiripon sa Kingdom Hall. Nagkomento siya kun gurano kamentenadong marhay an Kingdom Hall asin napahanga siya kan maaraman niya na may programa nin pagmentenar kaiyan, kaya talagang nasa marahay na kondisyon iyan. Nagtatrabaho an babayi bilang parasurat sa sarong lokal na diyaryo kan banwaan, asin may isinurat ngani ini dapit sa mentenadong marhay na Kingdom Hall. Sabi sa katapusan kan artikulo, “Nauugma kami  . .  ta may Kingdom Hall sa lugar mi.”

Makakahanap ka nin mga Kingdom Hall sain ka man na lugar sa kinaban. Maugma mi ikang iniimbitaran na bisitahon iyan. Siguradong maugma kang aakuon sa Kingdom Hall.