Kan 2014, nag-ako nin Diana Award an 10 anyos na aking lalaking si Hugo hali sa sarong British charity huli sa pagtabang niya sa mga kaeskuwela niya dapit sa kun paano aatubangon an pambu-bully.

Sinabi ni Hugo: “Kun nagka-award man po ako, dahil iyan sa whiteboard video na Daugon an Bully Dawa Dai Ka Nakikiiwal. Nagin marahay sana po akong ambassador nin anti-bullying huli sa nanudan ko sa videong ’yan sa jw.org.”

Sa mga maestra nguna ipinahiling ni Hugo an videong Daugon an Bully. Nagayunan an mga ini kaya inareglar ninda na mabuksan kan gabos na estudyante an website na jw.org. Dakul sa mga kaeskuwela ni Hugo na 8 sagkod 10 anyos an regular nang naggagamit nin jw.org. Sabi ninda dai sana sinda natabangan kaiyan na maatubang an mga problema arog nin pambu-bully kundi nasimbag man kaiyan an mga hapot ninda na arog kan, Paano ako magkakaigwa nin tunay na mga amigo?

Binu-bully man an 8 anyos na si Elijah sa saro pang eskuwelahan sa Britania. Dinalan nindang bilog na pamilya an videong Daugon an Bully. Prinaktis ninda kun ano an puwede niyang sabihon saka gibuhon kun may mag-bully saiya. Huli kaini, nagkaigwa nin kumpiyansa si Elijah tanganing mapangganang maatubang an saiyang problema. Dangan, kan anti-bullying week na, ipinahiling kan prinsipal ninda an video sa bilog na eskuwelahan.

Siyempre an pambu-bully, bako sana sa Britania problema. Lakop ini sa bilog na kinaban, asin an videong ini nakakatabang sa mga hoben sain man na lugar.

Sa Estados Unidos, takuton an 10 anyos na si Ivie sa saro niyang kaklaseng babayi na nambubully sa saiya. Pakatapos mahiling an videong Daugon an Bully, nagkaigwa si Ivie nin kusog nin buot na kaulayon an saiyang kaklase. Kinaulay niya man an saiyang maestra kaya tinabangan siya kaini sa problema niya. Nag-sorry an kaklase niya, asin ngunyan mabuot na ini sa saiya.

Nagmamakulog an Mga Saksi ni Jehova sa kapakanan nin mga hoben. Padagos kaming magpupublikar nin praktikal na mga suhestiyon para tabangan sindang maatubang an mga problema sa aroaldaw arog kan pambu-bully.