Kan 2016, nagkapribilehiyo an Mga Saksi ni Jehova na ipahiling sa sarong grupo nin mga paratukdo sa Zamboanga del Norte, Pilipinas kun paano sinda matatabangan kan mga video asin mga artikulo sa website na jw.org sa pagtutukdo ninda. Binisita nguna kan mga Saksi an Department of Education na nasa kabisera kan probinsiya sa Dipolog City. Napahangang marhay an mga administrador sa jw.org kaya inimbitaran ninda an mga Saksi na magtao nin 30 minutong presentasyon sa tulong seminar na gigibuhon para sa mga paratukdo sa pirang munisipalidad kan Zamboanga del Norte.

Ipinahiling kan mga Saksi an pirang video saka mga artikulo sa website sa mga 300 na paratukdo na presente sa kada seminar. Nasunuan iyan kan mga nag-atender, lalo na an temang “Kung Paano Haharapin ang Pagkakautang.” Nahiling kan mga paratukdo na bako sana an mga estudyante an makikinabang sa presentasyon na iyan kundi sinda man mismo. Gabos sinda nag-ako kan tract na Sain Ta Makukua an Simbag sa Importanteng mga Hapot sa Buhay? na nagtatampok nin dakul na magagayon asin makakatabang na impormasyon na nasa jw.org. May nagkapirang paratukdo na nag-download nin mga video sa website.

Magayon an nagin resulta kan tulong presentasyon, kaya nag-areglo pa an Department of Education kan probinsiya nin dagdag na mga presentasyon para sa mga 600 na guidance counselor saka iba pang mga paratukdo. Sa giraray, dakul an nagpahayag nin pasasalamat.

Ipinaliwanag nin nagkapirang nag-atender kun paano sinda natabangan kan mga presentasyon saka kan website. “Nagpapasalamat talaga ako,” an sabi kan sarong maestra. “Dakulang tabang an website sa pagtutukdo ko sa mga estudyante.” Sinabi pa nin sarong maestra: “Dakul akong dapat pag-adalan, lalo na kun paano makakayanan an stress. Dakulang tabang talaga an website, bako lang para sa mga hoben, kundi para man duman sa mga may edad na.”

Labing 350 paratukdo na nag-atender sa presentasyon kan jw.org an naghagad pa nin dagdag na mga impormasyon. Kaya nagtao an mga Saksi nin dagdag na mga literatura saka nagtao nin praktikal na mga sadol hali sa Bibliya.

Ugmahon na marhay an mga Saksi ni Jehova huling labing 1,000 paratukdo an nag-atender sa mga presentasyon kan jw.org sa Zamboanga del Norte asin naaraman kan mga ini na puwedeng magin mahusay na pantabang sa pagtutukdo an website na jw.org. Makikinabang sa pantabang na ini an mga paratukdo sa bilog na kinaban huling nagtatao ini nin dakul na giya dapit sa paggawi, moral, asin espirituwal. a