Siyam na Saksi ni Jehova sa Australia an tinawan nin sertipiko nin pag-apresyar huli sa saindang “marahayon na paglilingkod” sa mga preso sa saro sa pinakadakulang immigration detention center kan Australia. An Curtin Immigration Detention Centre harani sa Derby, sa Sulnupan na Australia a an nagtao kan sertipiko sa mga Saksi.

Kada semana, dinadalaw kan mga Saksi an mga preso para madangog an mga istorya ninda sa buhay asin para tawan an mga ini nin pagranga asin paglaom na yaon sa Bibliya. “Hiling-hiling tulos an epekto kan pagdalaw ninda sa mga preso,” an sabi ni Christopher Riddoch, an liaison officer sa relihiyon asin kultura kan institusyon. Sinabi niya na nagigin mas marahay an disposisyon asin mas maugma an mga nakapreso pagkatapos kan kada pagdalaw kan mga Saksi huling “aram ninda na igwa nin mga tawo na tunay na nagmamalasakit sa saindang kapakanan.”

Sinabi man ni Mr. Riddoch na an sertipikong itinao sa mga Saksi sadit sanang kapahayagan kan saindang pasasalamat sa pagtabang kan mga Saksi sa “pagpakarhay kan buhay kan mga presong nasa kustodiya mi,” an sabi niya. Sinabi pa niya na an mga Saksi “nakataong onra sa saindang pamilya, kongregasyon, asin pagtubod.”