Namundag ako sa siyudad nin Calgary sa Alberta, Canada. Nagdiborsiyo an mga magurang ko kan umboy pa sana ako, asin duman na kami nag-istar ni Mama sa harong ni lolo saka lola. Padabaon kami ni lolo saka ni lola, asin maugmahon na aki ako kaidto. Dakulon akong maugmang nagigirumduman kaidtong aki pa ako.

 Pero kan siyete anyos ako, nagpuon na magin dipisil an buhay ko. Nagpakasal giraray si Mama ki Papa asin nagbalyo kami sa St. Louis, Missouri, sa Estados Unidos. Naaraman ko na medyo maisog palan si Papa. Halimbawa, kan inot na aldaw ko sa bago kong eskuwelahan, pagpuli ko naaraman niya na pig-bully ako asin na dai lamang ako naglaban. Angguton siya asin mas grabe pa an suntok niya kisa sa mga suntok sako kan mga kaeskuwela ko! Dai ko idto malilingawan kaya nakanuod akong makiiwal kan siyete anyos pa sana ako.

 An pagigin arangguton ni Papa nakaapekto man ki Mama, kaya pirmi sindang nag-iiwal. Nakanuod akong magdroga asin mag-inom kan 11 anyos ako. Nagin mas arangguton ako asin pirming nakikiiwal sa mga tawo sa tinampo. Kan maggradwar ako sa high school, nagin mas bayolente akong tawo.

 Kan 18 anyos ako, naglaog ako sa U.S. Marine Corps. Diyan, nag-ako ako nin pagsasanay kun paano gumadan nin tawo. Pakalihis nin limang taon, naghali ako sa militar para mag-adal nin psychology ta gusto kong magtrabaho sa Federal Bureau of Investigation. Nagklase ako sa unibersidad sa Estados Unidos dangan pagbalik ko sa Canada ipinadagos ko iyan.

 Kan nasa unibersidad ako, mas lalo akong nagin disganado sa mga tawo saka sa gabos na nasa palibot ko. An mga tawo makasadiri, garo mayo nang saysay an mga nangyayari sa kinaban, saka mayo nang solusyon an mga problema. Kaya naisip ko, dai na kayang gibuhon kan mga tawo na magin mas marahay na lugar an kinaban.

 Dahil mayo na man katuyuhan an buhay ko, nagpangana na sana ako sa pag-inom saka pagdroga tapos nagpokus ako sa paghanap nin kuwarta saka sa pakikipag-sex. Pirmi akong nasa party tapos sa iba-ibang babayi ako nakikipag-sex. Dahil sa naako kong pagsasanay sa militar, makusugon an buot ko na makiiwal. Iniisip ko na ako an madesisyon kun ano an tama saka sala kaya kinukomprontar ko an siisay man na sa hiling ko bakong patas sa iba. Pero an totoo, nagigin mas bayolente ako.

 Sarong aldaw, kaibanan ko kaidto su saro kong amigo sa basement kan harong ko, pareho kaming bangag sa droga, asin pigpepreparar mi su ipapabakal ming marijuana para ilegal na ipadara, tapos hinapot niya ako kun nagtutubod ako sa Diyos. Sabi ko, “Kun an Diyos an dahilan kan pagsakit sa kinaban, habo ko siyang mabisto!” Kinaagahan, inot na aldaw ko sa bago kong trabaho, hinapot ako kan katrabaho ko na sarong Saksi ni Jehova, “Sa hiling mo daw, an Diyos an dahilan kan pagsakit sa kinaban?” Nabigla ako ta iyan pa sana su pinag-uulayan mi kasuudma kan amigo ko kaya nagkainteres ako. Sa suminunod na anom na bulan, dakul kaming napag-ulayan, asin ipinahiling niya sako an mga simbag kan Bibliya sa pira sa pinakamasakit na mga hapot ko manungod sa buhay.

 Habo kan ka-live-in ko na iistorya ko saiya su mga nanunudan ko. Sarong Domingo, sinabi ko saiya na inimbitaran ko sa harong an mga Saksi para makipag-adal samo sa Bibliya. Pagkaaga, pagpuli ko haling trabaho mayo na siya sa harong saka kinua niya gabos na gamit mi sa harong. Nagluwas ako sa harong tapos nagparahibi ako. Namibi man ako sa Diyos na tabangan niya ako. Iyan an inot na pagkakataon na ginamit ko sa pamibi an personal na pangaran nin Diyos, an Jehova.—Salmo 83:18.

 Pakalihis nin duwang aldaw, nagpuon akong magpa-Bible sa sarong mag-agom na Saksi. Pagkahali ninda, ipinadagos ko an pagbasa sa librong Puwede Kamong Mabuhay Sagkod Lamang sa Paraiso Digdi sa Daga, asin natapos ko iyan kan banggi man sanang idto. a Nataros an puso ko kan mga nanudan ko manungod sa Diyos na Jehova asin sa saiyang Aki, si Jesu-Cristo. Naaraman ko na mapagmalasakit si Jehova asin nakukulgan siya pag nagsasakit kita. (Isaias 63:9) Mas lalo pa akong napahiro kan pagkamuot nin Diyos sa sako saka kan sakripisyo kan saiyang Aki alang-alang sa sako. (1 Juan 4:10) Napag-isip-isip ko na nagin mapasensiya sako si Jehova “huling habo niyang malaglag an siisay man, imbes, gusto niya na an gabos makapagsulsol.” (2 Pedro 3:9) Namati ko na gusto ni Jehova na magin harani ako sa saiya.—Juan 6:44.

 Nagpuon akong mag-atender sa mga pagtiripon kan kongregasyon kan mismong semanang idto. Halaba kaidto an buhok ko, nakahikaw, saka nakakatakot an itsura, pero an mga Saksi trinato ako na garo ako kapamilyang haloy nindang dai nahiling. Tunay talaga sindang mga Kristiyano. Pagmati ko garo ako nakabalik sa harong ni lolo saka ni lola, pero mas magayon pa iyan.

 Dai nahaloy, padikit-dikit na binabago kan Bibliya an buhay ko. Pinatusaran ko an buhok ko, ipinundo ko an gabos na imoral na gibo, pati an pagdroga saka pag-inom. (1 Corinto 6:9, 10; 11:14) Gusto kong paugmahon si Jehova. Kaya pag naaraman ko na dai niya inuuyunan an sarong bagay na ginigibo ko, dai ko iyan ipinapangatanusan. An totoo sa parati, garo sinasaksak an puso ko. Sinasabi ko sa sadiri ko, ‘Bakong tama an ginigibo mo.’ Kaya hinihinguwa kong mabago tulos an sakong kaisipan saka paggawi. Bilang resulta, nahiling ko na nagin mas marahay an buhay ko pag ginigibo ko kun ano an pagbuot ni Jehova. Kan Hulyo 29, 1989—anom na bulan puon kan mag-Bible study ako—nabawtismuhan ako bilang saro sa mga Saksi ni Jehova.

 Tinabangan ako kan Bibliya na baguhon an sakong personalidad. Kaidto, nagigin madahas ako pag kinukomprontar ako nin sarong anggot na tawo. Pero ngunyan, pinagmamaigutan ko na “makipagkatuninungan sa gabos na tawo.” (Roma 12:18) Dai ko ini magigibo kun mayo an tabang ni Jehova paagi sa puwersa kan saiyang Tataramon saka banal na espiritu.—Galacia 5:22, 23; Hebreo 4:12.

 Kaidto, adik ako sa droga, bayolente, saka imoral, pero ngunyan hinihinguwa kong paugmahon an Diyos na Jehova asin itao an sakong pinakamakakaya. Kaiba diyan an pagtabang sa iba na mamidbid siya. Pakalihis nin pirang taon puon kan mabawtismuhan ako, nagbalyo ako sa ibang nasyon para tumabang sa paghuhulit sa mga lugar na dakula an pangangaipo. Sa nakaaging mga taon, nauugma akong tukduan an dakul na tawo asin mahiling kun paano pinapagayon kan Bibliya an buhay ninda. Maugmahon man ako ta nagin Saksi ni Jehova si Mama. Nakatabang saiya su nahiling niyang positibong mga pagbabago sa ugali saka paggawi ko.

 Kan 1999, sa El Salvador, naggradwar ako sa inaapod ngunyan na School for Kingdom Evangelizers. Sinanay ako kan paadalan na iyan na magin andam na manginot sa gibuhon na paghuhulit asin pagtutukdo, saka pagpapastor sa kongregasyon. Kan taon man sanang iyan, pinakasalan ko si Eugenia. Magkaibanan kaming naglilingkod nin bilog na panahon sa Guatemala.

 Ngunyan, imbes na magin disganado sa buhay, maugmahon akong marhay. An pagsabuhay sa mga itinutukdo kan Bibliya nakatabang sako na makatalingkas sa seksuwal na imoralidad saka kadahasan asin nagtao iyan sako nin buhay na pano nin tunay na pagkamuot asin katuninungan.