“Kun gusto mo talagang makanuod dapit sa Diyos, padagos kang mag-iba sa mga Saksi ni Jehova.” Napangalas ako kan madangog ko an komentong iyan. Kan panahon na idto, nakikipag-adal na ako sa mga Saksi ni Jehova. Pero para masabutan nindo an reaksiyon ko, maistorya nguna ako nin dikit mapadapit sa buhay ko.

 Namundag ako sa Quezaltepeque, sarong banwa sa El Salvador. Ikaanom ako sa 15 aki. Hininguwa kan mga magurang ko na padakulaon akong onesto saka nagsusunod sa ley. Saka paminsan-minsan, nagduduman samo si Leonardo asin an iba pang mga Saksi tanganing tukduan kami sa Bibliya. Pero binaliwala ko an mga itinukdo sa sako asin naggibo nin sunod-sunod na salang desisyon. Sa edad na 14, nagpuon akong mag-inom saka magdroga kaiba kan mga barkada ko sa eskuwelahan. Saro-saro sindang nagpundo sa pagklase para magbali sa gang, dangan inarog ko man an maraot na halimbawa ninda. Pirmi kaming nasa kalye, nangingikil nin kuwarta saka naghahabon para masuportaran an mga bisyo mi.

 An gang an nagin pamilya ko. Naniniwala ako na dapat akong magin maimbod sainda. Halimbawa, sarong aldaw inatake kan kaibahan ko sa gang na bangag sa droga an kataid ko nin harong. Natringkahan kan kataid ko nin harong an amigo ko asin nakaapod siya sa pulis. Angguton ako kaya pigparahampak ko su kotse niya tanganing butasan niya an amigo ko. Nakimahirak an kataid ko nin harong na pumundo na ako ta pigraraot ko na su mga bintana saka an bilog na kotse, pero dai ako nagdangog saiya.

 Kan 18 anyos ako, nakaengkuwentro kan gang mi an mga pulis. Kan idadaklag ko na su ginibo ming bomba, nagsabog iyan sa kamot ko—dai ko aram an nangyari. An nagigirumduman ko sana rurunot an kamot ko—dangan nadismayo na ako. Pagmata ko sa ospital, naaraman kong wara na an tuo kong kamot saka dai na nakakadangog an tuo kong talinga dangan haros buta na an tuo kong mata.

 Dawa arog kaidto su kamugtakan ko, nagbalik tulos ako sa gang pakaluwas sa ospital. Pero dai nahaloy pagkatapos kaiyan, inaresto ako kan pulis, asin iprineso. Mantang nakapreso, nagkusog an relasyon ko sa mga kaibahan ko sa gang. Pirmi kaming iribanan—puon sa pagpamahaw, na diyan nagpupuon kaming mag-marijuana, sagkod sa pagturog.

 Kan nasa presuhan ako, nagbisita sako si Leonardo. Mantang nag-uulay kami, itinukdo niya an sarong tatu sa tuo kong takyag. Naghapot siya: “Aram mo an buot sabihon kan tulong tuldok na tatung ini?” “Siyempre,” an simbag ko, “sex, droga, saka rock and roll.” Pero sinabi ni Leonardo: “Sa hiling ko an buot sabihon kaiyan ospital, presuhan, saka kagadanan. Kaidto nasa ospital ka, ngunyan nasa presuhan na. An sunod aram mo na.”

 Dai ako nakagirong sa sinabi ni Leonardo. Tama siya. Huli sa paagi nin pamumuhay ko, garo man sana kinakalot ko an lubungan ko. Inalok ako ni Leonardo na makipag-adal nin Bibliya sa saiya, asin inako ko iyan. An mga nanudan ko sa Bibliya nakapahiro sako na baguhon an sakong buhay. Halimbawa, sinasabi sa Bibliya na “an maraot na pag-iriba minaraot kan marahay na paggawi.” (1 Corinto 15:33, nota sa ibaba) Kaya, an saro sa mga inot kong kinaipuhan na gibuhon iyo na maghanap nin bagong mga amigo. Tanganing magibo iyan, dai na ako nag-iiba sa mga miting kan gang, imbes, nagpuon akong mag-atender sa mga pagtiripon na ginigibo kan mga Saksi ni Jehova sa presuhan. Sa pagtiripon kan mga Saksi, nabisto ko an sarong preso na si Andrés na nabawtismuhan sa presuhan bilang saro sa mga Saksi ni Jehova. Inimbitaran niya akong mamahaw kaiba niya. Puon kaidto, dai ko na pinupunan an aldaw paagi sa pag-marijuana. Imbes, kada aga pinag-uulayan mi ni Andrés an dapit sa sarong teksto sa Bibliya.

 Narisa tulos kan mga miyembro kan gang na nagbabago na ako. Kaya, sinabi kan saro sa mga lider kan gang na kakaulayon niya ako. Natakot ako. Dai ko aram kun ano an gigibuhon niya sako pag naaraman niya an plano kong gibuhon, huling haros imposible na makabutas sa gang. Sinabi niya: “Narisa ming dai ka na nag-iiba sa mga miting ta ah; sa mga pagtiripon ka na kan mga Saksi ni Jehova nag-iiba. Ano an plano mong gibuhon?” Sinabi ko saiya na gusto kong magpadagos sa pag-adal sa Bibliya saka baguhon an buhay ko. Nabigla ako kan sabihon niya na irerespeto ako kan gang basta patunayan ko na gusto ko talagang magin Saksi ni Jehova. Dangan sinabi niya: “Kun gusto mo talagang makanuod dapit sa Diyos, padagos kang mag-iba sa mga Saksi ni Jehova. Inaasahan mi na mapundo ka na sa paggibo nin maraot. Congrats! Tama an pinili mo. Matatabangan ka talaga kan mga Saksi. Kan nasa Estados Unidos ako, nakipag-adal ako kaidto sa sainda, saka Saksi an pira kong kapamilya. Dai ka matakot. Magpadagos ka lang.” Dawa arog kaiyan, natakot pa man giraray ako, pero grabe an kaugmahan ko. Udok sa puso akong nagpasalamat sa Diyos na Jehova. Pagmati ko garo ako gamgam na pinatalingkas sa hawla, asin nasabutan ko an sinabi ni Jesus: “Maaaraman nindo an katotoohan, asin an katotoohan mapatalingkas sa saindo.”—Juan 8:32.

 Pero binalo ako kan pira kong dating amigo paagi sa pag-alok sako nin droga. Aadmitiron ko, minsan nadadara ako. Pero sa paglihis nin panahon, pagkatapos nin dakul na udok na pagpamibi, nahali ko man giraray an mga bisyo ko.—Salmo 51:10, 11.

 Kan makalibre na ako sa presuhan, paghuna kan dakul mabalik ako sa dati kong buhay, pero bako iyan an ginibo ko. Imbes, parati akong nagbisita sa presuhan tanganing sabihon man sa iba pang mga preso kun ano an mga nanudan ko sa Bibliya. Nakumbinsir na man nanggad an mga dati kong amigo na nagbago na ako. Pero nakakamundo ta an mga dati kong kalaban dai pa.

 Sarong aldaw kan magluwas ako para maghulit, bigla na sana kaming pinalibutan kan kapartner ko nin armadong mga miyembro kan dating kalaban na gang, asin gusto akong gadanon. Magalang pero kusog-buot na ipinaliwanag kan kapartner ko na bako na akong miyembro nin gang. Hininguwa ko man na magdanay na kalmado. Pagkatapos ninda akong bugbugon saka patanidan na dai na magduman giraray sa lugar na idto, ibinaba na kan mga lalaki an armas ninda asin pinahali na kami. Nabago talaga kan Bibliya an buhay ko. Kun kaidto ’to, siguradong mabalos ako. Pero ngunyan, sinusunod ko na an sadol kan Bibliya sa 1 Tesalonica 5:15: “Siguraduhon nindo na dai nin siisay man sa saindo an magbalos nin maraot sa saro na naggibo sa saiya nin maraot, kundi pirming pagmaigutan na gumibo nin marahay sa lambang saro asin sa iba.”

 Puon kan magin saro akong Saksi ni Jehova, pinagmaigutan ko nang magin onestong tawo. Dai iyan nagin madali. Dawa arog kaiyan, sa tabang kan Diyos na Jehova, kan sadol sa Bibliya, asin kan suporta kan sakong bagong mga amigo, nagibo ko iyan. Habo ko na nanggad balikan an dati kong mga gibo.—2 Pedro 2:22.

 Bayolenteng lalaki ako na pano-pano nin kaanggutan kaidto. Sigurado ako na kun ipinagpadagos ko an arog kaiyan na buhay, gadan na ako ngunyan. An mga nanudan ko sa Bibliya nakapabago sa sako. Ipinundo ko an mga bisyo ko. Nanudan kong magin mapagpatuninong sa dati kong mga kalaban. (Lucas 6:27) Saka may mga amigo na ako ngunyan na nakakatabang sa sako na magkaigwa nin marahay na mga kuwalidad. (Talinhaga 13:20) Maugma asin may katuyuhan an buhay ko mantang naglilingkod sa Diyos na andam na patawadon an gabos na ginibo kong maraot.—Isaias 1:18.

 Kan 2006, nag-atender ako sa sarong espesyal na pagsasanay para sa mga daing agom na Kristiyanong ebanghelisador. Pakalihis nin pirang taon, nagpakasal kami kan magayon kong agom, asin magkaibanan ming pinapadakula an aki ming babayi. Ngunyan, naggagamit ako nin dakul na panahon para itukdo sa iba an mga prinsipyo sa Bibliya na nakatabang sa sako. Naglilingkod man ako bilang elder sa kongregasyon mi, asin hinihinguwa kong tabangan an mga aki asin hoben na malikayan an mga sala na nagibo ko kan ako nasa edad ninda. Imbes na magkalot kan sadiri kong lubungan, nagtutugdok ako ngunyan para sa daing katapusan na puturo na ipinapanuga nin Diyos sa Bibliya.