Hali sa Tonga an pamilya ko, sarong nasyon na igwa nin mga 170 isla, na nasa timog-sulnupan na Pasipiko. Simple lang an buhay sa Tonga, mayong kuryente o awto. Pero may sadiri kaming suplay nin tubig sa harong saka may ataman kaming pirang manok. Pag bakasyon, ako saka an duwa ko pang tugang na lalaki nagtatabang sa samuyang ama sa pag-asikaso sa tanuman mi. May mga tanom kaming batag, ubi, linsa, saka kamoteng-kahoy. Pandagdag ini sa dikit na ginaganar ni Papa sa manlain-lain na trabaho niya. Arog kan ibang mga taga isla, dakula an respeto kan pamilya mi sa Bibliya, asin regular na nagsisimba. Pero naniniwala pa man giraray kami na an solamenteng paagi para magkaigwa nin marahay na buhay iyo an pagbalyo sa mas asensadong nasyon.

 Kan 16 anyos ako, tinabangan kan tiyo ko an pamilya mi na makabalyo sa California, U.S.A. Nadipisilan talaga kaming makibagay sa bagong kultura! Nagrahay an kamugtakan mi sa pinansiyal, pero nakaistar kami sa tios na lugar na diyan lakop an krimen saka pagdroga. Parating may baradilan pag banggi, asin kadaklan sa mga kataraid mi takot sa mga gang nin kriminal. Dakul na tawo duman an may badil bilang proteksiyon o para gamiton sa pagresolber sa mga iriwal. Sagkod ngunyan nasa daghan ko pa an sarong bala na resulta kan saro sa mga iriwal na iyan.

 Kan hayskul ako, gusto kong akuon ako kan ibang mga hoben. Kaya nagpuon akong mag-iba sa mga wild party, mag-inom nin grabe, magin madahas, asin maggamit nin droga. Dangan nagin adikto ako sa cocaine. Nanghahabon ako para makabakal nin droga. Dawa ngani debotong mga parasimba an mga kapamilya ko, dai lamang ninda ako tinawan nin paggiya na makakatabang sako na malabanan an panggigipit kan mga kairiba ko na gumibo nin sala. Dakul na beses akong inarestar huli sa pagigin madahas ko. Mayong direksiyon an buhay ko! Pag-abot nin panahon napreso ako.

 Sarong aldaw kan 1997, mantang nakapreso ako, narisa kan sarong kapwa ko preso na may kapot akong Bibliya. Pasko kaidto, asin para sa kadaklan na mga taga Tonga, banal na marhay an panahon na iyan. Hinapot niya ako kun aram ko kun ano talaga an sinasabi kan Bibliya manungod sa pagkamundag ni Cristo, pero mayo akong kaide-ideya sa sinasabi kaiyan. Ipinahiling niya sako an simpleng pagkasaysay kan Bibliya manungod sa pagkamundag ni Jesus, asin narealisar ko na dai man lamang binanggit duman an dakul na tradisyon sa Pasko. (Mateo 2:1-12; Lucas 2:5-14) Grabe an pagngalas ko, asin napaisip ako kun ano pa an mga itinutukdo kan Bibliya. An presong idto nag-aatender sa mga pagtiripon na ginigibo kan mga Saksi ni Jehova kada semana sa presuhan, asin nagdesisyon akong mag-iba saiya. Pinag-uulayan ninda kaidto an manungod sa libro sa Bibliya na Kapahayagan. Kakadikit sana an nasabutan ko, pero nahiling ko na gabos na itinutukdo ninda hali sa Bibliya.

 Kan alukan ako kan mga Saksi nin pag-adal sa Bibliya, maugma kong inako iyan. Sa kainot-inuting pagkakataon, naaraman ko an manungod sa panuga kan Bibliya na sarong paraiso digdi sa daga sa maabot na panahon. (Isaias 35:5-8) Nagin malinaw sa sako na tanganing mapaugma an Diyos, kaipuhan kong gumibo nin dakulang mga pagbabago sa buhay ko. Narealisar ko na dai ako papalaugon kan Diyos na Jehova sa ipinanugang Paraiso kun ipapadagos ko an arin man sa mga bisyo ko. (1 Corinto 6:9, 10) Kaya nagin determinado ako na dai na magin arangguton, ipundo na an pagsigarilyo, pagburat, saka pagdroga.

 Kan 1999, bago ako makalibre sa presuhan, ilinipat ako sa sarong immigration camp. Labing sarong taon akong mayong nakaulay na Saksi. Pero determinado akong ipadagos an ginigibo kong mga pagbabago. Kan taon 2000, kinanselar kan gobyerno an permiso sako na magdanay sa Estados Unidos, tapos idineportar ako pabalik sa Tonga.

 Kan nasa Tonga na ako, naghanap tulos ako nin mga Saksi ni Jehova asin ipinadagos an pag-adal ko nin Bibliya. Gustong-gusto ko an mga nanunudan ko, saka naghanga akong marhay kan mahiling kong an gabos na itinutukdo kan mga Saksi sa isla ibinabasar ninda sa Kasuratan, arog mismo kan ginigibo kan mga Saksi sa Estados Unidos.

 Midbid sa komunidad an sakong ama huling halangkaw an posisyon niya sa simbahan. Kaya kan inot, dai masabutan saka ikinairitar kan sakong pamilya an pakikiiba-iba ko sa mga Saksi ni Jehova. Pero kan huri, naugma an mga magurang ko huling natatabangan ako kan mga prinsipyo sa Bibliya na linigon an buhay ko.

 An saro sa pinakanasakitan akong baguhon iyo an manungod sa sarong inumon na sa parati inaabuso kan mga taga Tonga. Dakul na lalaki sa Tonga an dakul na oras na nag-iinom kada semana nin kava, sarong inumon na pampakalma hali sa pinukating gamot kan tanom na paminta. Pagbalik ko sa Tonga, nakaugalian kong haros burubangging magduman sa sarong club para mag-inom nin kava sagkod na haros mawaran na ako nin malay. Nasakitan akong magbago huli sa mga kairiba ko na mayong pagpapahalaga sa mga pamantayan kan Bibliya. Pag-abot nin panahon, natabangan akong marealisar na dai nauugma an Diyos sa mga bisyo ko. Kaya binago ko iyan tanganing magkaigwa ako kan bendisyon saka pag-uyon nin Diyos.

 Nagpuon akong mag-atender sa gabos na pagtiripon kan mga Saksi ni Jehova. An pakikiiba-iba kong ini sa mga tawong naghihinguwang mapaugma an Diyos nakatabang sako na malabanan an mga sugot. Kan 2002, nabawtismuhan ako bilang saro sa mga Saksi ni Jehova.

 Nakinabang ako sa pagigin mapasensiya nin Diyos arog kan sinasabi sa Bibliya: “Si Jehova [mapasensiya] sa saindo huling habo niyang malaglag an siisay man, imbes, gusto niya na an gabos magkaigwa nin oportunidad na magsulsol.” (2 Pedro 3:9) Puwede man kutanang kaidto pa niya linaglag an maraot asin lumang sistemang ini, pero tinugutan niyang magdanay iyan nin igong panahon para magkaigwa nin dayupot na relasyon sa saiya an mga tawong arog sako. Gustong-gusto kong isipon na puwede niya akong gamiton para tabangan man an iba na magin amigo siya.

 Sa tabang ni Jehova, nagkaigwa nin direksiyon an buhay ko. Dai na ako nanghahabon para masuportaran an nakakagadan kong bisyo. Imbes, hinihinguwa kong tabangan an iba na magin amigo man sinda ni Jehova. Huli sa pakikiasosyar ko sa mga Saksi ni Jehova, nabisto ko an magayon kong agom na si Tea. Kaiba an aki ming lalaki, igwa kami nin maugmahon na pamilya. Iriba ming itinutukdo sa iba an sinasabi kan Bibliya manungod sa paglaom sa maabot na panahon na mabuhay nin daing sagkod sa sarong matuninong na paraiso.