Dakul na turista an nagbibisita sa midbid na busay harani sa banwa nin Pagsanjan sa Pilipinas. Sa lugar na iyan nagdakula sa tios na kamugtakan an sakong ama, si Nardo Leron. Napano nin kaanggutan si Tatay huli sa grabeng korapsiyon sa gobyerno, pulisya, asin sa trabaho niya.

 Maigot na nagtrabaho an mga magurang ko para sa saindang walong aki. Parati sindang mayo sa harong sa halawig na panahon para mag-asikaso kan mga pananom ninda sa kabukidan. Sa parati, nawawalat kami kan tugang kong si Rodelio, asin parati kaming gutom. Kan aki pa kami, bihira lang kaming makakawat. Puon siyete anyos, kada saro samong magturugang nagtatrabaho na sa sarong plantasyon, na nagpapasan nin magagabat na niyog sa bakilid na mga agihan sa kabukidan. Pag dai mi kayang pasanon, ginuguyod mi na sana iyan.

 Kaipuhan ming tagalan an pangungulog samo ni Tatay, pero mas makulog samo na paghilingon na kinukulgan niya si Nanay. Pinurbaran mi siyang papunduhon, pero mayo kaming naginibo. Plinano mi kaidto ni Rodelio na pag nagdurudakula na kami, gagadanon mi si Tatay. Gustong-gusto mi talagang magkaigwa nin mamumuton na ama!

 Disganado ako asin anggot huli sa pagigin bayolente ni Tatay, kaya naglayas ako kan 14 anyos ako. May panahon na nag-istar ako kun sain-sain sa tinampo, asin nagpuon akong mag-marijuana. Pag-abot nin panahon, nagin bangkero ako na naghahatod nin mga turista sa busay.

 Pakalihis nin pirang taon, nag-eskuwela ako sa sarong unibersidad sa Manila. Pero dahil sa kaipuhan kong magpabalik-balik sa Pagsanjan tanganing magtrabaho pag Sabado asin Domingo, haros mayo akong panahon na mag-adal. Masakiton an buhay ko saka mayong direksiyon, asin dai na nababawasan kan marijuana an namamatian kong kahaditan. Nagpuon akong maggamit nin shabu (methamphetamine), cocaine, asin heroin. Siyempre kaiba na pirmi kan droga an imoralidad. Haros puro pagtios, inhustisya, asin pagsakit an nahihiling ko. Anggot ako sa gobyerno ta sa hiling ko iyan an dahilan kan gabos na iyan. Naghapot ako sa Diyos, “Ta’no ta arog kaini an buhay?” Naghanap ako nin simbag sa manlain-lain na relihiyon pero mayo akong nakua. Lalo akong nagdroga tanganing maitago an namamatian kong kawaran nin paglaom.

 Kan 1972, nag-organisar an mga estudyante sa Pilipinas nin mga protesta laban sa gobyerno. Nag-iba ako sa saro sa mga protesta, asin nagin bayolente iyan. Dakul an inaresto, asin pakalihis nin mga bulan, idineklarar an martial law sa bilog na nasyon.

 Nag-istar giraray ako kun sain-sain sa mga tinampo, sa pagkakataon na ini tanganing makadulag sa mga awtoridad huli sa pakikikabtang ko sa rebelyon. Tanganing masuportaran an pagdodroga ko, nanghabon ako, asin kan huri nag-alok nin imoral na serbisyo sa mayayaman asin dayuhan. Mayo akong pakiaram kun mabuhay man ako o magadan.

 Mantang nangyayari iyan, nakipag-adal nin Bibliya si Nanay asin an nguhod kong tugang na lalaki sa mga Saksi ni Jehova. Angguton si Tatay, asin sinurulo niya an saindang mga babasahon na basado sa Bibliya. Pero tinagalan ninda iyan asin nagpabawtismo bilang mga Saksi.

 Sarong aldaw, may Saksing nakipag-ulay ki Tatay mapadapit sa panuga kan Bibliya na maabot an panahon na an tunay na hustisya ipapautob sa bilog na daga. (Salmo 72:12-14) Nagustuhan na marhay ni Tatay an paglaom na ini kaya nagdesisyon siyang siyasaton mismo iyan. Sa Bibliya, naaraman niya bako sana an panuga nin Diyos na makatanusan na gobyerno kundi pati man an mga kahagadan nin Diyos para sa mga agom na lalaki asin ama. (Efeso 5:28; 6:4) Pakalihis nin halipot na panahon, siya saka an gabos kong tugang nagin mga Saksi. Huling harayo ako sa harong, mayo akong kaaram-aram sa mga nangyayaring ini.

 Kan 1978, nagbalyo ako sa Australia. Alagad dawa sa matuninong asin asensadong nasyon na ini, dai pa man giraray ako magkaigwa nin katuninungan nin isip. Nagpadagos an bisyo kong pag-inom asin pagdroga. Kan taon man sanang iyan, may nagdalaw sakong mga Saksi ni Jehova. Nagustuhan ko an ipinahiling ninda sa Bibliya mapadapit sa matuninong na daga, pero ingat ako na makiimbuwelto sa sainda.

 Dai nahaloy pagkatapos kaini, nagbalik ako sa Pilipinas para magbakasyon nin pirang semana. Sinabi sako kan mga tugang ko na maigot na naghinguwa si Tatay para magbago, pero angguton pa man giraray ako kaya linikayan kong mahiling o makaulay siya sa ano man na paagi.

 Ipinaliwanag sa sako kan nguhod kong tugang na babayi gamit an Bibliya kun taano ta an buhay pano nin pagsakit asin inhustisya. Nagngalas ako ta an mga hapot ko nasimbag nin sarong tin-edyer na dikiton sana an eksperyensiya sa buhay. Bago ako maghali, tinawan ako nin Tatay kan librong Puwede Kamong Mabuhay Sagkod Lamang sa Paraiso Digdi sa Daga. a Sinabi niya: “Dai ka na magparahanap kun sain pa. Matatabangan ka kan librong ini na manumpungan kun ano an hinahanap mo.” Dinagka niya ako na maghanap nin mga Saksi ni Jehova pagbalik sa Australia.

 Ginibo ko an sinabi ni Tatay asin nakahanap ako nin Kingdom Hall kan mga Saksi ni Jehova harani sa harong ko sa Brisbane. Nag-uyon ako na regular na magpa-Bible study. Ipinahiling sa sako kan mga propesiya sa Bibliya arog kan nasa Daniel kapitulo 7 asin Isaias kapitulo 9 na an gobyerno nin Diyos, na mayo lamang nin korapsiyon, mamamahala sa sato sa maabot na panahon. Nanudan ko na maistar kita sa paraisong daga. Gusto kong magin kaako-ako sa Diyos, alagad narealisar ko na kakaipuhanon kong kontrulon an sakong emosyon, pumundo sa pagdroga asin pag-inom, asin ipundo an imoral kong pamumuhay. Sinuwayan ko an babaying kasaro ko, asin ipinundo an mga bisyo ko. Mantang nagtatalubo an pagtitiwala ko ki Jehova, ipinapamibi ko na tabangan niya akong magibo an iba pang mga pagbabago.

 Luway-luway kong narealisar na an nanunudan ko kayang makapabago nin tawo. Sinasabi kan Bibliya na kun hihinguwahon, kaya niyatong isulot an “bagong personalidad.” (Colosas 3:9, 10) Mantang hinihinguwa kong gibuhon ini, narealisar kong tibaad totoo man nanggad an mga nadangog ko dapit ki Tatay na nagbago na an saiyang personalidad. Imbes na makamati nin grabeng kaanggutan, gusto ko nang makipag-ulian saiya. Sa katapos-tapusi, pinatawad ko si Tatay asin hinali an grabeng kaanggutan na dara-dara ko puon pa kan aki ako.

 Kan hoben pa ako, parati akong nagpapadara sa maraot na mga gibo kan iba. Nagin totoo sa sako an patanid kan Bibliya—napariwara ako huli sa maraot na mga pag-iriba. (1 Corinto 15:33) Pero nagkaigwa ako nin mapagtitiwalaan na mga amigo sa mga Saksi ni Jehova, asin tinabangan ninda ako na magbago. Asin sa sainda ko man namidbid an sakong marahayon na agom, si Loretta. Magkaibanan ming tinutukduan an iba kun paano sinda matatabangan kan Bibliya.

 Salamat sa Bibliya nahiling ko an paghuna kong imposibleng mangyari ki Tatay—an magin mamumuton na agom ki Nanay asin magin mapakumbaba saka mapagpatuninong na Kristiyano. Kan maghilingan kami pakabawtismo sako bilang Saksi ni Jehova kan 1987, kinugos ako ni Tatay sa inot na pagkakataon sa buhay ko!

 Sa laog nin labing 35 taon, magkaiba si Tatay asin si Nanay na nagpaabot sa mga tawo kan paglaom sa Bibliya. Nagi siyang mahigos asin mapagmalasakit na lalaki na midbid sa pagtabang sa mga tawo. Sa mga taon na idto, nanudan kong igalang asin mamutan siya. Proud talaga akong mamidbid na aki niya ako! Nagadan siya kan 2016, pero dai ko siya malilingawan, dahil aram kong pareho kaming naggibo nin dakulang mga pagbabago sa samong personalidad mantang inaaplikar mi an mga katukduan sa Bibliya. Nawara na an kaanggutan na namatian ko. Saka nagpapasalamat akong marhay na nanumpungan ko an sakong Ama sa langit, an Diyos na Jehova, na nanunugang tatapuson an gabos na problema nin mga pamilya sa bilog na kinaban.