Nagdakula ako sa pamilyang Katoliko sa Rochester, New York. Nagsuwayan an mga magurang ko kan otso anyos ako. Kaya pag Lunes sagkod sa Biyernes, duman ako nag-iistar ki Mama sa sarong apartment na para sa mga mayong kaya sa buhay. Tapos pag Sabado asin Domingo, duman ako nag-iistar ki Papa sa lugar nin mayayaman. Nahiling ko kun gurano nasakitan si Mama sa pagpadakula samong anom na aki kaya nangarap akong magin mayaman para matabangan ko an pamilya ko.

 Gusto ni Papa na may maabot ako sa buhay, kaya naggibo siya nin paagi para makapasyar ako sa sarong prestihiyosong eskuwelahan nin hotel management. Nagustuhan ko iyan kaya nag-enrol ako, na iniisip na sinisimbag na nin Diyos an pamibi ko na magin mayaman saka maugma. Nagklase ako nin hotel administration, business law, saka corporate finance sa laog nin limang taon mantang nagtatrabaho sa sarong casino hotel sa Las Vegas, Nevada.

 Sa edad na 22, nagin assistant vice president ako sa sarong casino hotel. Masasabing mayaman na ako saka mapanggana sa buhay, na sa parati nagkakakan nin pinakamasisiram na kakanon saka nag-iinom nin pinakamamahalon na mga arak. Sinasabi kan mga amigo ko sa negosyo, “Pirmi mong tandaan na sa kuwarta nag-iitok an gabos na bagay sa kinaban.” Para sainda, kuwarta an sekreto para magin tunay na maugma.

 Kaiba sa trabaho ko an pag-asikaso sa mayamanon na mga tawong nagpapa-Las Vegas para magsugal. Mayayaman na ngani sinda, pero garo bako sindang maugma. Nagpuon na man lugod akong dai magin maugma. Sa katunayan, mantang mas dakul na kuwarta an nagaganar ko, mas lalo man akong napupurisaw saka dai nakakaturog sa banggi. Iniisip ko na nganing tapuson na an buhay ko. Dahil disganado ako sa klase nin buhay na igwa ako, hinapot ko an Diyos, “Sain ko mahahanap an tunay na kaugmahan?”

 Kan panahon man na idto, su duwang ate ko na nagin Saksi ni Jehova naglipat sa Las Vegas. Dawa sinayumahan ko an mga literaturang pigtatao ninda, nag-uyon akong basahon an Bibliya ko kaiba ninda. Sa Bibliya ko, nakakulor pula su mga sinabi ni Jesus. Dahil nagtutubod ako sa gabos na sinabi ni Jesus, diyan nagpokus sa Ate. Nagbabasa man ako nin Bibliya pag ako lang.

 Nagngalas ako sa dakul na bagay na nabasa ko. Halimbawa, sinabi ni Jesus: “Sa pagpamibi, dai kamo magparatiwa-tiwa arog kan mga pagano, na naghuhunang dadangugon sinda dahil sa kadakulan kan sinasabi ninda.” (Mateo 6:7, The New American Bible) Kaidto, may padi na nagtao sako nin sarong ladawan ni Jesus tapos sinabihan niya ako na kun mangangadyi ako sa ladawan na iyan nin sampulong Ama Niyamo saka sampulong Tara Kagurangnan Maria, itatao nin Diyos sako an ano man na kantidad nin kuwarta na kaipuhan ko. Pero kun uuruutruhon ko an parehong mga tataramon, bako daw na garo man sana ako nagpaparatiwa-tiwa? Nabasa ko man na sinabi ni Jesus: “Dai nindo pag-apudon na saindong ama an siisay man sa daga; igwa kamo nin saro sanang Ama na nasa langit.” (Mateo 23:9, NAB) Kaya naisip ko man, ‘Taano ta “Ama” an apod mi kan mga kapwa ko Katoliko sa samong mga padi?’

 Kan basahon ko an libro sa Bibliya na Santiago, kaidto ko na pinunan na pag-isipan talaga an manungod sa pagigin mapanggana ko sa kinaban. Sa kapitulo 4, isinurat ni Santiago: “Dai nindo aram na kun namumutan nindo an kinaban nangangahulugan iyan na nakikiiwal kamo sa Diyos? Kun siring, an siisay man na gustong mamuot sa kinaban ginigibo an saiyang sadiri na kaiwal nin Diyos.” (Santiago 4:4, NAB) Mas napaisip pa ako kan sinasabi sa bersikulo 17: “Para sa saro na aram kun ano an tamang gibuhon asin dai iyan ginigibo, iyan sarong kasalan.” Dangan inapudan ko an mga tugang kong babayi tapos sinabi ko sainda na mahali na ako sa industriya nin casino saka hotel dahil may mga ginigibo diyan na bako nang akseptable para sako, kaiba na an pagsugal saka kahanaban.

 Gusto kong magrahay an relasyon ko sa Diyos pati man sa mga magurang ko saka mga tugang. Kaya nagdesisyon akong pasimplehon an buhay ko para magkaigwa ako nin mas dakul na panahon para magibo iyan. Pero bakong madali na gumibo nin mga pagbabago. Halimbawa, nakaresibi ako nin nakakatentar na mga alok na magkaigwa nin mas dakulang trabaho sa industriya nin casino saka hotel na an gaganaron doble o triple kan suweldo ko. Pero pagkatapos kong ipamibi iyan, nagdesisyon ako na habo ko na kan arog kaining buhay. Nag-resign ako sa trabaho, naglipat sa garahe ni Mama, tapos nagpundar ako nin sarong sadit na negosyo na pag-laminate nin mga menu nin restawran.

 Maski ngani natabangan ako kan Bibliya na magkaigwa nin mas marahay na mga priyoridad, habo ko pa man giraray na mag-atender sa mga pagtiripon kan mga Saksi ni Jehova. Hinapot ako na Ate kun ano ta habo ko sa mga Saksi. Sinabi ko: “An Diyos kaya nindong si Jehova pinagsusuruway an mga pamilya. An maitatao ko sanang panahon sa pamilya iyo na pag Pasko saka birthday, tapos dai man kamo nagseselebrar kaiyan.” Nagpuon na maghibi an saro sa mga tugang kong babayi tapos hinapot ako: “Hain ka sa ibang mga aldaw kan bilog na taon? Gusto ming makaibanan ka ano man na oras. Pero sa mga okasyon sanang iyan gusto mong magdigdi samo—tapos dahil sana ta para saimo obligasyon iyan.” Nataros talaga kaiyan an puso ko, kaya naghibi na man ako kaiba niya.

 Kan masabutan ko na kun gurano kanamumutan kan mga Saksi ni Jehova an saindang pamilya—saka kun gurano ako kasala—nagdesisyon akong mag-atender sa saro sa mga pagtiripon ninda sa Kingdom Hall sa lugar mi. Nabisto ko diyan si Kevin, na sarong eksperyensiyadong paratukdo sa Bibliya na iyo an nag-Bible study ako.

 Si Kevin saka an agom niya igwa nin balanse saka simpleng pamumuhay kaya nakakatao sinda nin pinakadakul na panahon na posible para tabangan an iba na masabutan an Bibliya. Paagi man sa paghanapbuhay, nagkaigwa sinda kan kinakaipuhan na kuwarta para makabiyahe pa-Africa saka Central America, na diyan nagtabang sinda sa pagtugdok nin mga sangang opisina para sa mga Saksi. Ugmahon sinda, saka namumutan ninda an lambang saro. Kaya naisip ko, ‘An buhay na iyan an pinapangarap ko.’

 Ipinahiling sako ni Kevin an sarong video manungod sa kaugmahan nin pagmimisyonero, asin nagdesisyon ako na iyan an gusto kong gibuhon. Kan 1995, pagkatapos nin anom na bulan na maigot na pag-adal sa Bibliya, nabawtismuhan ako bilang Saksi ni Jehova. Imbes na maghagad nin kayamanan sa Diyos, nagpuon akong mamibi: ‘Dai mo ako pagtawan nin kadukhaan minsan mga kayamanan.’—Talinhaga 30:8.

 Tunay na mayaman na ako ngunyan—bako sa pinansiyal, kundi sa espirituwal. Nabisto ko an magayon kong agom na si Nuria sa Honduras, asin magkaibanan kaming naglingkod bilang misyonero sa Panama asin ngunyan sa Mexico. Totoo nanggad an sinasabi kan Bibliya: ‘An bendisyon ni [Jehova] an nakakapayaman, asin dai niya iyan dinadagdagan nin [kakulugan]’!—Talinhaga 10:22, An Marahay na Bareta Biblia (Bikol Popular Version).