Nagdakula ako sa lugar na tuninong, makahoy, asin harayo sa sentro kan Tampere, Finland. Bako gayong relihiyoso an pamilya mi pero mahalaga sa samo an edukasyon asin marahay na paggawi. Aleman si Mama, asin kan sadit pa ako, nagbibisita kami paminsan-minsan sa West Germany ta diyan nakaistar si lolo saka si lola.

 Aki pa lang ako mahilig na ako sa isport. Gabos na isport kinakawat ko, pero kan mga 14 anyos ako, nagdesisyon akong magpokus sa tennis. Sa edad na 16, mga duwa o tulong beses akong nagsasanay kada aldaw—duwang sesyon nin professional training dangan nagpapraktis akong solo sa banggi. Gustong-gusto ko an manlain-lain na aspekto nin tennis; an pagkawat kaiyan sarong paagi na mabalo an isip asin hawak ko. Gusto kong nag-iiba sa mga amigo ko saka nag-iinom-inom paminsan-minsan, pero nungka akong naimbuwelto sa mga problemang konektado sa droga o arak. An buhay ko nakasentro sa tennis—iyan an priyoridad ko.

 Nagpuon akong magkawat sa mga ATP tournament kan 17 anyos ako. a Pagkatapos kong manggana sa nagkapirang tournament, nagin midbid ako sa nasyon. Sa edad na 22, kabilang ako sa 50 pinakamatitibay na parakawat nin tennis sa kinaban.

 Sa laog nin dakul na taon, nagbiyahe ako sa manlain-lain na parte kan kinaban para magkawat nin professional tennis. Nakahiling ako nin kahanga-hangang mga lugar, pero namuklat man an mata ko sa pangglobong mga problema, kaiba diyan an krimen, pag-abuso sa droga, asin mga problema dapit sa kapalibutan. Halimbawa, kan nasa Estados Unidos ako, sinabihan kami na dai magduman sa partikular na mga lugar sa nagkapirang siyudad dahil sa halangkaw na bilang nin krimen. Gabos ini nakapurisaw sako. Saro pa, dawa ginigibo ko an sarong bagay na gustong-gusto ko, sa katapusan kan aldaw namamatian kong dai ako kontento.

 An kailusyon kong si Sanna nagpuon na makipag-adal nin Bibliya sa mga Saksi ni Jehova. Medyo napangirit ako na mahiling na relihiyoso palan siya, pero dai ko man kinontra an pag-adal niya. Kan 1990, nagpakasal kami, asin kan sunod na taon, binawtismuhan siya bilang saro sa mga Saksi ni Jehova. Kun dapit sako, dai ko maibibilang na relihiyosong tawo ako, pero naniniwala man ako na may Diyos. Nagigirumduman ko kaidto na pirming nagbabasa nin Bibliya an Aleman kong lola, asin tinukduan niya pa ngani ako kun paano magpangadyi.

 Sarong aldaw, kan magbisita kami ni Sanna sa sarong mag-agom na Saksi, ipinahiling sa sako kan agom na lalaking si Kari an propesiya sa Bibliya mapadapit sa “huring mga aldaw.” (2 Timoteo 3:1-5) Napaisip akong marhay kaiyan; narealisar ko na iyan palan an dahilan kaya marauton an mga nangyayari sa kinaban. Kan aldaw na iyan, dai kami gayong nagparaulay dapit sa relihiyon. Pero diyan ako nagpuon na makipag-ulay ki Kari mapadapit sa Bibliya, asin an gabos na nanudan ko lohikal. Huli sa sibot kong buhay asin parating pagbiyahe, bakong madali para sa samo na regular na maghilingan, pero dai iyan nakaulang ki Kari. Sinisimbag niya paagi sa surat an mga hapot ko sa mga sesyon mi nin pag-adal. An gabos na importanteng hapot sa buhay malinaw na nasimbag kan Bibliya, asin luway-luway kong nasabutan an pinakatema kaiyan—na an Kahadian nin Diyos an magpapangyari na mautob an saiyang katuyuhan. Kan maaraman ko an pangaran nin Diyos, na iyo an Jehova, asin an ginibo niya para sa sato, nagkaigwa iyan nin dakulang epekto sa sako. (Salmo 83:18) An nakapahangang marhay sako iyo an saiyang probisyon na atang na pantubos—bako sana iyan teknikal na areglo o legal na pormalidad kundi kapahayagan kan pagkamuot nin Diyos. (Juan 3:16) Nanudan ko man na may oportunidad akong magin amigo nin Diyos asin mabuhay sagkod lamang sa matuninong na paraiso. (Santiago 4:8) Pinunan kong isip-isipon, “Paano ko ipapahiling an sakong pasasalamat?”

 Hinurop-hurop ko an sakong buhay. Nanunudan ko sa Bibliya na an pinakadakulang kaugmahan nakukua sa pagtao, asin nakamati ako nin pagmawot na sabihon sa iba an sakong mga tinutubod. (Gibo 20:35) Bilang propesyonal na atleta, harayo ako sa harong nin mga 200 na aldaw kada taon huli sa mga tournament. An bilog na buhay kan pamilya mi nakasentro sa sako—sa sakong training, rutina, saka karera. Narealisar ko na kaipuhan kong gumibo nin pagbabago.

 Aram kong dai maiintindihan kan dakul kun magdedesisyon akong ipundo an sarong magayon na karera sa isport huli sa relihiyon. Alagad an oportunidad na urog na mamidbid si Jehova asin magkaigwa nin buhay na daing katapusan urog nanggad na mas mahalaga kisa sa ano man na premyo na puwede kong makamtan sa pagkawat nin tennis, kaya madali lang sako an desisyon na idto. Determinado ako na dai magpadara sa tibaad sabihon kan mga tawo—desisyon ko ini. An sarong teksto sa Bibliya na talagang nakapakusog sako na malabanan an panggigipit na iyan iyo an Salmo 118:6: “Si Jehova nasa kampi ko; dai ako matatakot. Ano an magigibo sa sako nin tawo?” (NW)

 Kan panahon man na idto, may mga isponsor na nagtao sako nin magayunon na alok na paagi kaiyan makakakawat ako nin professional tennis sa dakul na taon asin mayo akong poproblemahon. Pero desidido na ako, kaya sinayumahan ko an alok asin pag-abot nin panahon nagpundo sa pagkawat sa mga ATP tournament. Nagpadagos ako sa pag-adal sa Bibliya, asin kan Hulyo 2, 1994, nabawtismuhan ako bilang saro sa mga Saksi ni Jehova.

 Sa sitwasyon ko, mayo man akong inagihan na trahedya na huli kaiyan napaisip ako dapit sa Diyos. Dai man ako naghahanap kan katotoohan. Para sako ayos man an buhay ko saka mayo nang hahanapon pa. Pero, dai ko linalauman, na garo baga hinahalat ako kan katotoohan sa Bibliya na mahanap iyan, naaraman ko na an buhay may mas hararom na kahulugan, asin an sakong buhay nagin urog na mas marahay nanggad kisa sa maiimahinar ko! Kumpara kaidto, mas ugos asin mas nagkakasararo an pamilya mi ngunyan. Asin ugmahon ako ta nagsunod sa lakad ko an tulo kong aking lalaki—bako bilang atleta, kundi bilang Kristiyano.

 Gusto ko pa man giraray magkawat nin tennis. Sa paglihis nin mga taon naghanapbuhay ako paagi sa pagtrabaho sa mga aktibidad na konektado sa tennis, halimbawa, bilang coach asin manager nin sarong tennis center. Pero dai na nakasentro sa tennis an buhay ko. Dati, nagpapraktis ako nin dakul na oras kada semana tanganing magin mas matibay na parakawat nin tennis, magin kampeon. Ngunyan, bilang bilog na panahon na ebanghelisador, nauugma akong gamiton an sakong panahon sa pagtabang sa iba tanganing manudan asin maiaplikar ninda an mga prinsipyo sa Bibliya na nakapabago sa buhay ko. Nahanap ko an pinakadakulang kaugmahan sa pagpriyoridad sa sakong relasyon sa Diyos na Jehova asin sa pagsabi sa iba dapit sa sakong paglaom para sa mas marahay na puturo.—1 Timoteo 6:19.