“Dai ko lamang inisip na mapaglilingkudan ko si Jehova nin lubos.” Iyan an sinabi ni Gwen, na dating taga England, manungod sa saiyang namatian sa paglilingkod niya bilang need-greater sa Albania. a

 Saro si Gwen sa dakul na Saksi na nagbalyo sa Albania para tumabang sa pagtipon sa “mahahalagang bagay kan gabos na nasyon.” (Hageo 2:7) Ano an nakapahiro sa mga ebanghelisador na ini? Anong mga pagbabago an ginibo ninda para magibo ninda iyan? Asin ano an mga nakatabang sainda para makatagal sa ibong kan mga kadipisilan?

 Parareho an dahilan kan gabos na parahayag na nagbalyo para tumabang sa Albania: Namumutan ninda si Jehova asin gusto nindang tabangan an iba na mamidbid siya.

 Bago sinda nagbalyo, naggibo sinda nin mga lakdang para mapahiwas an ministeryo ninda, asin nakatabang iyan sainda para maatubang an mga kadipisilan sa lugar na binalyuhan ninda. Sinabi ni Gwen: “Inot, nag-iba ako sa Albanian-speaking group sa samong lugar. Dangan, nag-atender ako sa sarong kumbensiyon sa Albania. Kan huri, nagbalik giraray ako duman asin nagdanay nin halipot sanang panahon para mas manudan pa an lengguwahe.”

 Kan 23 anyos si Manuela, na taga Italy, nagbalyo siya sa ibang lugar kan nasyon na iyan para tumabang sa sarong sadit na kongregasyon. Sinabi niya: “Apat na taon akong naglingkod duman. Pero naaraman ko na dakulaon palan an pangangaipo sa Albania. Kaya nagpayunir ako diyan nin mga pirang bulan.”

 Si Federica, siyete anyos pa sana kan madangog niya sa sarong kumbensiyon an report manungod sa Albania. Sinabi niya: “Sinabi kan brother na nagtatao kan report na an mga parahayag sa Albania dakul nin napupunan na mga pag-adal sa Bibliya asin na dakul na interesado an nag-aatender sa mga pagtiripon. Kaya sinabi ko sa mga magurang ko na gusto kong magpa-Albania. Nabigla sinda, pero sabi ni Papa, ‘Ipamibi mo iyan, kun iyan an kabutan ni Jehova, dadangugon ka niya.’ Pakalihis nin mga pirang bulan, naimbitaran kaming pamilya na maglingkod sa Albania!” Dakul na taon na an naglihis, asin ngunyan may agom na si Federica, si Orges. Magkaibanan sindang naglilingkod bilang bilog na panahon na mga ministro sa Albania.

 Kan magretiro si Gianpiero, nagbalyo siya sa Albania kaiba an saiyang agom na si Gloria. Sinabi niya: “Pinadakula mi an samuyang mga aking lalaki sa Italy. Tulo sa sainda an nagbalyo sa ibang nasyon para maglingkod kun sain mas dakula an pangangaipo. Napahiro kami kan artikulo sa Torrengbantayan na may temang ‘Puede Ka daw Bumalyo sa Macedonia?’ Pinag-ulayan mi kun paano mi pagkakaniguon an sakong pensiyon para makapaglingkod sa Albania.”

 An mga need-greater kaipuhan na patiinot na magplanong marhay asin gumibo nin mga pagbabago para makabalyo sinda sa sarong lugar. (Lucas 14:28) Kaipuhan man na makahanap sinda nin mga paagi para masuportaran an saindang sadiri. Mantang nasa England pa si Gwen, na nasambit sa inutan, nakiistar nguna siya sa Ate niya para makatipid. Si Sophia asin Christopher, na taga England man, nagsabi: “Ipinabakal mi an samong awto asin an nagkapirang furniture. Plano ming magdanay sa Albania maski sarong taon sana.” Nakakaugma ta nakapagdanay sinda duman nin lampas pa sa sarong taon.

 An ibang mga parahayag nagdadanay sa Albania sa laog nin pirang bulan, tapos minapuli sinda sa pinaghalian nindang nasyon para magtrabaho saka makatipon, dangan minabalik giraray sinda sa Albania. Arog kaiyan an ginigibo ni Eliseo saka Miriam. Ipinaliwanag ni Eliseo: “Nakaistar si Miriam sa sarong lugar sa Italy na pirming dinadayo nin mga turista, duman madali sanang makakua nin temporaryong mga trabaho. Nagduduman kami sa lugar na idto para magtrabaho pag summer nin tulong bulan dangan an matitipon mi iyo an panggurugastos mi sa Albania sa laog nin siyam na bulan. Ginibo mi ini sa laog nin limang taon.”

 Pakatapos na magbalyo, an mga need-greater dapat na mag-adjust na mamuhay sa bagong mga kamugtakan, alagad an sadol asin halimbawa kan mga Saksi sa lugar na dinumanan ninda nakatabang sainda na mapangganahan an mga kadipisilan. Si Sophia, na nasambitan subago, nagsabi: “Pag tiglipot sa Albania, maliputon na marhay an mga harong kumpara sa nakatudan ko sa lugar mi. Nanudan kong magsulot kan mga bado na isinusulot kan mga sister duman paagi sa pag-obserbar sa sainda.” An mag-agom na si Grzegorz asin si Sona, na haling Poland, nagtabang sa magayunon na banwaan kan Prizren, sa Kosovo. b Sinabi ni Grzegorz: “An mga parahayag sa lugar na idto mapakumbabang marhay, mabubuot, saka mapasensiya! Tinatabangan ninda kami na manudan an lengguwahe duman asin dakul pang iba. Halimbawa, itinukdo ninda samo kun sain na tindahan an barato an mga barakalon, saka ipinaliwanag ninda kun paano magbakal sa mga saudan.”

 An mga nagbalyo sa ibang nasyon nakinabang paagi sa dayupot na pakikiamigo sa mga Saksi sa lugar na dinumanan ninda asin sa pag-aram kan background ninda. Ipinaliwanag ni Sona: “Nahiling ko kun paano nababago an buhay kan mga tawo huli sa pagkamuot ni Jehova. Napakusog kan mga tugang an sakong pagtubod huling nahiling ko kun paano ninda lubos na binago an saindang mga paniniwala saka an saindang buhay kan makanuod sinda manungod ki Jehova. Sa laog kan kongregasyon, namamati ming kaipuhan kami, saka nahiling mi kun paano kami makakatabang. Naglilingkod kami kaibanan an mga tugang na nagin mga amigo mi.” (Marcos 10:29, 30) Sinabi ni Gloria: “Dakul akong midbid na mga sister na nagtagal nin maringis na pagkontra kan mga tawo sa saindang komunidad na anggot sa mga Saksi. Napapakusog akong marhay pag nahihiling ko an saindang pagkamuot ki Jehova.”

 Igwa man nin oportunidad an mga need-greater na makanuod nin kapaki-pakinabang na mga leksiyon na puwedeng dai ninda nanudan sa saindang pinaghalian na lugar. Halimbawa, nahiling ninda na an paghali sa komportable asin kinatudan nindang pamumuhay para gumibo nin urog pa para ki Jehova nagtatao nin kaugmahan. Ipinaliwanag iyan ni Stefano sa arog kaining paagi: “Sa nasyon na pinaghalian ko, sa parati naghuhulit ako paagi sa intercom, asin halipot sana an mga presentasyon. Pero an mga taga Albania gusto ninda an haralawig na pag-urulay, lalo na mantang nagkakape-kape. Surupgon ako, kaya kan inot nasusupog talaga ako, saka dai ko aram an sasabihon. Alagad, sa paglihis nin panahon, nanudan kong magpahiling nin interes sa mga tawo, asin ngunyan gustong-gusto ko nang makipag-ulay sa sainda. Mas nakakaugma na an sakong paghuhulit.”

 An mag-agom na si Leah asin William nagbalyo sa Albania hali sa Estados Unidos. Sinabi ni Leah: “An paglilingkod digdi mas nagpahiwas kan samong pananaw saka pagmansay sa buhay. Dakulon kaming nanudan manungod sa pagigin mapag-istimar, paggalang, saka pakikiamigo! Nakanuod kami nin bagong mga pamamaagi sa paghuhulit, pangangatanusan gamit an Kasuratan, saka sa pakikipag-ulay.” Sinabi ni William: “An kadaklan sa mga nagbibisita sa Albania nagugustuhan an magayunon na mga beach. Pero ako, gustong-gusto ko an pagsakat sa magapong Albanian Alps. Pero mga tawo talaga an dahilan kun taano ta gustuhon ko digdi! Dakul na mga baryo sa samong teritoryo an napatotoohan sana nin halipot durante kan espesyal na mga kampanya. Pag nagduduman kami, kun minsan nagkapirang pamilya sana an napapatotoohan mi sa bilog na aldaw.”

 An pinakadakulang kaugmahan kan mga need-greater na ini iyo an mahiling an mga tawo na nag-aako kan maugmang bareta. (1 Tesalonica 2:19, 20) Si Laura, na sarong hoben na sister na nagbalyo sa Albania, nagtao nin halimbawa: “Haloy-haloy man akong naglingkod sa Fier. Sa laog sana nin duwa may kabangang taon, 120 mga baguhan an nakuwalipikar na maghulit! Ako an nag-study sa 16 sa sainda!” Sinabi man kan saro pang sister na si Sandra: “Nagpatotoo ako sa sarong babayi na nagtatrabaho sa saudan. Nagin Saksi siya asin nagpuli sa sadiri niyang lugar. Kan huri ko siyang makaulay, sinabi niya na igwa siya nin 15 inaadalan sa Bibliya!”

 An pira sa mga need-greater na nagbalyo sa Albania mga pirang taon na an nakaagi yaon pa man giraray duman saka maugmang marhay sa saindang paglilingkod. Kun minsan napapangalas sinda pag naaaraman ninda na an banhing haloy na nindang isinabwag nagbunga na ngunyan. (Eclesiastes 11:6) Si Christopher, na sinambit sa inutan, nagsabi: “Dinulok ko an sarong lalaki na nagin Bible study ko kan bago pa lang akong magbalyo sa Albania. Naugma ako kan iistorya niya nin detalyado su inot na mga pag-uulay mi kaidto manungod sa Bibliya. Ngunyan siya asin an saiyang agom pareho nang bawtisadong mga lingkod ni Jehova.” Si Federica, na sinambit subago, nagsabi: “Sa sarong kongregasyon, sarong sister an nagdulok sako saka hinapot ako kun nagigirumduman ko pa siya. Sinabi niya na nakapagpatotoo ako saiya siyam na taon na an nakalihis. Kan magbalyo ako sa ibang banwaan, nag-adal palan siya nin Bibliya sagkod na mabawtismuhan. Iniisip ko dati na an inot na mga taon mi sa Albania dai lamang nagkaigwa nin bunga. Sala ako!”

 An mga tugang na nagbalyo sa Albania o Kosovo nagpapasalamat sa kun paano binebendisyunan ni Jehova an saindang mga paghihinguwa saka sa pagtao sainda nin sarong nakakakontentong buhay. Sa laog nin dakul na taon sa Albania, sinumaryo ni Eliseo an saiyang eksperyensiya, sinabi niya: “Bilang mga tawo, madali sana kitang madaya sa pag-isip na puwede kitang magkamit nin seguridad paagi sa pagsarig sa mga bagay na kinokonsiderar kan kinaban na nagtatao nin seguridad. Pero bako iyan totoo. Sa ibong na lado, an mga prinsipyo ni Jehova nagtatao sa sato nin katuyuhan saka seguridad. An paglilingkod ko bilang need-greater nakakatabang sa sako na magirumduman iyan. Namamati ko na may pakinabang ako saka pinapahalagahan. Igwa ako nin tunay na mga amigo na an mga pasuhan kapareho kan pasuhan ko.” Sinabi man ni Sandra: “Kan magbalyo ako sa lugar na mas dakula an pangangaipo, namati kong tinawan ako ni Jehova nin oportunidad na mautob an haloy ko nang minamawot—an magin misyonera. Dai lamang ako nagbasol sa pagbalyo ko sa Albania. Mas maugma nanggad ako ngunyan.”