An mga Saksi ni Jehova sa Bulgaria sibot sa pagtukdo sa iba kan katotoohan manungod sa Diyos asin sa saiyang Tataramon, an Bibliya. Para makatabang sainda, ginatos na Saksi hali sa ibang mga nasyon an nagbalyo sa Bulgaria puon kan taon 2000. Ano an mga kadipisilan sa pagbalyo sa ibang nasyon para maghulit? Taano ta sulit an mga paghihinguwa? Uni an nagkapirang komento kan mga nagbalyo sa Bulgaria.

 “Kaidto pa, pasuhan mi nang maglingkod sa ibang nasyon kun sain dakula an pangangaipo,” an sabi ni Darren na hali sa England. “Pagkakasal mi ni Dawn, nagbalyo kami sa London para tumabang sa pagtukdo kan Bibliya sa lengguwaheng Russian. Pirang beses kaming naggibo nin espesipikong mga plano para magbalyo sa ibang nasyon, pero dahil sa manlain-lain na kadahilanan dai kami nadadagos. Haros sukuan mi na an pasuhan mi, pero tinabangan kami nin sarong amigo na mahiling na nagbago na an kamugtakan mi asin na kaya mi nang abuton an samong pasuhan.” Nagpuon si Darren saka si Dawn na magpili nin nasyon na dakula an pangangaipo para sa mga paratukdo nin Bibliya asin na realistiko para sainda na diyan sinda magbalyo. Kan 2011, nagbalyo sinda sa Bulgaria.

 An nakakaugmang mga eksperyensiya kan mga nagbalyo sa ibang nasyon nakaengganyar sa iba na kan primero bakong pasuhan an paglilingkod sa ibang nasyon. “Nakabisto ako nin maigot na mga Saksi na maugmang naglilingkod sa Timog Amerika saka sa Aprika,” an sabi ni Giada, na hali sa Italy kaiba kan saiyang agom na si Luca. “Napahiro talaga ako kan kaugmahan ninda saka kan inistorya nindang mga eksperyensiya. Nakatabang iyan sako na i-adjust an sakong espirituwal na mga pasuhan.”

 Haling Czech Republic, nagbalyo si Tomasz saka si Veronika sa Bulgaria kan 2015, kaiba an saindang duwang aking si Klara saka Mathias. Ano an nakapahiro sainda na magbalyo? Sinabi ni Tomasz: “Pinag-isipan ming marhay an halimbawa kan iba na nagbalyo sa ibang nasyon, kaiba diyan an mga kaparyente mi, saka hinurop-hurop mi an mga eksperyensiya ninda. Napahiro kami kan saindang kaugmahan, saka iriba ming pinag-uulayan iyan sa harong.” An mga miyembro kan maugmang pamilyang ini naghuhulit na ngunyan sa saindang bagong teritoryo sa siyudad nin Montana sa Bulgaria.

 Si Linda saro pang Saksi na nagbalyo sa Bulgaria. Sinabi niya: “Dakul na taon na an nakaagi, nagbisita ako sa Ecuador asin nakabisto ako nin nagkapirang nagbalyo duman para maghulit. Napaisip ako kaiyan na siguro sarong aldaw makakapaglingkod man ako bilang need-greater.” Si Petteri saka Nadja, mag-agom hali sa Finland, hinurop-hurop man an halimbawa kan iba. Sinabi ninda: “Sa dati ming kongregasyon, may mga eksperyensiyadong parahayag na nagbalyo sa ibang mga nasyon para tabangan sa espirituwal an mga tawo. Excited sinda pirmi na iistorya an manungod sa mga taon na ginamit ninda para sa arog kaiyan na paglilingkod. Sinabi ninda na idto an pinakamaugmang mga taon kan buhay ninda.”

 Mahalaga nanggad an marahay na pagplano para sa mga gustong maglingkod sa ibang nasyon. (Lucas 14:28-30) “Kan punan kong seryosong pag-isipan an paglilingkod sa ibang nasyon,” an sabi ni Nele na hali sa Belgium, “namibi ako saka naghanap nin mga artikulo sa satong publikasyon manungod diyan. Pinag-adalan ko iyan saka pinagmaigutan na aramon kun ano an mga kaipuhan kong gibuhon.”

 Si Kristian saka Irmina, na hali sa Poland, labing siyam na taon nang nakaistar sa Bulgaria. Narealisar ninda kun gurano nakatabang sainda bago magbalyo an pag-atender sa sarong grupo sa Poland na nagtataram nin Bulgarian. Pinakusog sinda kan grupo saka tinabangan na manudan an lengguwahe. Sinabi ni Kristian saka Irmina: “Narealisar mi kun gurano kagayon na magin andam na maglingkod dangan mahiling kun paano itinatao kan Diyos na Jehova an mga pangangaipo mo. Pag gikan sa buot mong sinasabi ki Jehova, ‘Uya ako! Isugo mo ako!’ magigibo mo an mga bagay na paghuna mo imposible.”—Isaias 6:8.

 Si Reto saka Cornelia, mag-agom na hali sa Switzerland, nagdesisyon na pasimplehon an saindang buhay tanganing makaandam saka makatipon nin kuwarta. “Sarong taon bago magbalyo,” an sabi ninda, “nagbisita kami sa Bulgaria sa laog nin sarong semana para mas maaraman an buhay sa nasyon na iyan. Duman nakaulay mi an eksperyensiyadong mga misyonero na nagtao samo nin praktikal na mga suhestiyon.” Inaplikar ni Reto saka Cornelia an mga suhestiyon na iyan asin ngunyan labing 20 taon na sinda sa Bulgaria.

 An mga nagbalyo sa ibang nasyon kaipuhan na mag-adjust sa bago asin tibaad dipisil na mga kamugtakan. (Gibo 16:9, 10; 1 Corinto 9:19-23) Dakulang problema para sa dakul an pag-adal nin bagong lengguwahe. “Gustong-gusto mi pirming nagtatao nin udok sa pusong mga komento sa Kristiyanong mga pagtiripon,” an sabi ni Luca na sinambit kasubago. “Pero may panahon na nasakitan kami ni agom sa pag-andam nin maski ngani saro sanang simpleng komento sa lengguwaheng Bulgarian! Garo baga mga aki giraray kami. Sa katunayan, an komento kan mga aking taga Bulgaria mas magayon pa kisa kan sa samo.”

 Si Ravil, na hali sa Germany, nagsabi: “Mapagal an pag-adal kan lengguwahe. Pero pirmi kong iniisip, ‘Dai ka pakaseryoso, saka magngirit ka lang pag nasala ka.’ Para sako, an mga kadipisilan bakong problema, kundi parte kan sagradong paglilingkod ko ki Jehova.”

 Si Linda, na sinambit kasubago, nagsabi: “Bako akong matibay sa pag-adal nin lengguwahe. Dipisil manudan an Bulgarian, saka dakul na beses kong naisip na sumuko na lang. Mamundo pag dai mo makaulay an mga tawo saka pag dai mo nasasabutan an mga sinasabi ninda. Para magdanay na makusog sa espirituwal, Swedish an gamit ko pag nag-aadal ako. Pag-abot nin panahon, sa tabang kan mga tugang, nanudan ko man giraray an lengguwahe.”

 Saro pang problema an pagkapungaw. Kaipuhan na bayaan kan mga nagbalyo an saindang namumutan na mga kapamilya saka mga amigo. “Kan primero, munduon ako,” an sabi ni Eva, na nagbalyo sa Bulgaria kaiba kan saiyang agom na si Yannis. “Para makayanan iyan, regular kaming nakikikomunikar sa samong mga amigo saka mga kapamilya sa nasyon mi, saka nagkaigwa man kami nin bagong mga amigo digdi.”

 May iba pang mga kadipisilan. Si Robert saka Liana, na nagbalyo hali sa Switzerland, nagsabi: “Nadipisilan kaming marhay sa lengguwahe, pati na sa kultura, saka dai mi inaasahan na grabe palan an tiglipot digdi.” Dawa arog kaiyan, an pagdanay na positibo saka pagigin tataong magngirit asin magpangirit nakatabang sa mag-agom na ini na maimbod na makapaglingkod sa Bulgaria sa nakaaging 14 taon.

 Gusto man ni Lilly na purbaran kan iba na magin need-greater. “Naeksperyensiyahan ko an tabang ni Jehova sa paaging tibaad dai mangyayari sako kun yaon lang ako duman sa nasyon mi,” an sabi niya. “Nagigibo ko digding magin mas sibot sa pagtabang sa iba, asin nakakatabang iyan sako na mag-uswag sa espirituwal saka nakakatao iyan sako nin kaugmahan asin pagkakontento.” Uyon diyan an agom niyang si Ravil. Sinabi kaini: “Ini an pinakamarahay na buhay, sarong daing kaagid na oportunidad na makabisto nin maigot na mga Kristiyano hali sa manlain-lain na nasyon na may dakul na eksperyensiya sa pagtukdo kan mga katotoohan sa Bibliya. Dakulon akong nanudan sainda.”

 An gikan sa buot na paglilingkod saka pagigin andam kan dakul nagresulta sa mapangganang paghuhulit kan “maugmang [bareta] kan Kahadian . . . sa bilog na kinaban.” (Mateo 24:14) Dahil sa pagigin andam na tumabang sa iba, nahiling kan mga nagbalyo sa Bulgaria kun paano itinao ni Jehova an pagmawot kan saindang puso asin kun paano niya pinangyari na magin mapanggana an gabos nindang plano.—Salmo 20:1-4.