Si Artur, na sarong paraataman nin sirkito sa Armernia, nagdadalaw kaidto sa sarong kongregasyon kan mga Saksi ni Jehova. Naaraman niyang dai pa palan nakakapurbar an kongregasyon na makapagpatotoo sa publiko gamit an cart na may mga publikasyon sa Bibliya. Kaya para dagkahon an kongregasyon, si Artur saka an saiyang agom na si Anna kaiba an saro pang Saksi na si Jirayr, nagbugtak nin sarong literature cart sa sarong sadit na banwa. Nagpuwesto sinda sa lugar kun sain dakul na tawo an nag-aaragi.

 Nakua tulos kaiyan an interes kan mga nag-aaragi asin nagkurua sinda nin publikasyon. Pero dai nahaloy, an bagong paaging ini nin pagpapatotoo, nakua man an atensiyon kan mga nagkokontra. Duwang padi an nagrani sa cart, asin saro sainda an bigla na sanang sinipa an cart kaya nagkaturumba iyan. Pagkatapos sinampaling niya si Artur, kaya nahulog su salming kaini sa daga. Pinurbaran ni Artur, Anna, saka Jirayr na pakalmahon an mga padi, pero dai nagpundo an mga ini. Tinimak-timakan kan mga padi an cart kaya nagkawararak an mga publikasyon. Pagkatapos na mudahon ninda an mga Saksi saka patakuton, huminali na sinda.

 Nagduman si Artur, Anna, saka Jirayr sa istasyon nin pulis para mag-file nin reklamo. Inistorya ninda an nangyari asin nagpatotoo na man dagos sa mga pulis asin sa iba pang staff. Pagkatapos, inibanan sinda sa opisina kan nakakalangkaw na opisyal nin pulis. Kan inot, gusto sanang maaraman kan opisyal kun ano an nangyari. Pero kan maaraman niyang dai lamang nagbalos si Artur kan sinampaling ini, dawa ngani dakulang lalaki ini, nagpundo na siya sa paghapot manungod sa nangyari dangan nagparahapot na manungod sa mga tinutubod kan mga Saksi. Luminawig nin apat na oras an pag-urulay na idto! Napangalas na marhay an pulis sa saiyang mga nadangog kaya nasabi kaini: “Magayunon man sa relihiyon nindo! Gusto ko man mag-iba diyan!”

 Kan sunod na aldaw, mantang nagpapatotoo giraray sa publiko si Artur, rinanihan siya nin sarong lalaki na nakahiling kan pangyayari kan nakaaging aldaw. Inumaw niya si Artur ta nagin kalmado lang ini saka dai nagbalos. Sinabi pa kan lalaki na huli sa nahiling niya nawara na an respeto niya sa mga padi.

 Kan bangging idto pinabalik si Artur kan opisyal nin pulis sa istasyon. Pero imbes na maghapot manungod sa kaso, nagparahapot ini manungod sa Bibliya. Duwa pang pulis an nag-iba sa pag-urulay.

 Kan sunod na aldaw, binisita giraray ni Artur an opisyal nin pulis, pero sa pagkakataon na ini para ipahiling an satong basado sa Bibliyang mga video. Inapod man kan opisyal nin pulis an iba pang mga pulis para makahiling man kan mga video.

 Huli sa bakong marahay na paggawi kan mga padi, dakul na pulis an nakaresibi nin magayon na patotoo sa inot na pagkakataon. Nakapagtao ini nin magayunon na impresyon sa mga Saksi ni Jehova.