May Purple Triangle an Saindang Bado
Nakaistar si Maud sa France asin nagtatrabaho sa sarong eskuwelahan na diyan tinatabangan niya an mga aking may diperensiya sa pisikal sa panahon nin klase. Dai pa sana nahahaloy, itinukdo sa mga estudyante sa sarong klase an manungod sa Holocaust asin mga kampo de-konsentrasyon kan Nazi. An mga preso sa kampo nakasulot nin uniporme na may nakatahing pidaso nin tela na may kulor. An kulor asin korte kan pidaso nin tela nagpaparisa kun taano ta nakapreso an saro.
May koneksiyon sa nakatahing pidaso nin tela na lilang triangulo (purple triangle) sa uniporme kan nagkapirang preso, sinabi kan maestro: “Sa hiling ko, dahil iyan ta mga homoseksuwal sinda.” Pakatapos kan klase, nakipag-ulay si Maud sa maestro asin ipinaliwanag niya na an purple triangle ginamit kan mga Nazi para sa mga Saksi ni Jehova. a Sinabi niya na madara siya nin nagkapirang materyal manungod diyan. Nagtugot an maestro asin sinabi ki Maud na puwede niya iyan ipahiling sa klase.
Sa saro pang klase, itinukdo man an topic na iyan nin sarong maestra gamit an tsart na nagpapahiling kan manlain-lain na simbolo na nasa uniporme kan mga preso. Ipinahiling sa tsart na an purple triangle para sa mga Saksi ni Jehova. Pagkatapos kan klase, ipinahiling ni Maud sa maestra an nagkapirang impormasyon manungod sa topic na iyan. Nagustuhan iyan kan maestra asin iniskedyul niya si Maud para magtao nin report sa mga estudyante.
Si Maud na kapot-kapot an mga publikasyon na ginamit niya
Naghanda si Maud nin 15-minutong report para sa inot na klase, pero kan mapuon na siya, sinabihan siya: “Puwede mong gamiton an sarong oras.” Pinunan ni Maud an report niya paagi sa pagpahiling nin video manungod sa persekusyon kan Nazi sa mga Saksi ni Jehova. Kan masambit sa video na 800 na mga aking Saksi an kinua kan mga Nazi sa saindang mga magurang, pig-pause ni Maud an video asin binasa an mga eksperyensiya kan tulo sa mga aking idto. Pagkatapos na maipahiling an video, binasa ni Maud an surat nin pamamaaram na isinurat kaidtong 1940 kan 19-anyos na Saksing taga Austria na si Gerhard Steinacher. Isinurat niya iyan para sa saiyang mga magurang mga pirang oras bago siya gadanon kan mga Nazi. b
Parehong materyal man an irineport ni Maud sa ikaduwang klase. Huli sa kusog nin buot ni Maud, sinisigurado na kan duwang paratukdo na iyan na sambiton an mga Saksi ni Jehova pag itinutukdo ninda an manungod sa mga biktima sa mga kampo de-konsentrasyon kan Nazi.
a Kan Giyera Mundiyal II, an mga Saksi ni Jehova sa Germany, na midbid man sa apod na Bibelforscher (mga Estudyante sa Bibliya), iprineso huli sa pagsayuma nindang suportaran an mga Nazi.
b Si Gerhard Steinacher sinentensiyahan nin kagadanan huli sa pagsayumang umiba sa hukbo kan Germany. Sa saiyang surat nin pamamaaram, sinabi niya: “Hoben pa ako. Makakapanindugan sana ako kun tatawan ako nin kusog kan Kagurangnan, kaya ini an kahagadan ko.” Kinaagahan, ginadan si Gerhard. Mababasa sa lapida niya: “Nagadan siya para matawan nin onra an Diyos.”
Puwede Mo Man Magustuhan
PARATING MGA IHINAHAPOT
Ano an Nangyari sa mga Saksi ni Jehova kan Panahon kan Holocaust?
Tibaad mangalas ka sa simbag.
SIMBAG SA MGA HAPOT SA BIBLIYA
Taano ta Itinugot nin Diyos na Mangyari an Holocaust?
Dakul an naghahapot kun taano ta itinutugot nin sarong mamumuton na Diyos an grabeng pagsakit. Mababasa sa Bibliya an nakakakontentong simbag!