Pagkatapos na mabawtismuhan ni Zarina bilang saro sa mga Saksi ni Jehova, nagbalik siya haling Russia sa saiyang sadiring lugar sa Central Asia, na determinadong padakulaon sa katotoohan an saiyang duwang aking babayi. Huli sa pinansiyal na sitwasyon ninda, nakiistar sinda sa apartment na may sarong kuwarto kaiba kan mga magurang niya asin kan tugang niyang lalaki saka agom kaini. Pinagbawalan siya kan mga magurang niya na tukduan an mga aki niyang babayi manungod sa mga katotoohan sa Bibliya. Sinabihan man ninda an mga aki na dai makipag-ulay sa saindang ina manungod sa Bibliya.

 Pinag-isipan na marhay ni Zarina kun paano niya tatabangan an mga aki niyang babayi na makanuod manungod ki Jehova. (Talinhaga 1:8) Kaya udok siyang namibi ki Jehova na hinahagad an saiyang paggiya saka kadunungan. Kauyon kan saiyang pamibi, iiniiba niyang magpasyar an saiyang mga aki asin ipinapakipag-ulay niya sainda an manungod sa makangangalas na mga linalang. An mga pagpasyar na ini nakatabang sa mga aki na magkaigwa nin interes sa Kaglalang.

 Dangan nakaisip nin paagi si Zarina kun paano mas matutukduan an saiyang mga aki gamit an librong Ano Man Nanggad an Itinotokdo kan Biblia? a Isinusurat niya sa mga kapidaso nin papel an mga parapo asin hapot hali sa libro. Nagsurat man siya nin dagdag na mga sentence para matabangan an mga aki na mas masabutan an impormasyon. Tapos itinatago niya an mga papel, na may kaibang lapis, sa irarom kan washing machine sa laog kan banyo. Pag nasa banyo an mga aki niya, binabasa ninda an mga parapo asin isinusurat an mga simbag ninda.

 Gamit an pamamaaging iyan, nagibo ni Zarina na ma-study sa duwang kapitulo kan librong Itinotokdo kan Biblia an duwa niyang aking babayi bago sinda makahanap nin bagong harong na iistaran. Duman, mayo nang ulang sa pagpadakula niya sa saiyang mga aki. Kan Oktubre 2016, parehong nabawtismuhan an duwa niyang aking babayi. Maugma sinda dahil nagin madunong asin mapamaagi an saindang ina para matukduan sinda kan katotoohan manungod sa Diyos.