Sarong lalaki na haling Eritrea an nag-abot sa Norway bilang refugee kan 2011. Kan may magdalaw saiyang mga Saksi ni Jehova, sinabi niya na may nabisto siyang mga Saksi sa lugar ninda. Sinabi niya na kan nasa militar pa siya, nahiling niya na an mga Saksing iprineso dahil sa pagtubod ninda dai nagpadara sa panggigipit na magsuldados, dawa maraot na an nagin pagtratar sa sainda.

 May nangyari sa buhay kan lalaki kaya napreso ini. Nakaibanan niya duman an tulong Saksi—si Paulos Eyasu, Negede Teklemariam, asin Isaac Mogos—na iprineso dahil sa saindang pagtubod puon pa kan 1994.

 Kan nakapreso siya, nahiling mismo kan lalaki na talagang isinasabuhay kan mga Saksi ni Jehova an itinutukdo ninda. Naobserbaran niya na mga onesto sinda saka tinatawan pa ngani ninda nin kakanon an ibang mga preso. Nahiling niya na an mga kapwa niya presong Saksi magkairibanan na nag-aadal nin Bibliya aroaldaw asin inaagda ninda an iba na mag-iba sainda. Kan alukan sindang palibrehon basta pirmahan ninda an sarong dokumento na nagsasabing tinatalikdan na ninda an saindang pagtubod, nagsayuma sinda.

 Dai malingawan kan lalaki an eksperyensiyang idto. Kan magbalyo siya sa Norway, gusto niyang maaraman kun taano ta arog kaiyan kakusog an pagtubod kan mga Saksi ni Jehova. Kaya kan dalawon siya kan mga Saksi, nakipag-adal tulos siya sainda sa Bibliya asin nag-atender sa mga pagtiripon.

 Kan Setyembre 2018, nabawtismuhan siya bilang saro sa mga Saksi ni Jehova. Ginagamit niya na ngunyan an lambang oportunidad na makaulay an mga taga Eritrea asin Sudan, na dinadagka sinda na mag-adal nin Bibliya asin magkaigwa nin makusog na pagtubod.