Si Yanmei, na sarong Saksi sa Asia, tinabangan si Mingjie, na sarong babaying buta, na bumalyo sa tinampo. a Sinabi ni Mingjie: “Salamat. Bendisyunan ka lugod nin Diyos!” Pagkatapos kaiyan, hinapot niya si Mingjie kun gusto kaining makipag-ulay saiya sa sunod para pag-ulayan ninda an Bibliya. Kan huri, sinabi ni Mingjie na nagpaparapamibi siya aroaldaw para giyahan siya pasiring sa tunay na kongregasyon nin Diyos. Taano ta nagpaparapamibi siya nin arog kaiyan?

 Ipinaliwanag ni Mingjie na kan 2008 inako niya an imbitasyon kan butang amiga niya na umatender sa sarong simbahan para sa mga may diperensiya sa pisikal. Pagkatapos kan sermon, hinapot ni Mingjie an padi kun sain na libro ini nagkotar. Sinabi kaini na hali idto sa Bibliya, an Tataramon nin Diyos. Gustong-gusto ni Mingjie na basahon iyan. Kaya nagkua siya nin Chinese braille na Bibliya asin binasa an 32 na volume kaiyan sa laog nin mga anom na bulan. Sa pagbasa niya nin Bibliya, nagkongklusyon siya na an doktrinang Trinidad, na itinutukdo sa simbahan na inaatenderan niya, sala asin na an Diyos igwa nin pangaran, Jehova.

 Sa paglihis nin panahon, nadisganar si Mingjie sa paggawi kan mga miyembro kan simbahan. Narealisar niya na dai sinda namumuhay kauyon kan mga nababasa niya sa Bibliya. Halimbawa, an mga buta tinatawan lang nin mga tada-tadang kakanon, mantang an gabos na iba pa tinatawan nin bagong mga kakanon. Nakulgan si Mingjie kan arog kaiyan na mga inhustisya, kaya nagpuon siyang maghanap nin ibang relihiyon sa lugar niya. Iyan an dahilan kaya nagpaparapamibi si Mingjie na manumpungan niya an tunay na Kristiyanong kongregasyon.

 Napahiro si Mingjie kan kabuutan ni Yanmei, kaya inako niya an alok saiya na magpa-Bible study. Kan huri, nag-atender si Mingjie sa inot na pagkakataon sa pagtiripon kan Mga Saksi ni Jehova. Nagigirumduman ni Mingjie: “Dai ko talaga malilingawan an primero kong pag-atender sa pagtiripon. Maugma akong pig-welcome kan gabos na tugang. Napahiro talaga kaiyan an puso ko. Dawa buta ako, namatian ko an daing pagpalain-lain na pagkamuot ninda.”

 Marikas na nag-uswag si Mingjie asin nagpuon nang regular na mag-atender sa mga pagtiripon. Gustong-gusto niya lalo na an pagkanta nin mga kantang pang-Kahadian, pero nasasakitan siya ta mayo pa nin songbook na braille sa lengguwahe niya. Kaya sa tabang kan kongregasyon, naggibo si Mingjie nin sadiri niyang songbook. Inabot nin 22 na oras an pag-transcribe niya kan gabos na 151 kanta! Kan Abril 2018, nagpuon si Mingjie na makikabtang sa pampublikong ministeryo asin puon kaiyan mga 30 oras kada bulan an ginagamit niya sa paghuhulit.

 Para tabangan si Mingjie sa pag-andam para sa bawtismo, pigrekord ni Yanmei an mga hapot asin mga teksto sa librong Organisado sa Paggibo kan Kabutan ni Jehova. Kan Hulyo 2018, nabawtismuhan si Mingjie. Sinabi ni Mingjie: “Napahiro an puso ko kan pagkamuot na ipinahiling kan mga tugang sa kumbensiyon na idto. Napaluha ako ta nagin parte na man giraray ako kan tunay na kongregasyon nin Diyos.” (Juan 13:34, 35) Dahil determinado si Mingjie na ipahiling sa iba an kaparehong pagkamuot na ipinahiling saiya, naglilingkod siya ngunyan bilang bilog na panahon na ebanghelisador.