Kan 2017, 12 Saksi an nagbiyahe sakay nin bangka hali sa Mosquito (Miskito) Coast, sarong rehiyon sa Nicaragua. Sturi Yamni an pangaran kan saindang bangka. An saro sa sainda, si Stephen, nagsabi, “Nagbiyahe kami para pakusugon an sarong sadit na grupo nin mga Saksi na nakaistar sa sarong puwerang lugar asin tabangan sinda na ihulit an maugmang bareta sa saindang mahiwas na teritoryo.”

 Nagpuon sa Pearl Lagoon an 200 kilometros na biyahe kan 12 Saksi pasiring sa Río Grande de Matagalpa. Dai ninda hunaon na an pangaran kan saindang bangka, na nangangahulugan “Maugmang Bareta” sa lengguwaheng Miskito, magkakaigwa nin espesyal na kahulugan para sa mga tawong nakaistar duman sa may gilid kan salog. Pagkatapos nin 12 oras na pagbiyahe, apuwera pa sa oras na ginamit ninda sa pagpalihis nin banggi, nakaabot an mga Saksi sa destinasyon ninda—an komunidad kan La Cruz de Río Grande. Maugmang inako kan anom na Saksing taga duman an saindang mga tugang sa espirituwal.

 Kan bangging idto may maraot na nangyari. Dahil sa sarong makusog na bagyo, nagparauran nin grabe sa lugar na pinaghahalian kan tubig kan Río Grande de Matagalpa. Mga pirang oras sana, nag-apaw an tubig sa salog asin padagos na naglangkaw iyan sa laog nin duwang aldaw. Binaha an Kingdom Hall asin an dakul na harong sa La Cruz. Tinabangan kan mga nagbibisitang brother an mga taga duman na mag-ebakwar. Kan suminunod na duwang banggi, an kadaklan sa sainda nagpalihis nin banggi sa duwang eskalon na harong nin sarong Saksi.

 Kan ikatulong banggi, an alkalde kan La Cruz nagduman sa nagbisitang mga Saksi para maghagad nin tabang sainda. Dahil an Sturi Yamni sana an bangka na yaon duman na kayang magbiyahe sa bahang salog, gusto kan alkalde na ihatod ninda an sarong team nin mga relief worker para magtabang sa ibang apektadong komunidad. Asin maugmang nakipagtabangan an mga Saksi.

 Kinaagahan, nagbiyahe an tulong Saksi kaiba an relief team. “Kan oras na idto, nagraragasa na an tubig kan salog,” an sabi ni Stephen. “May mga darakulang kahoy na inaanod, igwa nin mga nag-iitok na tubig pairarom, asin an tubig kan salog nagraragasa sa rikas na labing 18 kilometros por ora.” Sa ibong kaiyan, nadumanan ninda sakay nin bangka an tulong komunidad.

 Ginamit kan tulong Saksi an oportunidad na idto para makatao kan kinakaipuhan na pagranga sa mga taga duman. Idinistribwir man kan mga Saksi an 2017 isyu kan Gumising! na sakto man an tema, “Kapag May Sakuna—Mga Hakbang na Makapagliligtas ng Buhay.”

 Pinahalagahan na marhay kan mga residente sa mga komunidad sa may gilid kan salog an praktikal saka espirituwal na tabang na itinao kan mga Saksi. “Handa sindang magtabang sa masakit na mga panahon,” an sabi kan nagkapirang taga duman. An iba man nagsabi, “Tunay nindang namumutan an saindang kapwa.” Dahil nahiling kan mga taga duman an paghihinguwa kan mga Saksi na tabangan an saindang mga kapagtubod asin an iba pa, dakul sa sainda an mas andam nang magdangog sa nakakarangang mensahe kan Bibliya.