Si Bryn, na nakaistar sa North Carolina, U.S.A., miyembro kan Hospital Liaison Committee, na nakikipagtabangan sa mga ospital para asikasuhon an mga pangangaipo kan mga pasyente na Saksi ni Jehova.

 Huli sa COVID-19 na pandemya, dakul na ospital an dai nagpapalaog nin mga bisita. Inapudan ni Bryn an direktor kan pastoral care sa sarong ospital sa lugar ninda para aramon kun paano siya puwedeng makatabang sa mga pasyenteng Saksi.

 An nakaulay ni Bryn sa telepono iyo an assistant kan direktor. Huling dai itinutugot an pagbisita sa ospital, nakiulay si Bryn na kun puwede itao an saiyang phone number sa mga pasyenteng Saksi para makaulay niya sinda. Asin nagtugot ini.

 Tapos naisip ni Bryn an mga staff kan ospital. Sinabi niya sa assistant na nagpapasalamat siya sa mga ginigibo kan ospital asin nag-aasa siya na marahay an kamugtakan kan salud ninda. Sinabi pa niya na nabasa niya an manungod sa grabeng stress na naeeksperyensiyahan kan mga tawo sa gabos na lugar huli sa pandemya, lalo na kan mga nagtatrabaho sa ospital.

 Sinabi kan assistant na dahil sa COVID-19 talagang nagin nakaka-stress na marhay an buhay sa ospital.

 Dangan sinabi ni Bryn: “May mga impormasyon an samong website na makakatabang sa mga tawo na atubangon an stress. Kun bubuksan mo an jw.org asin ita-type an ‘stress’ sa Search box, mahihiling mo an nagkapirang artikulo na makakatabang sa mga staff nindo.”

 Mantang nag-uulay sinda, binuksan kan assistant an website, pig-type an “stress” sa Search box, asin nahiling an tampok na mga artikulo. “Wow!” an sabi niya. “Ipapahiling ko ini sa direktor. Makakatabang ini sa samong mga staff asin sa iba pa. Ma-print ako nin mga kopya kaini tapos itatao ko sainda.”

 Pakalihis nin pirang semana, kinaulay ni Bryn an direktor, na nagsabi na nabuksan na ninda an website saka nag-print na sinda nin mga kopya kan mga artikulo manungod sa stress asin iba pang tema may koneksiyon diyan. Itinao ninda iyan sa mga nars asin iba pang mga staff kan ospital.

 Sinabi ni Bryn: “Pinasalamatan ako kan direktor dahil sa gibuhon ta asin sa magagayon na artikulo. Sinabi niya na dakulang tabang an mga iyan.”