Si Virginia, na sarong Saksi ni Jehova, igwa nin hilang na inaapod na locked-in syndrome. Paralisado an bilog niyang hawak. Nakakahiling saka nakakadangog siya. Kaya niyang imuklat saka ipirong an saiyang mga mata saka ihiro nin dikit an saiyang payo. Pero dai siya nakakataram o nakakakakan. Dati marahay an hawak niya saka maliksi siya. Pero sarong aga kan 1997, nakamati siya nin grabeng kulog sa parteng likod kan saiyang payo asin dai iyan nawawara. Dinara siya kan agom niya sa ospital, asin kinabanggihan na-comatose na siya. Pakalihis nin duwang semana sa intensive-care unit (ICU), nagmata siya pero paralisado na saka naka-ventilator. Pirang aldaw na mayo siyang matandaan, dawa ngani sadiri niya dai niya bisto.

 Inistorya ni Virginia an sunod na nangyari. “Padiit-diit na nagbalik an memorya ko. Grabe kaidto su pamibi ko. Habo ko pang magadan. Habo kong magdakula an aki ko na daing ina. Para mapakusog ko an buot ko, hininguwa kong girumdumon an pinakadakul na teksto sa Bibliya na kaya kong girumdumon.

 “Dai nahaloy, pinaluwas na ako kan mga doktor sa ICU. Pagkatapos nin anom na bulan sa iba-ibang ospital saka rehabilitation center, nakauli na man ako. Pero paralisado pa man giraray an bilog kong hawak kaya kaipuhan ko na nin tabang sa gabos na bagay. Namundo talaga akong marhay! Pagmati ko wara na akong serbi sa iba saka ki Jehova. Nahadit man ako ta dai ko na maaataman an aki ko.

 “Nagpuon akong magbasa nin mga eksperyensiya nin ibang mga Saksi na nagkaigwa man nin kondisyon na arog kan sa sako. Napahanga ako sa nakaya nindang gibuhon para ki Jehova. Kaya hininguwa ko man na magin positibo paagi sa pagpokus sa kun ano an kaya kong gibuhon. Bago ako magkahilang, dikit sana an panahon na naitatao ko para sa espirituwal na mga aktibidad. Ngunyan nagigibo ko na iyan nin bilog na aldaw, aroaldaw. Kaya imbes na pangluyahan na marhay nin buot, nagpokus ako sa sakong pagsamba ki Jehova.

 “Nag-adal akong magkompyuter. Nakaka-type ako gamit an sarong software na naggagana paagi sa paghiro kan sakong payo. Nakakapagal man, pero paagi sa teknolohiyang iyan, nakakapag-adal ako nin Bibliya saka naisasabi ko sa iba an paglaom ko paagi sa surat saka e-mail. Para makaulay ko an iba, may board ako na may nakasurat na alpabeto. Saro-saro na pigtutukdo sako an mga letra. Pag sala an pigtukdo, binuburarat ko an mga mata ko; pero pag tama, pinipirong ko iyan. Tapos uutruhon mi iyan para makabilog nin mga tataramon o sentence. Su mga sister na pirmi kong nakakaibanan, nakukua na ninda tulos an gusto kong sabihon. Tapos kun minsan, pag napapasala sinda, nagngingiririt na lang kami.

 “Gustong-gusto kong mag-iba sa mga aktibidad kan kongregasyon. Pirmi akong nag-aatender sa mga pagtiripon, pero ngunyan paagi na sa videoconferencing. Pigta-type ko an mga komento ko, tapos may ibang mabasa kaiyan para sa sako sa parte kan programa na may partisipasyon an mga nag-aatender. Nagkokonektar man ako sa sarong sadit na grupo nin mga kapwa ko Saksi pag naghihiling sinda nin JW Broadcasting bulan-bulan. a

 “Sa ngunyan, 23 na taon na akong may locked-in syndrome. Kun minsan, namumundo man ako. Pero nalalabanan ko an kamunduan na iyan paagi sa pagpamibi, pakikiiba-iba sa mga tugang, saka sa pagigin sibot pirmi sa espirituwal na mga aktibidad. Sa katunayan, paagi sa tabang kan kongregasyon, labing anom na taon na akong nakakapag-auxiliary payunir. Hinihinguwa kong magin marahay na halimbawa sa aki kong si Alessandro, na ngunyan may agom na saka naglilingkod bilang elder. Siya saka an agom niya naglilingkod man bilang regular payunir.

 “Pirmi kong iniisip-isip an mga bagay na magigibo ko pag-abot nin paraiso. An inot kong gigibuhon, ipapakipag-ulay ko sa iba an manungod ki Jehova gamit an sadiri kong boses. Gusto kong maglakaw-lakaw sa gilid nin salog para i-enjoy an magayon na tanawon. Saka dahil an kinakakan ko sa nakaaging duwang dekada pinapaagi sa tubo, gustong-gusto ko nang mag-abot an panahon na makaguno ako nin mansanas sa puon kaiyan tapos kagaton iyan. Saka siyempre, dahil Italiana ako, gustong-gusto ko na man na magluto saka magkakan nin paborito kong Italian na mga pagkakan, kaiba na an pizza!

 “An ‘paglaom na kaligtasan’ nakatabang sako na maprotektaran an sakong kaisipan. (1 Tesalonica 5:8) Pag iniisip-isip kong nasa bagong kinaban na ako, nakakapaugma iyan sa sako dawa may pisikal na mga limitasyon ako, asin tiwala ako na madali na ining mawara. Gustong-gusto ko na talagang makamtan an ‘tunay na buhay’ na ipinangako ni Jehova na itatao sa sato paagi sa saiyang Kahadian.”—1 Timoteo 6:19; Mateo 6:9, 10.