Dai nagseselebrar nin birthday o kumpleanyo an mga Saksi ni Jehova huling nagtutubod kami na an selebrasyon na iyan dai nakakapaugma sa Diyos. Dawa dai espesipikong sinambit sa Bibliya na bawal an pagselebrar nin birthday, tinatabangan kita kaiyan na maaraman an panginot na mga katotoohan kan selebrasyon na iyan asin masabutan an pagmansay diyan nin Diyos. Pag-isipan an apat sa mga katotoohan na ini saka an konektadong mga prinsipyo sa Bibliya manungod diyan.

1.   An pagselebrar nin birthday may paganong pinaghalian. Uyon sa Funk & Wagnalls Standard Dictionary of Folklore, Mythology, and Legend, an mga selebrasyon na ini hali sa paniniwala na pag birthday nin saro, “puwede siyang atakehon nin maraot na mga espiritu asin iba pang mga puwersa” asin na “an pagigin presente kan mga amigo saka an pagpahayag nin mga pagbati para sa nagseselebrar makakatabang na maprotektaran siya.’ An librong The Lore of Birthdays nagsasabi na kaidtong mga panahon, an mga rekord nin birthday “mahalagang marhay para maaraman an horoscope” na basado sa “mistikong siyensiya nin astrolohiya.” Sinabi pa kan librong ini na “an mga kandila sa birthday, sigun sa alamat, igwa nin espesyal na mahika tanganing mautob an mga kahagadan.”

    Alagad, kinokondenar kan Bibliya an paggamit nin mahika, panghuhula, espiritismo, o kan “siring na mga bagay.” (Deuteronomio 18:14; Galacia 5:​19-​21) Sa katunayan, kinondenar nin Diyos an suanoy na siyudad nin Babilonya huling an mga nakaistar diyan nagsagibo nin astrolohiya, na sarong porma nin panghuhula. (Isaias 47:11-15) Dai man gayong tinatawan nin atensiyon kan mga Saksi ni Jehova an pinaghalian kan kada tradisyon; pero kun may malinaw na instruksiyon an Kasuratan manungod diyan, talagang tinatawan mi iyan nin atensiyon.

2.   Dai nagseselebrar nin birthday an mga Kristiyano kan inot na siglo. Sinasabi kan The World Book Encyclopedia na “ibinibilang nindang paganong tradisyon an pagselebrar nin birthday nin siisay man.” Ipinapahiling kan Bibliya na an mga apostol asin an iba pang disipulo na natukduan mismo ni Jesus nagtao nin halimbawa na dapat sundon kan gabos na Kristiyano.—2 Tesalonica 3:6.

3.   An selebrasyon sana na ipinagbubuot sa mga Kristiyano na padagos na gibuhon iyo an kagadanan ni Jesus, bako an birthday o pagkamundag niya. (Lucas 22:17-20) Dai dapat ini ikangalas huling sinasabi sa Bibliya na “an aldaw nin kagadanan, mas marahay ki sa aldaw nin pagkamundag.” (Parahulit 7:1, An Marahay na Bareta Biblia) Bago magadan si Jesus, nakagibo siya nin marahay na pangaran sa atubangan nin Diyos, kaya an aldaw kan saiyang kagadanan mas mahalaga nanggad kisa sa aldaw kan saiyang pagkamundag.—Hebreo 1:4.

4.   Mayo lamang sinambit sa Bibliya na nagselebrar nin birthday an sarong lingkod nin Diyos. Dai lang basta nalipasan ining isurat, huling igwa nin rekord sa Bibliya nin duwang pagselebrar nin birthday na ginibo kan bakong mga lingkod nin Diyos. Pero, parehong bakong magayon an nangyari sa duwang selebrasyon na idto.—Genesis 40:20-22; Marcos 6:21-29.

 Arog kan dakul na mamumuton na mga magurang, pirming ipinapahiling kan mga Saksi na padangat nindang marhay an saindang mga aki sa bilog na taon, paagi sa pagtao sa sainda nin regalo asin pag-areglo nin maugmang mga pagtiripon-tipon. Hinihinguwa nindang arugon an perpektong halimbawa nin Diyos, na padagos na nagtatao nin marahay na mga bagay sa saiyang mga aki. (Mateo 7:11) Dai namamati kan mga aki nin Saksi na may ipinapanguri sainda, arog kan maririsa niyato sa mga komento ninda:

•   “Mas maugmang mag-ako nin regalo pag dai mo iyan inaasahan.”—Tammy, 12 anyos.

•   “Dawa mayo akong regalo sa birthday ko, binabakalan man ako ni Mama saka Papa nin mga regalo sa ibang mga okasyon. Gusto ko ngani iyan ta nasu-surprise ako.”—Gregory, 11 anyos.

•   “Sampulong minuto, mga cupcake, saka pagkanta, iyo na ’yan an party nindo? Magduman kamo sa harong ta mahihiling nindo kun ano talaga an tunay na party!”—Eric, 6 anyos.