An Mga Saksi ni Jehova dai kontra sa pagpabakuna. Para samo, an pagpabakuna sarong personal na desisyon kan lambang Kristiyano. Dakul sa mga Saksi ni Jehova an nagdesisyon na magpabakuna.

 Gusto mi nin marahay na kalidad nin pagbulong asin pinapahalagahan niyamo an dakul na pag-uswag sa medisina para mabawasan an peligro na dara kan malalang hilang. Ipinagpapasalamat mi an dedikasyon asin kahigusan kan mga doktor asin nars, lalo na sa mga panahon nin krisis.

 Nakikipagtabangan an Mga Saksi ni Jehova sa mga public health official. Halimbawa, puon kan magkaigwa nin COVID-19 na pandemya, padagos na nagtatao an Mga Saksi ni Jehova nin mga pagirumdom paagi sa website na ini sa kadakul na lengguwahe, na ineengganyar an mga tawo na magsunod sa mga safety protocol sa lugar ninda. Kaiba digdi an kahalagahan kan physical distancing asin pagsunod sa mga regulasyon mapadapit sa pampublikong mga pagtiripon, pag-quarantine, paghanaw nin kamot, saka an pagsulot nin face mask asin face shield pati na an iba pang praktikal na mga paagi na ipinagbubuot o irinerekomendar kan mga awtoridad.—Roma 13:1, 2.

 Dakul na taon nang itinatampok sa mga publikasyon kan Mga Saksi ni Jehova an minasunod na mga prinsipyo:

•   An pagpabulong sarong personal na desisyon.—Galacia 6:5.

   “An [magasin na ini] dai nagrerekomendar nin ano man na klase nin bulong o terapi asin dai man nagtatao nin medical advice. Katuyuhan kaini na magtao sana nin mga impormasyon asin bahala na an mga nagbabasa na magdesisyon.”—Awake!, Pebrero 8, 1987.

   “Kun manungod sa isyu kun baga dapat na magpabakuna ka saka an saimong mga aki, iyan sarong personal na desisyon.”—Awake!, Agosto 22, 1965.

•   Nagpapabulong kita huling pinapahalagahan niyatong marhay an buhay.—Gibo 17:28.

   “Nagpapakonsulta an mga Saksi sa mga doktor para magpatabang sa minamati nindang hilang. Gustuhon nindang mabuhay asin gusto nindang gibuhon an ano man na praktikal saka nasa Kasuratan para mapalawig an buhay.”—The Watchtower, Hulyo 1, 1975.

   “An mga Saksi ni Jehova nagpapabulong. Gusto nindang magdanay na marahay an salud ninda asin maglawig pa an saindang buhay. Sa katunayan, arog kan Kristiyano kan inot na siglo na si Lucas, may mga doktor na Saksi ni Jehova. . . . Talagang pinapahalagahan kan mga Saksi ni Jehova an kahigusan asin dedikasyon kan mga doktor asin nars. Pigtatanaw man nindang utang na buot an pagbulong sa sainda kan mga indibidwal na ini.”—Ang Bantayan, Pebrero 1, 2011.