•  Paano naaaraman kan mga Saksi ni Jehova kun baga puwedeng iselebrar an sarong okasyon?

•  Padangat daw kan mga Saksi ni Jehova an saindang pamilya maski dai sinda nakikiiba sa pirang mga selebrasyon?

•  Pigsasabihan daw kan mga Saksi ni Jehova an iba na dai ninda iselebrar an nagkapirang okasyon?

 Bago magdesisyon kun baga iseselebrar ninda an sarong okasyon, pig-aaram nguna kan mga Saksi ni Jehova an sinasabi kan Bibliya. May mga okasyon saka selebrasyon na malinaw na kontra sa mga prinsipyo kan Bibliya. Dai iyan isineselebrar kan mga Saksi ni Jehova. Pag-abot sa iba pang selebrasyon, an kada Saksi an madesisyon sa sadiri niya, na hinihinguwang “mapagdanay an malinig na konsiyensiya sa atubangan nin Diyos asin mga tawo.”—Gibo 24:16.

 An minasunod iyo an pira sa mga hapot na pinag-iisipan kan mga Saksi ni Jehova pag nagdedesisyon sinda kun baga puwedeng iselebrar an sarong okasyon. a

•   An okasyon daw na ini nakabasar sa katukduan na kontra sa Bibliya?

   Prinsipyo sa Bibliya: “‘Magruluwas kamo sa tahaw ninda, asin isuway nindo an saindong sadiri,’ an sabi ni Jehova, ‘asin ipundo nindo an pagdutdot kan maating bagay.’”—2 Corinto 6:15-17.

   Para lubos na magin suway sa mga katukduan na maati sa espirituwal, o kontra sa sinasabi kan Bibliya, dai isineselebrar kan mga Saksi ni Jehova an mga okasyon na may koneksiyon sa minasunod.

   Mga okasyon na may koneksiyon sa pagtubod o pagsamba sa ibang mga diyos. Sinabi ni Jesus: “Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.” (Mateo 4:10) Para masunod iyan, dai isineselebrar kan mga Saksi ni Jehova an Pasko, Easter, o May Day, huling an mga selebrasyon na ini konektado sa pagsamba sa ibang mga diyos, bako ki Jehova. Dai man ninda isineselebrar an minasunod.

  •  Kwanzaa. An Kwanzaa “hali sa mga tataramon sa Swahili na matunda ya kwanza, na nangangahulugan ‘mga inot na bunga’ asin nagpaparisa na hali an okasyon na ini sa pagselebrar kan inot na ani na nakarekord sa kasaysayan kan Aprika.” (Encyclopedia of Black Studies) Para sa iba mayo man koneksiyon sa relihiyon an Kwanzaa, pero kinumparar iyan kan Encyclopedia of African Religion sa sarong kapiyestahan sa Aprika kun sain an mga inot na bunga “inaatang sa mga diyos asin apuon bilang pasasalamat sa sainda.” Sinasabi pa diyan: “An arog kaining pasasalamat asin pagpapahalaga sa mga biyaya nin buhay na hali sa mga apuon hiling-hiling man sa African American na okasyon na Kwanzaa.”

  •  Mid-Autumn Festival. Saro ining “kapiyestahan para tawan nin onra an diyosa nin bulan.” (Holidays, Festivals, and Celebrations of the World Dictionary) Sa kapiyestahan na ini may ginigibong ritwal, na sa Chinese inaapod na kowtow, kun sain “an mga babayi sa harong nagduduko . . . sa diyosa.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “An kapiyestahan na ini hali sa relihiyon na Zoroastrianismo asin saro sa pinakabanal na aldaw sa suanoy na kalendaryo kan mga Zoroastriano. . . . Diyan, an Espiritu kan Kaudtuhan, na inaapod na [Rapithwin], na tinutubod na ipinapaapon kan Espiritu kan Tiglipot sa kairaruman pag mga bulan nin tiglipot, maugmang isineselebrar an pagbalik sa aldaw nin Nowruz pagkaudto, uyon sa tradisyon kan mga Zoroastriano.”—United Nations Educational, Scientific and Cultural Organization.

  •  Shab-e Yalda. Sigun sa librong Sufism in the Secret History of Persia, an selebrasyon na ini kan winter solstice “siguradong may koneksiyon sa pagsamba ki Mithra,” an diyos nin liwanag. Tinutubod man na an selebrasyon na ini posibleng konektado sa pagsamba sa mga diyos nin saldang kan mga Romano asin Griego. b

  •  Thanksgiving. Arog kan Kwanzaa, an okasyon na ini hali sa suanoy na mga selebrasyon may koneksiyon sa pag-ani na nagtataong onra sa manlain-lain na diyos. Sa paglihis nin panahon, “an suanoy na mga katutubong tradisyon na ini inako na kan mga Kristiyanong relihiyon.”—A Great and Godly Adventure—The Pilgrims and the Myth of the First Thanksgiving.

   Mga okasyon na basado sa superstisyon o pagtubod sa suwerte. Sinasabi kan Bibliya na an “nagpupuwesto nin lamesa para sa diyos nin Suwerte” kaiba sa “mga nagbabaya ki Jehova.” (Isaias 65:11, NWT) Kaya dai isineselebrar kan mga Saksi ni Jehova an minasunod na mga okasyon:

  •  Ivan Kupala. “Nagtutubod an dakul na pag panahon nin [Ivan Kupala], an kapalibutan nagpapaluwas nin misteryosong kapangyarihan, na makukua mo kun ika daing takot saka masuwerte,” an sabi kan librong The A to Z of Belarus. Kun sususugon, an Ivan Kupala sarong paganong kapiyestahan sa pagselebrar kan summer solstice. Pero sigun sa Encyclopedia of Contemporary Russian Culture, “nagin parte na iyan kan kapiyestahan kan Simbahan [an “aldaw kan santong” si Juan Bautista] pagkatapos na akuon kan mga pagano an Kristiyanismo.”

  •  Lunar New Year (Chinese New Year o Korean New Year). “Sa panahon na ini nin taon, mayong ibang nasa isip an mga pamilya, mag-aramigo, asin mga paryentes kundi an suwertehon, tawan onra an mga diyos asin espiritu, saka magin mapalad sa paabot na taon.” (Mooncakes and Hungry Ghosts—Festivals of China) Kapareho kaiyan, an Korean New Year igwa man “kaibang pagsamba sa mga apuon, mga ritwal para pahalion an mga demonyo asin magin masuwerte sa Bagong Taon, saka panghuhula para maaraman kun ano an dara kan Bagong Taon.”—Encyclopedia of New Year’s Holidays Worldwide.

   Mga okasyon na basado sa pagtubod na an kalag imortal. Malinaw na itinutukdo kan Bibliya na an kalag nagagadan. (Ezequiel 18:4) Kaya dai isineselebrar kan mga Saksi ni Jehova an mga okasyon na nagtutukdo na igwa nin imortal na kalag, arog kan minasunod:

  •  All Souls’ Day (Pistang Kalag). Saro ining aldaw para “girumdumon an gabos na mga nagadan,” an sabi kan New Catholic Encyclopedia. “Sa bilog na panahon nin Edad Medya, popular an paniniwala na an mga kalag sa purgatoryo puwedeng magpahiling sa aldaw na ini bilang mga multo, mangkukulam, talapang, asin iba pa, sa mga tawong nakagibo sainda nin sala kan buhay pa sinda.”

  •  Qingming Festival (Ch’ing Ming) asin Hungry Ghost Festival. An duwang kapiyestahan na ini ginigibo para tawan nin onra an mga apuon. Uyon sa librong Celebrating Life Customs Around the World—From Baby Showers to Funerals, kada Ch’ing Ming “an mga pagkakan, inumon, asin kuwartang papel sinusulo para masigurado na an mga nagadan dai magutom, mapaha, o mawaran nin kuwarta.” Sinasabi man kan libro na “pag Hungry Ghost Month, lalo na pag kabilugan nin bulan, [nagtutubod an mga nagseselebrar kaini na] nagigin mas makusog an koneksiyon kan mga gadan asin mga buhay, kaya importanteng gumibo nin paagi para patuninungon an mga gadan asin tawan nin onra an mga apuon.”

  •  Chuseok. Sigun sa The Korean Tradition of Religion, Society, and Ethics, kaiba sa kapiyestahan na ini an “pagdulot nin kakanon saka arak sa kalag kan mga gadan.” Ginigibo an pagdulot dahil sa “pagtubod na padagos na nabubuhay an kalag pagkatapos na magadan an hawak.”

   Mga okasyon na may koneksiyon sa okulto. Sinasabi kan Bibliya: ‘An siisay man na naghuhula, siisay man na nagmamahika, siisay man na naghahanap nin mga senyales, siisay man na espiritista, siisay man na naggagamit nin orasyon para gibuhan nin maraot an iba, siisay man na nagkokonsulta sa sarong espiritista o parahula, o siisay man na naghahapot sa gadan makababaldi ki Jehova.’ (Deuteronomio 18:10-12, NWT) Para talagang makaiwas sa ano man na klase nin okultismo—kaiba na an astrolohiya (sarong klase nin panghuhula)—dai isineselebrar kan mga Saksi ni Jehova an Halloween o an minasunod na selebrasyon:

  •  Sinhala asin Tamil New Year. “Kaiba sa mga nakaugalian na ritwal na may koneksiyon sa okasyon na ini . . . an pagsagibo nin partikular na mga aktibidad sa mga panahon na sinasabi kan mga astrologo na masuwerte.”—Encyclopedia of Sri Lanka.

  •  Songkran. An pangaran kan kapiyestahan na ini sa Asia “kinua sa tataramon na Sanskrit . . . na nangangahulugan ‘paghiro’ o ‘pagbago,’ asin isineselebrar ini kasabay kan pagbabago nin puwesto kan saldang pasiring sa zodiac constellation na Aries.”—Food, Feasts, and Faith—An Encyclopedia of Food Culture in World Religions.

   Mga selebrasyon may koneksiyon sa pagsunod sa Katugunan ni Moises, na tinapos na paagi sa atang na pantubos ni Jesus. Sinasabi kan Bibliya: “Natapos an Katugunan paagi ki Cristo.” (Roma 10:4) Sagkod ngunyan nakikinabang pa an mga Kristiyano sa mga prinsipyo sa Katugunan ni Moises na itinao sa suanoy na Israel. Pero, dai na ninda isineselebrar an mga kapiyestahan kaiyan, lalo na an mga kapiyestahan manungod sa pag-abot kan Mesiyas na pinaniniwalaan kan mga Kristiyano na nag-abot na. Sinasabi kan Bibliya: “An mga bagay na idto anino kan mga bagay na maabot, alagad an talagang tunay iyo an Cristo.” (Colosas 2:17) Base sa dahilan na iyan saka dahil ta hinaluan na kan mga tawo nin mga seremonyang kontra sa sinasabi kan Bibliya an ibang mga kapiyestahan, dai isineselebrar kan mga Saksi ni Jehova an mga kapiyestahan na arog kan minasunod:

  •  Hanukkah. An kapiyestahan na ini paggirumdom sa pagdedikar giraray kan templo kan mga Judio sa Jerusalem. Pero sinasabi kan Bibliya na si Jesus nagin Halangkaw na Saserdote kan sarong “mas importante asin mas marahay na tolda [o, templo] na bakong gibo nin mga kamot, an buot sabihon, bakong kabtang kan mga bagay digdi sa daga.” (Hebreo 9:11) Para sa mga Kristiyano, rinibayan na kan espirituwal na templong iyan an pisikal na templo sa Jerusalem.

  •  Rosh Hashanah. Ini an inot na aldaw nin taon kan mga Judio. Kan suanoy na panahon, kaiba sa kapiyestahan na ini an pagdulot sa Diyos nin espesyal na mga atang. (Bilang 29:1-6) Pero bilang Mesiyas, ‘pinapundo’ na ni Jesu-Cristo “an pag-atang asin pagdulot nin regalo,” kaya imbalido na iyan sa paghiling nin Diyos.—Daniel 9:26, 27, NWT.

•   An okasyon daw na ini konektado sa interfaith?

   Prinsipyo sa Bibliya: “Paano magigin magkapareho an sarong nagtutubod asin an sarong dai nagtutubod? Asin paano magigin magkabagay an templo nin Diyos asin an mga idolo?”—2 Corinto 6:15-17.

   Hinihinguwa kan mga Saksi ni Jehova na mamuhay nin tuninong kaiba kan saindang kapwa asin igalang an deretso kan iba na pumili kan gusto nindang tubudon, pero linilikayan ninda an mga selebrasyon na nagsusuportar sa interfaith sa minasunod na mga paagi.

   Selebrasyon na konektado sa sarong prominenteng personahe nin relihiyon o okasyon na nang-eengganyar nin sararong pagsamba kan mga iba-iba an relihiyon. Kan darahon nin Diyos an banwaan niya kaidto sa sarong daga na iba an relihiyon kan mga tawo, sinabi niya sainda: “Dai ka makipagtipan sa sainda o sa saindang mga diyos.  . . Kun paglilingkudan mo an saindang mga diyos, siguradong magigin siod iyan sa saimo.” (Exodo 23:32, 33, NWT) Kaya dai nakikiiba an mga Saksi ni Jehova sa mga okasyon na iyan, arog kan minasunod.

  •  Loy Krathong. Sa kapiyestahan na ini kan mga Thai, “naggigibo an mga tawo nin mga lalagan na gibo sa dahon, binubugtakan iyan nin mga kandila o istik na insenso, dangan pinapaatong iyan sa tubig. Nagtutubod sinda na inaanod kaiyan parayo an malas. An totoo, ginigirumdom kan kapiyestahan na ini an banal na gira nin bitis na winalat ni Buddha.”—Encyclopedia of Buddhism.

  •  National Repentance Day. An mga nagseselebrar sa okasyon na ini “minauyon sa mga prinsipyo na tinutubod kan mga Kristiyano,” an sabi nin sarong opisyal kan gobyerno na sinambit sa The National, sarong diyaryo sa Papua New Guinea. Sinabi niya na an aldaw na ini padagos na “makakatabang sa pagsuportar sa mga prinsipyo kan Kristiyanismo sa nasyon.”

  •  Vesak. “Ini an pinakabanal sa gabos na banal na aldaw para sa mga Budista, kun sain isineselebrar an pagkamundag ni Buddha, an pagkaigwa niya nin kaliwanagan, asin an saiyang kagadanan, o an pag-ako nin Nirvana.”—Holidays, Festivals, and Celebrations of the World Dictionary.

   Selebrasyon na basado sa mga relihiyosong tradisyon na dai itinutukdo kan Bibliya. Sinabi ni Jesus sa mga lider nin relihiyon: “Ginibo nindong daing saysay an tataramon nin Diyos dahil kan saindong tradisyon.” Sinabi man niya na daing kamanungdanan an saindang pagsamba huli ta itinutukdo ninda “an mga pagbuot nin mga tawo bilang mga doktrina.” (Mateo 15:6, 9) Huling isinasapuso kan mga Saksi ni Jehova an mga sinabi ni Jesus, dakul na relihiyosong kapiyestahan an dai ninda isineselebrar.

  •  Epiphany (Three Kings’ Day, Timkat, o Los Reyes Magos). An ginigirumdom sa selebrasyon na ini iyo an pagbisita kan mga astrologo ki Jesus o kaya an pagbawtismo ki Jesus. Sa kapiyestahan na ini, “ginibong Kristiyanong selebrasyon an pirang paganong kapiyestahan sa panahon nin tigsuli, na nagtataong onra sa mga diyos nin nagbubulos na tubig, salog, asin sapa.” (The Christmas Encyclopedia) An kapiyestahan na kapareho kaiyan, an Timkat, “nakabaseng maray sa tradisyon.”—Encyclopedia of Society and Culture in the Ancient World.

  •  Feast of the Assumption of the Virgin Mary. Isineselebrar an kapiyestahan na ini sa pagtubod na an ina ni Jesus nagsakat sa langit na may pisikal na hawak. “An pagtubod na ini,” sigun sa Religion and Society—Encyclopedia of Fundamentalism, “dai aram kan inot na mga Kristiyano asin dai man iyan mahihiling sa Kasuratan.”

  •  Kapiyestahan nin Immaculada Concepcion. “An Immaculada Concepcion [ni Maria] dai espesipikong itinutukdo kan Kasuratan . . . Katukduan [ini] na ginibo kan Simbahan.”—New Catholic Encyclopedia.

  •  Kuwaresma. Sigun sa New Catholic Encyclopedia, an panahon na ini nin pagpepenitensiya asin pag-ayuno naestablisar kan “ikaapat na siglo,” labing 200 na taon pakatapos makumpleto an Bibliya. Arog kaini an sinasabi kan encyclopedia manungod sa inot na aldaw kan Kuwaresma: “An paglaag nin krus sa angog gamit an abo pag Ash Wednesday luminakop puon kaidtong Synod of Benevento, kan taon 1091.”

  •  Meskel (o, Maskal). Sa kapiyestahan na ini sa Etiopia, isineselebrar “an pagkadiskubre sa Tunay na Krus (an krus na pinakuan ki Cristo),” paagi sa pagpalaad nin kalayo saka pagburubayle sa palibot kaiyan,” an sabi kan Encyclopedia of Society and Culture in the Medieval World; sainda an parentesis. Pero an mga Saksi ni Jehova dai naggagamit nin krus sa saindang pagsamba.

•   An okasyon daw na ini nagtatao nin onra sa sarong tawo, organisasyon, o simbolo nin nasyon?

   Prinsipyo sa Bibliya: “Ini an sabi ni Jehova: ‘Sumpaon an tawo na nagtitiwala sa mga tawo man sana, na nananarig sa kusog nin tawo asin na an puso minatalikod ki Jehova.’”—Jeremias 17:5, NWT.

   Pinapahalagahan kan mga Saksi ni Jehova an saindang kapwa saka ipinapamibi pa ngani ninda sinda, pero dai sinda nakikiiba sa minasunod na mga okasyon o selebrasyon:

   Mga selebrasyon na nagtataong onra sa sarong tagapamahala o iba pang importanteng tawo. Sinasabi kan Bibliya: “Para sa kapakanan nindo, dai na kamo magtiwala sa saro man sanang tawo, na saro man sanang hinangos sa dungo niya. Ano man ta ikokonsiderar pa siya?” (Isaias 2:22, NWT) Kaya dai isineselebrar kan mga Saksi ni Jehova an birthday nin sarong hadi o reyna.

   Mga selebrasyon na para sa bandera kan nasyon. Dai isineselebrar kan mga Saksi ni Jehova an Flag Day. Taano? Dahil sinasabi kan Bibliya: “Rumayo kamo sa mga idolo.” (1 Juan 5:21) Para sa iba, an bandera bako man idolo, o sarong bagay na sinasamba, pero nagsurat an historyador na si Carlton J. H. Hayes: “An bandera an pinakasimbolo nin pagtubod asin an pinakasentro nin pagsamba kan nasyonalismo.”

   Mga kapiyestahan o selebrasyon na nagtataong onra sa sarong santo. Ano an ginibo ni apostol Pedro kan magluhod saiya an sarong lalaking may takot sa Diyos? Sinasabi kan Bibliya: “Kinaputan siya ni Pedro, na sinasabi: ‘Tumindog ka; tawo man ako arog mo.’” (Gibo 10:25, 26) Habo ni Pedro asin kan iba pang apostol na tawan sinda nin espesyal na onra o sambahon, kaya dai nakikiiba an mga Saksi ni Jehova sa mga selebrasyon na nagtataong onra sa mga ibinibilang na santo, arog kan minasunod:

  •  Todos los Santos. “Sarong kapiyestahan na nagtataong onra sa gabos na santo . . . Dai masiyerto an pinaghalian kan kapiyestahan na ini.”—New Catholic Encyclopedia.

  •  Fiesta of Our Lady of Guadalupe. Tinatawan nin onra sa kapiyestahan na ini “an patrona kan Mexico,” na pinaniniwalaan kan iba na si Maria, an ina ni Jesus. Sinasabing milagroso siyang nagpahiling sa sarong parauma kan 1531.—The Greenwood Encyclopedia of Latino Literature.

  •  Name Day. “An name day iyo an kapiyestahan nin sarong santo na ipinangaran sa sarong aki kan siya bunyagan o magpakumpil,” an sabi kan librong Celebrating Life Customs Around the World—From Baby Showers to Funerals. Sinasabi pa kaiyan na “konektadong marhay sa relihiyon an aldaw na iyan.”

   Mga selebrasyon na may koneksiyon sa pulitika o mobimiyento nin mga tawo. “Mas marahay na magpaili ki Jehova,” an sabi kan Bibliya, “kisa magtiwala sa mga tawo.” (Salmo 118:8, 9, NWT) Dai isineselebrar kan mga Saksi ni Jehova an Youth Day o Women’s Day na nagsusuportar sa mga kampanyang pampulitika asin pantawo, huling gusto nindang ipahiling na nagtitiwala sinda na an Diyos an maresolber sa mga problema sa kinaban bako an tawo. Iyan man an dahilan kaya dai sinda nagseselebrar nin Emancipation Day o iba pang kaparehong selebrasyon. Imbes, naglalaom sinda na an Kahadian nin Diyos an maresolber sa isyu nin diskriminasyon sa lahi saka dai patas na pagtrato sa iba.—Roma 2:11; 8:21.

•   An okasyon daw na ini may pinapaburan na sarong nasyon o etnikong grupo?

   Prinsipyo sa Bibliya: “An Diyos mayong pinapalain, kundi sa lambang nasyon an tawong natatakot sa saiya asin naggigibo nin matanos saiyang inaako.”—Gibo 10:34, 35.

   Ugma an dakul na Saksi ni Jehova sa saindang dagang tinubuan, pero linilikayan ninda an mga selebrasyon na mas pinapaburan an sarong nasyon o etnikong grupo arog kan minasunod na mga selebrasyon.

   Selebrasyon na nagtataong onra sa mga suldados. Imbes na suportaran an giyera, sinabi ni Jesus sa saiyang mga parasunod: “Padagos na kamutan an saindong mga kaiwal asin padagos na ipamibi an mga nagpepersegir sa saindo.” (Mateo 5:44) Kaya dai nakikiiba an mga Saksi ni Jehova sa mga selebrasyon na arog kan minasunod:

  •  Anzac Day. “An Anzac nangangahulugan na Australian and New Zealand Army Corps,” asin “paghaloy-haloy an Anzac Day nagi nang aldaw nin paggirumdom sa mga nagadan sa giyera.”—Historical Dictionary of Australia.

  •  Veterans Day (Remembrance Day, Remembrance Sunday, o Memorial Day). An mga okasyon na ini nagtataong onra sa “mga beteranong suldados asin sa mga nagadan sa mga giyera kan saindang nasyon.”—Encyclopædia Britannica.

   Selebrasyon may koneksiyon sa kasaysayan o independensiya nin sarong nasyon. Sinabi ni Jesus manungod sa mga parasunod niya: “Bako sindang kabtang kan kinaban, kun paanong ako bakong kabtang kan kinaban.” (Juan 17:16) Gusto kan mga Saksi ni Jehova na maaraman an kasaysayan kan sarong nasyon, pero dai sinda nakikiiba sa mga selebrasyon na arog kan minasunod:

  •  Australia Day. Sigun sa Worldmark Encyclopedia of Cultures and Daily Life, an okasyon na ini paggirumdom “kan aldaw kaidtong 1788 kan iitaas kan mga suldados kan England an saindang bandera asin ideklarar an Australia na sarong bagong kolonya.”

  •  Guy Fawkes Day. Ini “an aldaw nin pagselebrar kan nasyon para girumdumon an pagkapalyar kan plano ni Guy Fawkes asin kan iba pang suportador na Katoliko sa paggadan ki Hading James I saka sa pagpabagsak sa Parliamento kan [England] kaidtong 1605.”—A Dictionary of English Folklore.

  •  Independence Day. Sa dakul na nasyon, ini an “espesyal na aldaw para iselebrar kan mga tawo an anibersaryo kan pagkabutas kan saindang nasyon sa nasyon na nagsakop sa sainda.”—Merriam-Webster’s Unabridged Dictionary.

•   An okasyon daw igwa nin imbuweltong imoral na mga gibo o daing kontrol na pag-urugma?

   Prinsipyo sa Bibliya: “Igo na an nag-aging panahon na ginamit nindo sa paggibo kan kagustuhan kan mga tawo kan mga nasyon, na iyo an daing pakundangan na paggawi, daing kontrol na mga hurot, sobrang pag-inom nin arak, mariribok na kaurugmahan, pataragalan sa pag-inom, asin mga makababalding idolatriya.”—1 Pedro 4:3.

   Kauyon kan prinsipyong iyan, linilikayan kan mga Saksi ni Jehova an mga selebrasyon na grabe an irinuman asin may mariribok na party. Nag-uurugma man an mga Saksi ni Jehova kaiba an mga amigo ninda, asin kun engkaso man mag-inom sinda nin arak, katamtaman sana iyan. Hinihinguwa nindang sunudon an sinasabi kan Bibliya: “Nagkakakan man kamo o nag-iinom o naggigibo nin ano pa man, gibuhon nindo an gabos na bagay sa ikakamuraway nin Diyos.”—1 Corinto 10:31.

   Huli kaiyan, an mga Saksi ni Jehova dai nakikiiba sa mga kapiyestahan o kaparehong mga selebrasyon na may imbuweltong maating paggawi na kinokondenar kan Bibliya. Saro na diyan an kapiyestahan kan mga Judio na Purim. Haloy nang isineselebrar an Purim bilang paggirumdom sa pagliligtas sa mga Judio kan ikalimang siglo B.C.E., pero ngunyan, sinasabi kan librong Essential Judaism na ini puwede nang “masabing bersiyon kan mga Judio sa Mardi Gras o Carnival.” Gustong-gusto kan mga nagbabali digdi na “magsulot nin mga kostiyum (sa parati, an mga lalaki nagsusulot nin badong pambabayi), magwaralà, magbururat, saka magriribok.”

 Iyo. Itinutukdo kan Bibliya na dapat tang padangaton asin igalang an gabos na miyembro kan pamilya, ano man an saindang relihiyon. (1 Pedro 3:1, 2, 7) Totoo, pag dai nagseselebrar an sarong Saksi ni Jehova nin pirang partikular na selebrasyon, tibaad maanggot o makulgan an mga kapamilya niya, o tibaad makamati pa ngani na habo niya na sainda. Kaya hinihinguwa kan mga Saksi ni Jehova na maipamati sa saindang mga kapamilya na padangat ninda an mga ini, magalang na maipaliwanag sa mga ini an saindang desisyon, asin mabisita an mga ini sa ibang pagkakataon.

 Dai. Nagtutubod sinda na an lambang tawo dapat na gumibo nin sadiri niyang desisyon. (Josue 24:15) Tinatawan nin onra kan mga Saksi ni Jehova an “gabos na klase nin tawo” ano man an saindang relihiyon.—1 Pedro 2:17.