An pondo na ginagamit para sa samong pambilog na kinaban na gibuhon panginot nang hali sa boluntaryong mga donasyon kan mga Saksi ni Jehova. a May mga kahon para sa kontribusyon sa mga lugar na pigtitiripunan mi, saka an ibang mga paagi para makadonar nakalista sa samong page na Donasyon. Igwa diyan nin magkakalain na opsiyon kaya puwedeng pilion nin saro kun baga madonar siya sa samong pambilog na kinaban na gibuhon, sa lokal na mga gastos, o sa duwang iyan.

 Dai hinahagad sa mga Saksi ni Jehova na magtao nin ikapu o na magdonar nin ano man na espesipikong kantidad o porsiyento kan saindang income. (2 Corinto 9:7) Nungka kaming nangungulekta o naghahagad nin bayad para makaatender sa samong mga pagtiripon; dai man naghahagad nin bayad an samong mga ministro para sa mga bawtismo, lubong, kasal, o iba pang relihiyosong mga serbisyo. Dai kami nagtitipon nin kuwarta paagi sa pagtinda nin mga kakanon asin iba pang produkto, pagpa-binggo, mga peryahan, dinner party, pa-raffle, o iba pang kaagid na okasyon, asin dai man kami nagso-solicit nin mga donasyon. Nungka ming itinatao sa iba o isinasapubliko an impormasyon manungod sa mga nagdodonar. (Mateo 6:2-4) An samong mga website saka mga publikasyon mayo nin pangkomersiyal na mga advertisement.

 An lambang kongregasyon kan Mga Saksi ni Jehova nagtatao nin bulanan na financial report sa mga pagtiripon kaiyan, na bukas sa publiko. Regular na pig-o-audit an mga accounting record kan lambang kongregasyon para masigurado na nagagamit nin tama an mga donasyon.—2 Corinto 8:20, 21.

•   Mga kahon para sa kontribusyon: Puwede kang maghulog nin donasyon na kuwarta o tseke sa mga kahon para sa kontribusyon sa mga Kingdom Hall, Assembly Hall, o sa iba pang mga lugar na pigtitiripunan mi.

•   Online na donasyon: Sa dakul na nasyon, puwede mong gamiton an page na “Magdonar sa Mga Saksi ni Jehova” para magdonar paagi sa credit card, debit card, bank transfer, asin iba pang elektronikong mga pamamaagi. b May mga Saksi na pinipiling “magtagama nin sarong kantidad” kada bulan paagi sa pag-iskedyul nin regular na mga donasyon gamit an saro sa mga pamamaaging iyan.—1 Corinto 16:2.

•   Plinanong pagtao: May mga pamamaagi nin pagdonar na nangangaipo nin patiinot na pagplano asin/o pagkonsulta sa legal na mga kahagadan sa pagdonar. Paagi sa arog kaiyan na pagplano, puwede mong maaprobetsaran an mga diskuwento sa buhis sa saindong nasyon. Dakul an nakinabang sa pag-research manungod sa mga charitable gift na puwedeng gibuhon mantang buhay pa o na magkakaepekto pagkagadan. Kontakon tabi an sangang opisina kan Mga Saksi ni Jehova sa saindong lugar para sa dagdag pang impormasyon kun gusto mong gumibo nin donasyon na kalabot an:

  •   bank account

  •   insurance asin retirement plan

  •   real estate

  •   stocks asin bonds

  •   testamento asin trust

 Para sa dagdag pang impormasyon manungod sa mga pamamaagi nin pagdonar na available sa saindong lugar, hilingon an page na “Magdonar sa Mga Saksi ni Jehova.”