Dai mi rinarayuan an mga nabawtismuhan bilang Saksi ni Jehova na dai na naghuhulit sa iba asin tibaad dai na nakikiasosyar sa mga kapagtubod. Sa katunayan, hinihinguwa ming tabangan sinda asin maibalik an saindang espirituwalidad.

 Dai mi awtomatikong itinitiwalag an saro na nakagibo nin magabat na kasalan. Pero, kun an sarong bawtisadong Saksi nagin ugali na an pagsuway sa mga pamantayan sa moral kan Bibliya asin dai nagsusulsol, rarayuan siya o ititiwalag. Malinaw na sinabi kan Bibliya: ‘Halion nindo an maraot na tawo sa tahaw nindo.’—1 Corinto 5:13.

 Paano kun an agom na lalaki natiwalag pero Saksi ni Jehova pa man an saiyang agom asin mga aki? Mababago an relasyon ninda pag-abot sa relihiyon, pero an pagigin magkapamilya dai. Nagpapadagos an relasyon ninda bilang mag-agom asin an normal na pagpadangat saka pagtrato sa kapamilya.

 An mga natiwalag puwedeng umatender sa mga pagtiripon kan samong relihiyon. Kun gusto ninda, puwede sindang tawan nin espirituwal na konseho kan mga elder sa kongregasyon. An katuyuhan iyo na tabangan an lambang indibidwal na makuwalipikar giraray na magin Saksi ni Jehova. Para sa mga natiwalag na nagpundo na sa salang paggawi asin nagpapahiling nin sinserong pagmawot na mamuhay kauyon kan mga pamantayan kan Bibliya, pirming bukas an pinto para magin mga Saksi ni Jehova giraray sinda.