Bakong totoo: Dai nagtutubod an mga Saksi ni Jehova na matatabangan sinda kan mga doktor kaya dai sinda nagpapabulong.

 Totoo: An pinakamarahay na paagi nin pagbulong an gusto mi para sa samong sadiri asin sa pamilya mi. Kun kaipuhan, minadulok kami sa mga doktor na may kakayahan na magbulong asin mag-opera na dai naggagamit nin dugo. Pinapahalagahan mi man an pag-uswag sa medisina. An totoo, an paagi nin pagbulong na dai naggagamit nin dugo na nadiskubre kan mga doktor para tabangan an mga pasyente nindang Saksi ginagamit na man ngunyan sa ibang mga pasyente. Sa dakul na nasyon ngunyan, puwede nang pilion kan mga pasyente an pagbulong na dai nagpapasalin nin dugo para malikayan an mga peligro na arog kan pagkakaigwa nin hilang na naipapasa paagi sa dugo, komplikasyon sa immune system, saka salang pagsalin nin dugo.

Bakong totoo: Naniniwala an mga Saksi ni Jehova na pagtubod an makakabulong nin hilang.

 Totoo: Dai kami nin faith healing.

 Bakong totoo: Mahalon an pagpabulong na dai naggagamit nin dugo.

 Totoo: Mas tipid an pagpabulong na dai naggagamit nin dugo. a

 Bakong totoo: Dakul na Saksi, pati mga aki, an nagagadan taon-taon dahil habo nindang magpasalin nin dugo.

 Totoo: Mayo nanggad iyan nin basehan. Pirmi nang ginigibo kan mga doktor an komplikadong mga operasyon arog kan organ transplant, operasyon sa puso asin tulang na dai nagsasalin nin dugo. b An mga pasyente, pati mga aki, na dai nagpasalin nin dugo sa parati pareho lang o mas madali pa nganing marahay kisa sa mga nagpasalin. c Pero arin man an pilion, mayo talaga nin makakasabi na an sarong pasyente magagadan huling dai siya mapasalin nin dugo o mabubuhay dahil mapasalin siya.

 An pinakadahilan kaini iyo an samong pagtubod. Malinaw na ipinagbuot sa Luma saka Bagong Tipan na maglikay kita sa dugo. (Genesis 9:4; Levitico 17:10; Deuteronomio 12:23; Gibo 15:28, 29) Saro pa, sa paghiling Diyos, buhay an irinerepresentar kan dugo. (Levitico 17:14) Kaya naglilikay kami sa dugo bako sanang huling sinusunod mi an Diyos kundi dahil iginagalang mi man Siya bilang an Kagtao nin buhay.

 Iniisip kaidto kan mga nasa medisina na an pagbulong na dai naggagamit nin dugo, o an inaapod na bloodless medicine, grabe karaot, o garo pa ngani iyan paghugot. Pero, nabago iyan kaining nakaaging mga taon. Halimbawa kan 2004, sarong artikulo na ipinublikar sa sarong journal dapit sa medisina an nagsabi na “an dakul sa mga paagi nin pagbulong na ginigibo para sa mga pasyenteng Saksi ni Jehova iyo na an magigin pamantayan sa maabot na mga taon.” d An sarong artikulo sa journal na Heart, Lung and Circulation nagsabi kan 2010 na “dapat bako sanang para sa mga [Saksi ni Jehova] an ‘pag-opera na daing dugo’ kundi dapat na magin parte na ini kan ginigibong mga operasyon.”

 Tanganing magibo an komplikadong mga operasyon na daing pagsalin nin dugo, rinibong doktor ngunyan sa bilog na kinaban an may ginigibong mga pamamaagi tanganing daing gayo mawaran nin dugo an pasyente. An alternatibong iyan sa pagsalin nin dugo ginigibo man dawa sa nag-uuswag pa sanang mga nasyon asin mas pinipili iyan kan dakul na pasyente na bako man Saksi ni Jehova.